Tala otooto o Fa’amasinoga

TEENA FA’AMASINOGA LE TALOSAGA A TITIFALAULA SIAUMAU

Ua teena e le Fa’amasinoga le talosaga na fa’aulu e le ali’i o Titifalaula Siaumau, mo se avanoa e toe fa’afo’i atu ai lana tupe e $10,000 i le fa’amasinoga e tatala ai o ia i tua, a o fa’atalitali ai le fa’aiuga o lana mataupu.

I le fa’aiuga na sainia e le afioga i le ali’i Fa’amasino Sili ia Michael Kruse, atoa ai ma ana fa’amasino lagolago ia Fa’amausili Pomele ma Muasau Tofili, sa latou taua ai e fa’apea, o le fa’aiuga ua latou faia, o lo o fa’avae lea i lalo o le talitonuga o le fa’amasinoga, e le i amanaia e Siaumau tuutuuga na tatala ai o ia i tua.

O Siaumau, o se ali’i sa galue mo le Ofisa o Tiute, o lo o tuli sona fa’asalaga fa’a falepuipui i le taimi nei, ina ua ta’usala o ia e le fa’amasinoga maualuga i le moliaga o lona aumaia fa’asolitulafono i Amerika Samoa o vaega o fualaau fa’asaina o le mariuana.

Na taua i le fa’aiuga a le fa’amasinoga e faapea, o se tasi o tuutuuga na tatala ai Siaumau i tua ina ua mae’a ona ia totogi le tupe e $10,000, ia auai i soo se taimi e valaau ai lana mataupu i luma o le fa’amasinoga.

I le aso 18 Aokuso 2017, na fa’atamala ai Siaumau i le tausiaina o lea tuutuuga, ina ua le auai o ia i totonu o le potu faamasino i le taimi na valaau ai lana mataupu. Na taua e lana loia sa i ai i lea taimi i le fa’amasinoga e fa’apea, sa la fesootai ma le Tama o Siaumau ma fa’ailoa i ai le aso o le iloiloga, sa ioe fo’i le Tama ma fa’amaonia atu ia te ia, o le a oo atu lona atali’i i luma o le fa’amasinoga.

Na taua atili fo’i e le tama’ita’i loia sa tula’i muamua mo Siaumau e fa’apea, sa ia toe taumafai fo’i e fa’afeso’ota’i Siaumau i le aso na sosoo ma le aso o lana iloiloga, peita’i na te le i mauaina o ia.

Ina ua le auai Siaumau i lana iloiloga i le aso lea, na sainia ai loa e le Fa’amasinoga se poloaiga e pu’e fa’apagota mai ai o ia, ma poloaina ai loa le taofi e le fa’amasinoga o le tupe na tatala ai o ia i tua, ina ia tusa ai ma le Vaega 46 o Tulafono  e fa’afoe ai galuega a le Fa’amasinoga.

Ui o lea, na toe oo atu lava Siaumau i le fa’amasinoga e  aunoa ma le pu’e fa’apagota e Leoleo, ma ia tali ioe ai loa i le moliaga o le aumaia fa’asolitulafono i Amerika Samoa o mariuana.

I le amataga o le tausaga lenei, na faila ai loa e Siaumau lana talosaga i le fa’amasinoga, mo se avanoa e toe fa’afo’i atu ai lana tupe o lo o taofia e le fa’amasinoga. O le iloiloga o lea talosaga sa faia lea i le aso 5 Aperila na te’a nei. E le i tete’e le malo i le talosaga a le ua molia ina ia toe fa’afo’i atu lana tupe.

I lalo o Tulafono ma Ta’iala e fa’avae ai galuega a le Fa’amasinoga, e tatau ona i ai se talosaga e finauina ai le toe fa’amatu’u atu o le tupe sa totogi pe afai ua taofi e le fa’amasinoga. Ae tatau fo’i i le fa’amasinoga ona faia lana fa’aiuga, e ala i le i ai o mau e fa’amaonia ai ua le tausisi le tagata molia i tuutuuga o le tatalaina o ia i tua.

“O le mea moni lava, ua fa’atamala Siaumau e usitaia tuutuuga o le tatalaina o ia i tua, atoa ai ma le leai o ni mau malolosi e lagolagoina ai lana talosagaina ia toe fa’afo’i atu lana tupe ua taofia e le fa’amasinoga. Sa tatau fo’i ona i ai se mafua’aga taua e fa’amalieina ai le fa’amasinoga e tatau ona toe fa’afo’i atu lana tupe”, o se vaega lea o le fa’aiuga a le faamasinoga.

“Ae i le taumafai ai o lana ulua’i loia e tau saili o ia ao lumana’i ai le aso o lana iloiloga, ua atagia mai ai i le fa’amasinoga le fa’atamala atoa ai ma le le manatu mamafa o le ua molia i tuutuuga o le tatalaina o ia i tua. O le mafua’aga lea ua faia ai le fa’aiuga ina ia teena le talosaga a Siaumau”.

LOIMATA MIKA

O lo o tau saili pea e le afioga i le ali’i Fa’amasili Sii ia Michael Kruse, pe na faapefea ona ulufale mai le ali’i o Loimata Mika i Amerika Samoa i le pemita e 7 aso le umi.

Na pau le ripoti na mafai ona maua mai e le Ofisa Faanofovaavaaia mai le Ofisa o Femalagaaiga, o Mika na ulufale mai i le pemita e 7 aso i le 2016. O le vaiaso na te’a nei na faia ai le ulua’i iloiloga o le faanofovaavaaia a Mika.

O Mika, o lo o tuli lona fa’asalaga fa’a falepuipui e 28 masina, o se tas lea o tuutuuga o lana nofovaavaaia e 7 tausaga, ina ua ta’usala o ia e le fa’amasinoga maualuga i le moliaga mamafa o le talepe fale i le tulaga lua.

O lea moliaga na mafua mai i le fa’alavelave lea na ia ulufale fa’amalosi ai i totonu o le fale o se aiga i Aua i le aso 1 Aokuso 2016, ma aga’i sa’o atu i totonu o le potu o lo o moe ai se tama’ita’i ma ia tago atu i lona vae. Na e e i luga le tama’ita’i ina ua ia fa’alogoina le tago atu o se tagata ia te ia, ma ia vaaia ai Mika o lo o tu i tafatafa o lona moega. Na tuli e le tama’ita’i Mika i fafo, ma sa ia usita’i fo’i i ai.

O tuutuuga o le tuliina o le fa’asalaga a Mika, a mae’a ona tuli masina e 20 o lana fa’asalaga fa’a falepuipui, ona toe iloilo lea e le fa’ amasinoga o lana nofovaavaaia. I lana iloiloga la sa faia i le vaiaso na te’a nei, na fautuaina ai loa e le Ofisa Faanofovaavaaia le fa’amasinoga ina ia taofia loa le tuliina e Mika o masina e 8 o lana fa’asalaga o lo o totoe, ae poloaina loa o ia na te tuua le atunu’u ma toe fo’i atu ai i Samoa.

Ua talia e le fa’amasinoga le fautuaga a le Ofisa Faanofovaavaaia, ma ua fa’atali nei le toe fa’afo’iina atu o Mika i Samoa i le taimi e mae’a ai ona totogi lona pasese.

Saunoa Kruse e fa’apea, o se tasi lenei o mataupu o lo o atugalu ai pea le fa’amasinoga, o le to’atele o tagata mai fafo e ulufale mai ma nonofo fa’asolitulafono i le atunu’u, sosoo atu ai lava ma le molia i le faia o solitulafono matuia.

O le isi itu e sili ona leaga ai lenei tulaga, o lo o alu tupe a le malo e tausi ma fafaga ai i latou nei i totonu o le falepuipui, ae leai ma se aoga o nei tagata i le faigamalo a Amerika Samoa.