Tala otooto mai le Fono Faitulafono

TO’ATELE FA’ASEA MAUALUGA O LE TAU O LE ELETISE

O le to’atele ai o le atunu’u ua fa’asea i a latou Senatoa ma Faipule i le suiga fa’afuase’i ua i ai le tau o le eletise i le taimi nei, na mafua ai ona talosagaina e ni isi o afioga i Faipule se iloiloga ma le Pulesili o le Pulega a le Eletise ma le Suavai (ASPA), mo le fa’amaninoina o lenei mataupu.

Na taua e ni isi o afioga i Faipule i le vaiaso na te’a nei e fa’apea, o fa’asea mai tagata o a latou itumalo, o lo o mafua mai lea i le si’i fa’afuase’i o le totogi mo le kilouati o le eletise, ae aunoa ma se fa’asalalauga mai le ASPA e fa’atatau i nei suiga.

O ni isi o le atunu’u na fa’asea i a latou sui o lo o i le Fono Faitulafono, ae o isi na ave sa’o lava a latou fa’asea i le ofisa o le ali’i kovana.

Na taua e le Pulesili o le ASPA, afioga i le matua ia Utu Abe Malae i se iloiloga sa valaauina e le Komiti o le Eletise ma le Suavai a le Senate i le vaiaso na te’a nei, e le o i ai se siitaga fou ua faia e le ASPA i le pili o le eletise poo le suavai fo’i.

Na ia taua le tumau pea o le tau o le kilouati o lo o i ai i le $0.29, ae le o le $0.40 e pei ona taua e ni isi o fa’asea a le atunu’u.

E i ai le talitonuga o ni isi o mafuaaga e manatu ai le au totogi pili ua sili le tau o le eletise, pe afai e tuai ona totogi a latou pili, ona o mai fa’atasi lea o pili mo masina e 2, ma manatu ai loa le atunu’u ua i ai le siitaga ua faia ona o le maualuga o le aofa’i o le pili o lo o tuuina atu i le lisiti, ae le iloa o lo o tumau pea lava le totogi e le o suia.

TAOTO PILI A LE SENATE SII AI TOTOGI O UTA LUGA O LE UAFU

Ua aloaia nei e le Komiti o Fela’uaiga/Pulega o Taulaga ma Malaevaalele a le Senate se faaiuga, ina ia taoto ai pea i le Komiti le pili tupe sa talosagaina e le faigamalo a Lolo ma Lemanu e sii ai totogi o oloa i luga o le uafu seia i ai se isi taimi.

O lea fa’aiuga na faia lea ina ua mae’a ona fa’afofoga le Komiti i molimau mai sui o ni isi o le aufai pisinisi, lea sa latou taua ai le tele o se a’afiaga o pisinisi pe afai ae pasia suiga o totogi o tautua e pei ona talosagaina e le malo.

O le iloiloga sa taitaia lea e le afioga i le Ta’ita’i Komiti, afioga i le ali’i Senatoa ia Paepae Iosefa Faiai.

O le itu sa mafuli i ai finagalo o le Komiti, pe na maua se avanoa e fetufaa’i ai sui o le Pulega o Taulaga ma Malaevaalele ma sui o le aufai pisinisi e uiga i nei siitaga. O molimau e pei ona tuuina atu i luma o le Komiti, sa faia ni fonotaga a le Ofisa ma i latou uma o lo o fa’aaogaina le tautua i luga o le uafu i le 2015 ma le 2016, e talanoaina ai suiga e pei ona fuafuaina e le malo i le taimi nei.

Na taua e sui o ni isi o pisinisi tetele i le atunu’u e faapea, na pau le tulaga sa talanoaina i fonotaga e 2 e pei ona taua, o le fuafuaga lea a le malo ina ia siitia totogi o tautua i luga o le uafu, ona ua silia i le 30 tausaga e le o faia lava se siitaga, ae lei fa’ailoaina le maualuga ua fuafua le malo e si’i aga’i i ai.

Na manino i molimau a sui o le aufaipisinisi, le maualuga tele o le tau fou ua fa’atulaga e le malo. O le popolega o le aufai pisinisi, ina ne’i avea le maualuga o le siitaga ua fuafuaina e le malo ma itu e a’afia ai pisinisi, ae sili ai ona pagatia ai le atunu’u ma tagata fa’atau.