Tala otooto o Fa’amasinoga

TOLUPO HODGES JR

Ua tuuina atu e le afioga i le ali’i Fa’amasino Sili ia Michael Kruse se lu’itau i le loia a le malo i le taimi na valaau ai le mataupu a Tolupo Hodges Jr i le vaiaso na te’a nati, atonu o le taimi lelei lenei ua tatau ai ona ave se fautuaga i le Fono Faitulafono, ina ia toe vaavaai i se teuteuga lelei i le Tulafono.

O le vaiaso na te’a nei na fa’atulaga ai le mataupu a Hodges Jr i luma o le Fa’amasinoga Maualuga, mo le tuuina atu o le fa’aiuga a le Fa’amasinoga ia te ia, i le mae’a ai lea ona faia o le faaiuga e aloaia ai lona le usitaia o tuutuuga o lana nofovaavaaia sa tuuina atu i le 2010.

Ina ua valaau le mataupu a Hodges Jr, na fa’ailoa e ali’i Loia mai itu uma e lua i le fa’amasinoga, o Hodges Jr o loo taofia i le falema’i i Faga’alu ona o se gasegase tuga o loo a’afia ai o ia.

Ao lei faia e Kruse le faaiuga e toe tolopo ai le mataupu a Hodges Jr seia aulia le aso 22 Iuni, sa ia faailoa ai i ali’i loia mai itu e lua, ina ia manatunatu i se tasi o mataupu o loo atugalu i ai le finagalo o le fa’amasinoga.

O ali’i loia e to’alua e aofia ai Woodrow Pengelly mo le itu a le malo, ma Michael White mai le ofisa o le loia fautua o lo o tula’i mo Hodges.

Saunoa Kruse e fa’apea, i le masina ua mavae, sa finau ai e le ali’i loia ia Douglas Fiaui le mataupu e fa’atatau i le malosi o le fa’amasinoga e fa’aleaoga ai tuutuuga o le nofovaavaaia a Hodges Jr.

Saunoa Kruse e fa’apea, o le fa’afitauli lea ua maitauina, e na o le 5 tausaga le umi lea ua tuuina mai e le Fono i totonu o le Tulafono e fa’anofovaavaaia ai se tagata. Saunoa atili Kruse e fa’apea, e le mafai e le fa’amasinoga ona faanofovaavaaia se tagata mo se taimi umi e sili atu i le 5 tausaga lea ua faatapula’a mai e le Tulafono.

“Tusa lava poo se tagata ua ta’usala i le fasioti tagata, e le mafai e le fa’amasinoga ona faanofovaavaaia lea tagata i le 15 tausaga, ona fai mai le Tulafono, e na o le 5 tausaga le umi e mafai ona nofovaavaaia ai le tagata,” o le saunoaga lea a Kruse.

Sa ia talosagaina ali’i loia ina ia tuu atu ni o la finagalo e tusa ai o lenei mataupu taua.

O le mae’a ai o le iloiloga faapitoa a Hodges Jr lea sa faia i le masina na te’a nei, na fa’amalieina ai loa le fa’amasinoga, ua le usitaia e lenei ali’i tuutuuga o lana nofovaavaaia sa tuuina atu i le 2010.

Na taua e le ali’i Leoleo sa molimau mo le malo e fa’apea, o le osofaiga sa faia i le ta’avale ma le fale a Hodges i le aso 18 Me, 2017, i lalo o se poloaiga mai le Fa’amasinoga, na latou maua ai le tele o mea e fa’aaoga e tagata e utu ai le pauta oona o le aisa e pei o pepa iila ma straw e ta tipi tulimanu, atoa ai ma se paipa tioata sa i ai vaega o le pauta i totonu.

O le iloiloga a Hodges Jr sa faia i le masina o Aperila na te’a nei, na tula’i ai le ali’i loia ia Fiaui mo ia. Na taua e Fiaui i lea iloiloga e fa’apea, o le tausaga e 2004 na mae’a ai le nofovaavaaia a Hodges Jr, ae o le osofaiga a Leoleo na fa’atoa faia lea i le 2017, tusa lea ua 3 tausaga talu ona mae’a lana nofovaavaaia.

TINO FA’AVI

O le ali’i e 29 tausaga le matua lea sa tuuaia i lona umia faasolitulafono o vaega o le pauta fa’asaina o le aisa, ua ia ta’utino i le fa’amasinoga e fa’amaonia tuuaiga fa’asaga ia te ia.

Na ulua’i tuuaia e le malo ia Fa’avi i le moliaga mamafa o le umia fa’asolitulafono o vaega o le pauta fa’asaina o le aisa. O lea moliaga e mafai ona faasala ai o ia i le toese mo le umi e le itiiti ifo i le 5 tausaga ae le sili atu i le 10 tausaga, pe faasala foi i le salatupe e le itiiti ifo i le $5,000 ae le sili atu i le $20,000.

Ae i lalo o se maliliega na sainia e Fa’avi ma le malo, lea fo’i ua talia e le fa’amasinoga maualuga, ua malie ai le ua molia e tali ioe i le moliaga muamua lea ua toe teuteu e le malo, le moliaga o le umia faasolitulafono o vaega o le pauta fa’asaina o le aisa.

O lea moliaga, e mafai ona fa’asala ai o ia i le toese mo le umi e le sili atui le 5 tausaga, pe faasala i le salatupe e le sili atu i le $5,000, poo faasalaga uma fo’i ia e lua.

I le tali ioe ai o Fa’avi i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le aso 7 Novema 2017 i Amerika Samoa, sa ia umia ai fa’asolitulafono se paipa tioata o loo i ai vaega o le pauta oona o le aisa i totonu.

O lo o taofia pea le ua molia i le toese ina ua le mafai ona totogi le $5,000 e fa’atali ai le aso 13 o Iuni 2018 lea ua fa’atulaga e lau ai lana fa’asalaga.

MAREKO TALALELEI

E 15 aso lea ua fa’asala ai e le Fa’amasinoga Fa’aitumalo le ali’i o Mareko Talalelei e taofia ai i le toese i Tafuna, ina ua fa’amaonia lona le usitaia o tuutuuga o lana nofovaavaaia sa tuuina atu i le tausaga na te’a nei mo le umi e 24 masina.

Ae mo moliaga mama fou e lua lea ua ta’usala ai o ia, o le faaoolima i le tulaga tolu atoa ai ma le fa’atupu vevesi i nofoaga faitele, ua fa’amalumalu e le fa’amasinoga lona tuliina o aso e 60 i le toese, fuafua lava i lona usitaia o poloaiga ua tuuina atu ia te ia.

O le masina o Fepuari o le tausaga nei na pu’e faapagota ai e Leoleo ia Talalelei ma molia i le fa’alavelave lea na tula’i mai i Tafuna, o se misa lea na alia’e mai i le va o ni tupulaga talavou.

Na tuuaia e le malo Mareko i lona fa’aoolima i se tasi o ali’i sa manu’a, atoa ai ma lona laulauvavale i nofoaga faitele.

Na faailoa e le afioga i le ali’i Fa’amasino ia Fiti Sunia ia Talalelei e fa’apea, na te toe solia loa se poloaiga a le fa’amasinoga, ona tapunia loa lea o soo se avanoa mo ia, ae tuuina atu loa o ia e taofia i le falepuipui mo se taimi umi.