Tala otooto mai le Fono Faitulafono

TELE PEA LU’ITAU FETAIA’I MA LE LBJ I LE ITU TAU TUPE

E ui o lo o tulaga lelei pea lava le fa’atinoina o le tautua a le Falema’i a le malo, le LBJ mo le atunu’u i le taimi nei, peita’i o lo o tumau pea le i ai o lu’itau i le itu tau tupe o lo o taumafai pea i latou e saili se auala e foia ai.

O se tasi lea o itu sa mafai ona molimauina i le iloiloga sa faia i luma o le Komiti o le Soifua Maloloina/LBJ a le maota o sui i le vaiaso nei, lea na maua ai le avanoa e molimau ai sui o le Pulega a le Falema’i i Faga’alu.

Na taua e le Pulesili o le Falema’i ia Faumuina Taufete’e J. Faumuina e fa’apea, o lo o fa’aauau pea galuega a le Falema’i e pei o le aoina mai lea o aitalafu tuai i totonu, atoa ai ma le taumafai ina ia ao mai tupe ua tatau ona maua mai i tautua ua mae’a ona fa’atinoina, ina ia mafai ai ona fa’aauau pea le tautua a le Falema’i mo le atunu’u.

O lo o tulaga lelei pea le tautua a foma’i i le taimi nei, o lo o galulue fa’atasi ma le Asosi o Tausima’i i le sailiina lea o auala e ofoina atu ai tautua talafeagai mo le atunu’u.

O se tasi o itu na fesiligia e le Taitaifono o le Komiti a le maota o sui, afioga Vesi Talalelei Fautanu Jr, o le tulaga lelei o lo o i ai le tautua a foma’i mo le atunu’u, ona o lo o i ai lava ni isi o fa’asea i le fa’aletonu lea o le tautua a foma’i ni isi o taimi.

Saunoa Faumuina e fa’apea, e le mafai ona fa’aleleia le tautua a le Falema’i pe afai e le lava le itu tau tupe.

O lea ua fuafua le malo e aveese le lafoga o totogi e 2% sa maua ai se vaega tupe fesoasoani mo le falema’i. Ae na taua e Faumuina e fa’apea, o lo o i ai le fa’amoemoe e tatau ona maua se fesoasoani mo le falema’i i le itu tau tupe, pe afai ae pasia e le Fono Faitulafono ni isi o pili tupe a le faigamalo, ina ia maua ai se isi vaega tupe fesoasoani mo le falema’i a le atunu’u.

Na fa’afetaia e afioga i Faipule le tautua a le Falema’i, atoa ai ma fautuaga ina ia tautuana le tautuaina o le atunu’u, aemaise lava togafitiga mo tagata gasegase, ina ia aua ne’i faapito le alofa a ia tutusa tagata uma.

FESILIGIA SIITAGA I SIAKI A TAGATA LITAEA

O le aso Lua o le vaiaso fou lea ua fa’atulaga ai le iloiloga a le Komiti o le Litaea a le maota o sui, ma sui o le Komiti o le Litaea a le malo, mo le fesiligia o le mataupu e fa’atatau i talosaga mai ni isi o tagata o lo o tali a latou litaea, mo se avanoa e faaopoopo ai ni vaega tupe mo a latou siaki o le litaea o lo o tali i le taimi nei.

O le afioga i le ali’i faipule ia Vailoata E. Amituana’i, o ia fo’i lea o le ta’ita’ifono o le Komiti a le maota o sui, o le a ia faafoeina lenei iloiloga.

O le afioga i le ali’i faipule ia Samuel Meleisea na ia fa’aleoina lenei mataupu i luma o le maota o sui i le taeao ananafi.

Na taua e Maleisea e fa’apea, ua to’atele ni isi o lona itumalo ua talosaga atu mo se avanoa e mafai ai ona faaopoopo vaega tupe o lo o latou maua mai le litaea, ina ia fesoasoani ai i le tulaga maualuga ua i ai le taugata o le soifuaga ua i ai i le taimi nei.

Sa ia taua atili e fa’apea, o lo o silafia lava e i latou o lo o tali a latou litaea tulaga pagatia ua i ai le tamaoaiga o le malo i le taimi nei, atoa ai ma le maualuga o le tau o le soifuaga, peita’i, o lo o latou faamoemoe fo’i ina ia mafai ona fesoasoani atu le Litaea ia te i latou, ina ia maua ai sina fesoasoani mo latou aiga.