Tala otooto o Fa’amasinoga

JUNIOR UTUGA

Ua tuuina atu nei e le afioga i le ali’i Fa’amasino ia Fiti Sunia se lapataiga mulimuli i se ali’i sa avea ma Leoleo, ina ia aua nei ona toe misia se aso e faia ai lana iloiloga i luma o le Fa’amasinoga Fa’aitumalo. Afai loa ae toe misi, o le a taofia moni loa o ia i le falepuipui e fa’atalitali ai le fa’aiuga o lana mataupu.

Na tula’i Junior Utuga i luma o le fa’amasinoga fa’aitumalo i le aso Lua o le vaiaso nei, i lalo o se poloaiga mai le fa’amasinoga e pu’e fa’apagota mai ai o ia, e mafua mai i lona le auai i lana iloiloga sa faia i le aso 17 Aokuso, 2018.

E pei ona taua i fa’amaumauga a le fa’amasinoga, e le i oo atu Utuga i le fa’amasinoga ina ua valaau lana mataupu i le aso 25 Iulai, o le mafua’aga lea na toe fa’atulaga ai loa le isi ana iloiloga faapitoa e faia i le aso 17 Aokuso. Ina ua valaau lana mataupu, sa lei auai fo’i o ia i totonu o le fale fa’amasino, o le mafua’aga lea na sainia ai loa e Sunia se poloaiga e pu’e fa’apagota atu ai Utuga.

O le aso Lua o le vaiaso nei na oo atu ai Utuga i luma o le fa’amasinoga ina ua ia maua le kopi o le poloaiga.

O le ali’i loia fautua ia Ryan Anderson o lo o tula’i mo Utuga ae o le tama’ita’i loia sili lagolago ia Laura Garvey o loo tula’i mo le itu a le malo.

Ina ua fesili ia Sunia pe aisea na le oo atu ai Utuga i le aso o lana iloiloga, na tali Anderson, e le i iloa e Utuga le aso o lana iloiloga, ua fiu fo’i lana aufaigaluega e fa’afesoota’i lana telefoni ua le mafai lava ona maua se fesootaiga.

“Ua toe tupu fo’i le tulaga lea o lona le iloaina o le aso o lana iloiloga,” o le saunoaga lea a Sunia. “E mafua ona ia le iloaina le aso o lana iloiloga, ona e le sau lava i le fa’amasinoga.”

Na talosaga Anderson i le fa’amasinoga ina ia fa’aleaoga le poloaiga sa sainia e pu’e fa’apagota ai Utuga, ao lea o le a latou fesoota’i vava lalata pea ina ia aua ne’i toe tula’i mai lea fa’aletonu.

Na talia e Sunia le talosaga ma faaleaoga ai loa le poloaiga na sainia e pu’e fa’apagota ai Utuga, fa’atasi ai ma le tuutuuga faapitoa, “E te toe misia loa se isi aso o sau iloiloga, ona pu’e faapagota loa lea o oe ma taofia i le falepuipui e le toe tatalaina i tua, se’i vagana ua mae’a lau mataupu.”

O Utuga, o se tasi o i latou e to’afa sa avea ma Leoleo o le malo na galulue i le Falepuipui o Tamaiti, lea o loo molia i moliaga o le faia o gaioiga fa’asolitulafono ma a’afia ai le saogalemu o fanau i totonu o le falepuipui.

O isi e to’atolu sa avea ma Leoleo o loo molia fa’atasi ma Utuga e aofia ai Okesene Alo, Alofagia Letuli ma Olafou Wilson, ma le ali’i e to’atasi sa taofia i totonu o le Falepuipui o Tamaiti ia Titio Titio Jr.

O Alo lea ua mae’a ona ta’usala e se vaega iloilo iuga i moliaga e aofia ai le faia o gaioiga e lamatia ai le saogalemu o fanau, umia faasolitulafono o fualaau fa’asaina, faapea ai ma le fesoasoani e fa’ataga tamaiti pagota e sosola i tua. O le aso 28 o Setema lea ua fa’atulaga e lau ai le fa’asalaga a Alo.

O Letuli ma Wilson ua mae’a ona tali ioe i laua i moliaga o le umia faasolitulafono o le fualaau fa’asaina o le aisa, fesoasoani i le fa’asosola i tua o pagota, atoa ai ma le gaoi, ma o lo o taofia pea i laua i le toese e fa’atali ai le aso e lau ai a la fa’asalaga.

O Titio Jr ua toe tatala i tua, ina ua fa’aaoga e le fa’amasinoga le umi lea na taofia ai o ia i le toese e fai ma ana fa’asalaga, i le mae’a ai lea ona ta’usala o ia i le moliaga o lona taumafai lea e fa’alavelave i molimau a le malo.

ULIMA UME

O le ali’i lea ua fa’amaonia lona le usita’i o tuutuuga o lana nofovaavaaia, ua poloaina e le afioga i le ali’i Fa’amasino ia Fiti Sunia lona tuliina o aso e 120 na fa’amalumalu e le fa’amasinoga mai lana mataupu muamua lea o lo o faanofovaavaaia ai o ia mo le 24 masina.

O le vaiaso nei lea na ta’usala ai e le fa’amasinoga fa’aitumalo ia  Ulima Ume i le moliaga o le faatupu vevesi i nofoaga faitele, ae solofua ai le moliaga o le faaoolima i le tulaga tolu. Na ta’utino Ume i le fa’amasinoga e faapea, o ia sa ‘ona i le taimi na tula’i mai ai le solitulafono.

O le ta’usala ai o le ua molia i le moliaga o le fa’atupu vevesi i nofoaga faitele, ua fa’amaonia ai lona le usitaia o tuutuuga o lana nofovaavaaia e 24 masina sa tuuina atu e le fa’amasinoga i le tausaga na te’a nei, lea sa poloaina ai o ia e aua ne’i ona toe tagofia le ‘ava malosi, pe na te toe soliina fo’i se tulafono a le malo.

O le faaiuga a le fa’amasinoga mo Ume, ua fa’aleaoga le avanoa sa tuuina atu e le fa’amasinoga i lana mataupu muamua, ae ua poloaina o ia e tuli le umi e 120 aso lea na fa’amalumalu.

E 24 masina lea ua faanofovaavaaia ai Ume i lalo o tuutuuga e aofia ai lona usitaia o isi uma tuutuuga sa tuuina atu e le fa’amasinoga i le tausaga na te’a nei.