Tala otooto o Fa’amasinoga

LAUOLEFISO NAEA

O le ali’i lea na sailia e Leoleo e ala i se poloaiga mai le Fa’amasinoga, e mafua mai i lona le usitaia o tuutuuga o lana nofovaavaaia sa tuuina atu i le 2015 ma le 2016, ua molia nei o ia i le moliaga o le fa’atupu vevesi i nofoaga faitele.

O le vaiaso na te’a nei na pu’e fa’apagota ai e Leoleo ia Lauolefiso Naea i le vaega e paka ai ta’avale a le Falema’i i Faga’alu, ina ua maua o ia o lo o taumafai e talepe se ta’avale.

Na iloa mai e se tagata mai totonu o lana ta’avale sa paka mai i le isi itu le taumafai o Naea e tatala fa’amalosi le faitoto’a o se ta’avale o loo paka i le vaega e paka ai ta’avale a le falema’i, ma ia fa’afesoota’iina ai loa Leoleo mo se fesoasoani.

E le i umi se taimi ae vaaia le savavali atu o ni Leoleo ma latou pu’eina ai Naea ao taumafai e sola ese. A o fa’agasolo le suesueina o Naea e Leoleo, na iloa mulimuli ane ai, o lo o i ai le poloaiga mai le Fa’amasinoga Maualuga e pu’e fa’apagota ai o ia, ona o lona le usitaia o tuutuuga o lana nofovaavaaia.

O ni isi o ia tuutuuga e aofia ai le alu e vaai le ofisa faanofovaavaaia, atoa ai ma le auai i aoaoga e fesoasoani ai i le tulaga o le ‘ava malosi o lo o a’afia ai o ia.

Na teena e Naea moliaga mama o le fa’atupu vevesi i nofoaga faitele ina ua tula’i i luma o le Fa’amasinoga Fa’aitumalo, ma faia ai loa e le afioga i le Tama’ita’i Fa’amasino ia Gwen Tauiliili-Langkilde le fa’aiuga e tatala ai o ia i tua e aunoa ma se tupe e totogi, e fa’atali ai le aso e toe tula’i ai mo le isi ana iloiloga.

Ae mo lana mataupu i luma o le Fa’amasinoga Maualuga, e mafua mai i lona le usisita o tuutuuga o lana nofovaavaaia, o le masina fou lea ua fa’atulaga e faia ai lana ulua’i iloiloga e tusa ai o lea mataupu.

MOLIA SE ALI’I I LONA FA’AOOLIMA I LONA TO’ALUA

E 35 tausaga o se ali’i e faigaluega i se konekarate Fau Fale i le atunu’u na taofia e Leoleo i le vaiaso na te’a nei, ona o tu’uaiga i lona fa’aoolima lea i lona to’alua e ala i lona fa’aaoga o ona lima e tatu’i ai ona foliga i luma o lana fanau.

O le leo tele o le e e a le fafine mo se fesoasoani na mafai ai ona lagona e aiga tuaoi le faalavelave o lo o tula’i mai i le aiga, na fa’afesootai ai loa le Ofisa o Leoleo i Fagaitua mo se fesoasoani. O le fa’alavelave na tula’i mai i Lauli’i.

Na faamatala e le fafine na a’afia i Leoleo e fa’apea, o le vevesi na mafua mai ina ua masalosalo lona to’alua, e sese le auala o lo o fa’aalu ai tupe a le aiga. E tele le tupe na tuu e le Tamaloa i lona to’alua mo fa’atauga o le vaiaso, ae oo atu i le aso Sa ua leai se meaai ona ua leai se tupe.

Na ‘ona mai le Tamaloa i le po o le aso Gafua ina ua manava mai lana galuega, ma amata ai loa ona faapisapisa, seia oo lava i lona faaoolima i lona to’alua.

Na teena e le ua moliaga o le faaoolima i le tulaga tolu ma le faatupu vevesi i totonu o lona aiga ua tuuaia ai o ia e le malo, ma ua faatulaga le isi ana iloiloga e toe faia i le amataga o le masina fou.

E $200 le tinoitupe lea ua fa’atulaga e totogi ona fa’atoa mafai lea ona tatala le ua molia i tua. Afai ae tatala o ia i tua, ua faasa ona ia toe taumafai e faafesootai lona to’alua ma lana fanau, ma ia saili fo’i se isi nofoaga e nofo ai a o fa’agasolo ai taualumaga o lana mataupu.

Ua matua poloaina o ia ina ia aua nei ona toe tagofia le ‘ava malosi poo fualaau fa’asaina, ma ia taumamao mai fo’i i lona toe mafuta atu i ana uo o lo o masani ona latou inupia fa’atasi.