Tala otooto o Fa’amasinoga

MOLIA SE TINA I LONA FA’AOOLIMA I LONA TO’ALUA

O le vaiaso na te’a nei na taofia ai e Leoleo i le toese i Tafuna se Tina e 32 tausaga le matua, ona o tu’uaiga i lona fa’aoolima lea i lona to’alua, a o sii e lona to’alua le la tama teine e 2 tausaga le matua.

O moliaga faasaga i le Tina ua molia e aofia ai le faaoolima i le tulaga tolu, faatupu vevesi i nofoaga faitele, atoa ai ma lona faia o ni gaioiga e ono lamatia ai le saogalemu o fanau laiti.

O le mae’a ai o le ulua’i iloiloga a le ua molia, na faia ai loa e le afioga i le alii faamasino ia Fiti Sunia le faaiuga e tatala ai o ia i tua e aunoa ma se tupe e totogi, i lalo o tuutuuga e le tatau ona toe alu i le latou fale ma lona to’alua, a ia saili se isi nofoaga e nofo ai e fa’atalitali ai taualumaga o lana mataupu.

O le vevesi na amata mai i se taugaupu a le ua molia ma le tuafafine a lona to’alua, sosoo ai ma le aafia atu ai ma le Tina o lona to’alua, ae mulimuli ai alu atu lona to’alua ma ‘au i lona tuafafine ma lona Tina.

O le ita tele o le ua molia ma ia tu’iina ai lona to’alua ao si’i e le tamaloa lona afafine e 2 tausaga. Ina ua taunu’u Leoleo, na savali sa’o atu lava le ua molia ma fai i Leoleo e ave loa o ia e loka se’i maua ai se mapu o lona mafaufau.

O le masina fou lea ua fa’atulaga e toe valaau ai le mataupu a le ua molia i luma o le fa’amasinoga.

FAAMANATU TUGAGA

Ua toe taofia i le toese i Tafuna le ali’i na tau sailia mai e le Fa’amasinoga Fa’aitumalo i le 4 tausaga talu ai, ona o tu’uaiga i lona le usitaia lea o tuutuuga o lana nofovaavaaia sa tu’uina atu i le 2014 mo le umi e 12 masina.

O le aso 5 o Oketopa lea ua fa’atulaga e toe valaau ai le mataupu a Fa’amanatu Tugaga i luma o le afioga i le ali’i fa’amasino ia Fiti Sunia, ma ua taofia nei o ia i le toese e aunoa ma se tupe e tatala ai o ia i tua.

O le aso Lulu o le vaiaso na te’a nei na tula’i ai Tugaga i luma o le fa’amasinoga fa’aitumalo mo lana ulua’i iloiloga, peita’i na toe tolopo lana iloiloga e fa’aauau i le aso Tofi na sosoo ai. Ae i le mae’a ai o lana iloiloga i le aso Tofi, na faia ai loa le faaiuga ina ia taofia pea o ia seia aulia le masina fou.

O Tugaga o loo faanofovaavaaia mo le 12 masina, ina ua faamaonia e le fa’amasinoga le moliaga o le faatupu vevesi i nofoaga faitele na tu’uaia ai o ia i le 2014. O se tasi o tuutuuga o lana nofovaavaaia, o le fa’asa lea ona tuua le atunu’u, fa’asa fo’i ona ia tagofia le ‘ava malosi. Sa faatonuina fo’i o ia e le fa’amasinoga ina ia faia ni suega faapitoa i lona tino e iloa ai o loo ia usitaia tuutuuga a le fa’amasinoga.

O le tausaga e 2014 na faatonuina ai e le Ofisa Faanofovaavaaia ia Tugaga ina ia fa’atinoina se suega e siaki ai poo ia usitaia tuutuuga o le fa’asa lea ona ia toe tagofia le ‘ava malosi. Na fiu le ofisa faanofovaavaaia e fa’atali le fa’atinoina o le suega, peita’i ua le toe vaaia Tugaga, e le i toe alu atu fo’i e asi le ofisa nofovaavaaia, ma mafua ai loa ona sainia e le afioga i le ali’i fa’amasino ia Elvis P. Patea sa tula’i mai i lena taimi se poloaiga e pu’e fa’apagota ai Tugaga, ona ua ia le usitaia tuutuuga o lana nofovaavaaia.

Talu mai le 2014, na taumafai pea le ofisa faanofovaavaaia e sailia le ua molia ae lei maua, peita’i o le aso Lulu o le vaiaso na te’a nei, na aga’i atu ai Tugaga e piki mai sana kilia mai le fa’amasinoga, ma pu’e fa’apagota ai loa o ia e le Masela o le Fa’amasinoga, ma tula’i ai loa o ia i luma o le ali’i fa’amasino ia Sunia mo lana iloiloga faavavevave.

Ina ua valaau le mataupu a Tugaga, sa fesiligia ai loa e Sunia lana loia fautua ia Ryan Anderson poo fea sa i ai le ua molia i le 4 tausaga ua tuana’i. Na tali le ali’i loia, o Tugaga sa malaga i Samoa e tausi lona Tina, a o lea ua toe fo’i mai i le atunu’u.

Na toe fesili Sunia ia Anderson, pe malamalama Tugaga i tuutuuga o lana nofovaavaaia, e le faatagaina lona tuua o le atunuu sei vagana ua avatu se poloaiga a le fa’amasinoga, ae na tali le ali’i loia, e foliga mai e le i malamalama lelei Tugaga i tuutuuga o lana nofovaavaaia.

E tusa ai o fa’amaumauga ua maua e le fa’amasinoga, o le amataga o le vaiaso na te’a nei na toe ulufale mai ai Tugaga i le atunu’u, ma aga’i sa’o atu ai loa i le fale fa’amasino e piki mai sana kilia.

Na taua e Anderson i le fa’amasinoga e fa’apea, o Tugaga na ulufale mai i le atunu’u i le aso Gafua i le pemita e 30 aso, ma aga’i sa’o atu ai loa i le fale fa’amasino i le aso Lulu e piki mai sana siklia.

Na fia malamalama Sunia, poo le a le ituaiga kilia na alu atu le ua molia e piki mai, poo se kilia e fa’afou ai lona ID ua 4 tausaga talu ona mae’a le aoga, poo se kilia mo se isi manaoga.

Talu ai le tele o fesili sa fia malamalama i ai le fa’amasinoga, na faia ai loa le fa’aiuga ina ia toe taofia Tugaga i le falepuipui i le po o le aso Lulu, ma le tuutuuga e toe valaau lana mataupu i le taeao o le aso Tofi na sosoo ai.

Ina ua toe valaau le mataupu a le ua molia i le taeao o le aso Tofi, na maua ai e le fa’amasinoga isi fo’i fa’amaumauga fou mai le Ofisa o Femalagaaiga. O ia fa’amaumauga e aofia ai leai o ni fa’amaumauga mai le ofisa o femalagaaiga e fa’amaonia ai, sa ulufale mai Tugaga i le atunu’u i se pemita e 30 aso i le vaiaso na te’a nei.

O ia fa’amaumauga na matua fa’ateia ai le ali’i faamasino ia Sunia, ma mafua ai loa ona ia toe fesili ia Anderson, poo fea sa i ai Tugaga i le 4 tausaga ua mavae atu. Na tali le ali’i loia, o Tugaga sa i ai i Samoa i lona aiga, a o lea ua toe ulufale mai i le atunu’u.

Na toe fesili Sunia ia Anderson pe sa i ai se ID a Tugaga mai le ofisa o femalagaaiga, na tali le ali’i loia, e talitonu o ia sa i ai.

O le tele ai o ni isi o mataupu o loo nenefu ai le fa’amasinoga, na mafua ai loa ona faia e Sunia le fa’aiuga, ina ia taofia pea Tugaga i le falepuipui e aunoa ma se tupe e tatala ai i tua, e fa’atali ai lana iloiloga lea ua fuafua mo le aso 5 o Oketopa.

MALALA LAUTAIMI

O le aso 25 o Oketopa lea ua fa’atulaga e lau ai le fa’asalaga a se ali’i e 25 tausaga le matua, lea ua ta’usala e le fa’amasinoga i le moliaga mamafa o le gaoi.

Na ulua’i tu’uaia e le malo ia Malala Lautaimi i moliaga mamafa e 2, lea e aofia ai le faomea i le tulaga lua ma le gaoi. Ae i lalo o se maliliega na latou sainia ma le malo, ma ua talia fo’i e le fa’amasinoga, ua malie ai le ua molia e tali ioe i le moliaga mamafa o le gaoi.

I le tali ioe ai o le ua molia i le moliaga e pei ona ta’usala ai o ia, na ia ta’utino ai e fa’apea, i se taimi o le aso 18 o Oketopa o le 2016, sa ia ave ai le telefoni a se tasi o tagata e aunoa ma se fa’atanaga, ma o lea telefoni e silia ma le $100 lona tau. Na ta’utino atili le ua molia e fa’apea, i le aso e pei ona taua, sa ia gaoia ai se telefoni o le ituaiga o le Samsung Galaxy S5 mai se tagata i Iliili.

O lo o fa’aauau pea ona taofia le ua molia i le toese i Tafuna talu mai le aso na pu’e fa’apagota ai o ia e Leoleo, e fa’atali ai le aso lea ua fa’atulaga e lau ai lana fa’asalaga.