Tala otooto o Fa’amasinoga

SOSAIETE LA’ASAGA

O le aso 28 o Oketopa lea ua fa’atulaga e tu’uina atu ai le fa’asalaga a le Fa’amasinoga Fa’aitumalo fa’asaga i le susuga a Sosaiete La’asaga, ina ua ta’usala e le vaega iloilo iuga o ia i moliaga mama e 2 sa tu’uaia ai o ia e le malo.

O La’asaga, lea o loo tumau pea le tatalaina i tua e fa’atali ai le aso e lau ai lana fa’asalaga, na tu’uaia e le malo i moliaga mama e 2, o lona taumafai lea e tagofia itutinosa o se tama’ita’i talavou, atoa ai ma lona taofia faapagota o ia i se auala fa’asolitulafono.

O ia moliaga o se vaega A lea o solitulafono mama, e mafai ona fa’asala ai se tasi i le toese mo le umi e le silia i le tausaga, poo le fa’asala fo’i i le salatupe e le silia i le $1,000, poo le fa’asala fo’i i fa’asalaga uma ia e lua.

O le ali’i loia fautua ia Ryan Anderson na tula’i mo La’asaga, ae o le ali’i loia sili lagolago ia Jason Mitchell na tula’i mo le malo.

O molimau na valaauina e aofia ai le teineititi e 14 tausaga le matua na molimau mo le malo, ae o le ali’i na molia ma lona to’alua na molimau mo le la la itu.

O le afioga i le ali’i fa’amasino ia Fiti Sunia na fa’atautaia lenei fa’amasinoga, ae o ali’i ma tama’ita’i e to’a 6 o le vaega iloilo iuga na latou iloiloina le fa’aiuga o lenei mataupu.

Na taua e le malo i le latou tagi e fa’apea, o se fa’alavelave na tula’i mai i le tausaga nei, na mafua ai ona molia La’asaga. O lea fa’alavelave na tula’i mai ina ua alu le teineititi na a’afia e taele, ae fa’ateia o ia ina ua alu atu le ua molia ma taumafai e faia ni amioga le taupulea ia te ia, e aofia ai ma le taofi o ia i totonu o le fale taele.

Na taua e le loia a le malo e fa’apea, o se tasi o itu na faigata ai i le teineititi na a’afia ona taumafai e tete’e atu i uiga a le ua molia, sa na o lona solo taele sa laei i le taimi na tula’i mai ai le fa’alavelave.

Na tu’uaia fo’i e le malo e fa’apea, na avea le tauiviga i le va o La’asaga ma le teineitiiti na a’afia i totonu o le fale taele ma itu na lagona mai ai e isi tagata, ma aga’i atu ai loa e fesoasoani, peita’i e taunu’u atu ua sola ese le ua molia.

Ae na taua e le loia a La’asaga i lana fa’afinauga e fa’apea, i le aso na tula’i mai ai le fa’alavelave, sa nofonofo ai La’asaga i lalo o le laau o loo i luma o le latou fale ma inu lana pia. Sa ia vaaia le aga’i atu o le teineititi na a’afia i tua o le fale taele.

Na aga’i fo’i La’asaga i tua o le fale taele e pei ona taua e lana loia, peita’i na te lei faia ni uiga i le teineititi na a’afia, ona e taunu’u atu La’asaga i tua ae fetaui ma le savali mai o le teineititi na a’afia.

Na finau fo’i Anderson e faapea, e leai ma ni mau faamaonia na tuuina mai e le malo e lagolago ai le latou tagi. Ma, afai e leai ni mau e lagolago ai e le malo le latou tagi fa’asaga ia La’asaga, e tatau fo’i la i le vaega iloilo iuga ona latou tuuina mai le fa’aiuga, e le nofosala La’asaga i moliaga e pei ona tu’uaia ai o ia.

Ae na toe finau le itu a le malo e fa’apea, soo se tagata lava na te fuafua e faia se solitulafono, e le mana’o e iloa e se tagata, ae naunau ia na o ia lava ma le tama’ita’i o le a faia fa’asaga i ai le solitulafono.

TAUTUA LETASI

O le aso 17 o Tesema 2018 lea ua toe fa’atulaga e le Fa’amasinoga Maualuga e faia ai le fa’amasinoga iloilo fou a le susuga a Tautua Letasi, i le maea ai lea o lana fa’amasinoga autu lea na faia i le masina na te’a nei, lea na fa’aleaoga e le fa’amasinoga maualuga, ina ua eseese finagalo o sui o le vaega iloilo iuga i le latou fa’aiuga sa tuuina mai.

O le mae’a ai ona tuuina mai e le Fa’amasinoga Maualuga o le fa’aiuga e fa’aleaogaina ai le fa’amasinoga autu a Letasi, na talosaga ai loa le loia a le malo ia Woodrow Pengelly i le fa’amasinoga mo se avanoa e toe faia ai le fa’amasinoga autu a le ua molia.

O loo tu’uaia e le malo ia Letasi i moliaga e aofia ai le umia faasolitulafono o vaega o fualaau fa’asaina o le pauta o le aisa, faapea ai ma le umia faasolitulafono o vaega o le laau fa’asaina o le mariuana. O loo tu’uaia fo’i o ia i le moliaga mama o le umia faasolitulafono o aupega fa’asaina.

O loo tumau pea tuutuuga o loo tatala ai e le Faamasinoga ia Letasi i tua e fa’atali ai le aso lea ua fa’atulaga e toe fa’ataunuu ai le isi ona fa’amasinoga iloilo.

O ni isi o ia tuutuuga e aofia ai lona taumamao mai le fa’aaogaina o fualaau fa’asaina poo le ‘ava malosi, ma ia fesoota’i vava lalata ma lana loia fautua.