Tala otooto o Fa’amasinoga

SAMUEL WRIGHT

O le aso 4 Novema 2016 lea ua toe tolopo i ai le iloiloga o le mataupu a le ali’i o Samuel Wright, ina ua talia e le fa’amasinoga maualuga le talosaga na fa’aulu e le itu a le malo, mo se avanoa e tu’u atu e tapena mai ai la latou tali tusitusia, e tusa ai o le talosaga lea ua fa’aulu e Wright ma lana loia, e talosagaina ai le fa’amasinoga mo sana poloaiga e fa’aleaoga lana fa’amasinoga iloilo ua mae’a ona fa’ataunu’u, ae toe fa’atulaga lelei se isi ana fa’amasinoga iloilo fou.

Na taua e le itu a Wright i luma o le fa’amasinoga maualuga i le vaiaso nei e fa’apea, o le talosaga ina ia toe faia se isi fa’amasinoga iloilo fou mo lenei mataupu, ona e i ai ni isi o fa’amatalaga fou fa’atoa latou  maua e uiga i le fa’alavelave sa tula’i mai, ma o ia fa’amatalaga fou e ono mafai ona fesoasoani i le latou itu i le aso o le fa’amasinoga.

E ui e lei i ai se tali tusitusia a le malo fa’asaga i le talosaga a le itu tete’e, peita’i na fa’aleo e le loia sa tula’i mo le malo e fa’apea, o se tasi o itu e tatau ona silasila toto’a i ai le fa’amasinoga, ua leva ona tuana’i le taimi sa tatau ai ona faila le talosaga a Wright, lea e 10 aso talu mai le aso na lau ai lana fa’asalaga, a o lenei fa’atoa faila ina ua tuana’i le tele o masina talu ona mae’a le aso na lau ai lana fa’asalaga.

O se tasi o molimau autu mo le itu a le malo, o le ali’i o Alatuna Simi lea na to’atolu i ai i latou sa molia ma ta’usala e le fa’amasinoga i lenei mataupu.

O isi ali’i e to’alua ua mae’a ona ta’usala e le fa’amasinoga maualuga, e aofia ai Wright ma le ali’i o Falefatu Asi lea na maliu i le 2 vaiaso talu ai, ina ua maua atu lona tino maliu o lo o ta’atia mai i totonu o le umukuka a pagota.

O Wright, Asi ma Simi, o lo o latou tuliina uma fa’asalaga e ta’i 15 tausaga i le toese i Tafuna.

ALOSIO TAULA

Ua talia e le ali’i o Alosia Taula tu’uaiga a le Ofisa Nofovaavaaia fa’asaga ia te ia, ua ia le usitaia tuutuuga o lana nofovaavaaia sa tu’uina atu e le fa’amasinoga maualuga i le 3 tausaga talu ai, na te totogi le salatupe e $1,000 atoa ai ma le toe totogiina lea o le silia i le $300 mo meatotino a le aiga na a’afia, lea sa fa’aleagaina ona o lana solitulafono.

Na taua i le ripoti a le Ofisa Nofovaavaaia ua i luma o le fa’amasinoga, talu mai le taimi na lau ai le fa’asalaga a Taula, na te le i totogiina lava se vaega o le salatupe fa’apea ai ma le tupe e toe totogi ai meatotino a le aiga na fa’aleagaina i lana solitulafono, ae o isi ia tuutuuga a le fa’amasinoga na tu’uina atu ia te ia e usita’i i ai.

E pei ona masani ai le fa’amasinoga, soo se taimi e fa’amaonia ai ua le usita’i se tagata molia i poloaiga a le fa’amasinoga, e leai lava se fa’aiuga e toe faia i ai, ae poloaina loa le toe taofia o lea tagata i le toese i le falepuipui.

Na taua e le Loia Fautua mo tagata lautele ia Douglas Fiaui i luma o le Komiti o Mataupu Tau Fa’amasinoga a le maota o sui i le lua vaiaso talu ai e fa’apea, o se tasi lenei o mafua’aga ua ia manatu ai ina ia tu’u eseese le Vaega o Fa’amasinoga ma le Ofisa Nofovaavaaia, ina ia mautinoa e Tuto’atasi le Ofisa Nofovaavaaia mai le faia o ana fa’aiuga, nai lo le fa’alagolago i ai o le fa’amasinoga mo fa’aiuga ma fa’asalaga.