Tala otooto mai le Fono Faitulafono

PASIA FAIPULE IA GAISOA AVEA MA TOTINO KOMITI LITAEA

E 12-0 le palota fulisia na pasia ai e le maota o sui i le taeao o le aso Lua na te’a nei, tofiga a le kovana mo le susuga ia Frank Gaisoa, e avea ai o ia ma totino o le Komiti Fa’afoe a le Ofisa o le Litaea a le malo.

O lea fa’aiuga na faia ina ua mae’a se iloiloga e le atoa se 10 minute le umi na fa’atautaia e le Komiti o le Litaea a le maota o sui, e fesiligia ai agava’a o le susuga a Gaisoa e tusa ai o lenei tofiga. O le afioga i le taitai komiti ia Vailoata E. Amituana’i na taitaia le iloiloga.

Na fa’ailoa e Vailoata i le komiti e fa’apea, o le susuga a Gaisoa, o le sui lea o le aufaipisinisi a le atunu’u i totonu o le Komiti Fa’afoe, e sui tulaga i le susuga a Beaver Ho Ching ua fa’amavae, ona o tofiga fou a le Ekalesia e pei ona valaaulia o ia e galue ai i Apia.

Saunoa le sui fofoga fetalai ia Fetui Fetu Jr e fa’apea, o Gaisoa, o se tasi lea o tagatanu’u o Amerika Samoa ua loa lana tautua i tulaga tau pisinisi. E i ai le talitonuga ua lava lona silafia i tulaga o galuega a le malo, e pei ona galue ai ni isi o Komiti Fa’afoe.

Na fautuaina e Vailiuama S. Leasiolagi ia Gaisoa ina ia silasila toto’a i le tuuina mai o fa’asalalauga e fa’atatau i nonogatupe a le litaea, e le o logo malie i le fa’afofoga a le atunu’u.

Saunoa atili Vailiuama e faapea, e le fa’apea na te tete’e i le faia o nonoga tupe a le malo mai tupe a le litaea, ae o le itu o lo o fa’aletonu, e foliga mai e le o lelei ona aumai e le Ofisa o le Litaea i fafo, fa’amatalaga sa’o e fa’amanino ai i le atunu’u tulaga o nonogatupe a le malo.

I lona taofi, e tatau i le Ofisa o le Litaea ona fa’ailoa mai i le atunu’u, o lo o mae’ae’a pea lava ona toe totogi nonoga tupe a le malo. E le gata i lea, ia silafia e le atunu’u, e sili ai le inivesi o tupe a le litaea i totonu lava o le atunu’u nai lo le auina atu i maketi i fafo.

O le mae’a ai o finagalo fa’aalia fa’asaga i le molimau, na fa’atula’i ai loa e le afioga Veevalu Meauta Lauoi Mageo le mau ina ia fa’aagafua le molimau.

O le aso Faraile o le vaiaso nei lea ua fa’amoemoe e fesiligia ai e le maota maualuga le suafa o Gaisoa, e tusa ai o tofiga a le ali’i kovana.

PASIA SENATE PILI SUIA AI TULAFONO O LESITALA MO SOLITULAFONO

Na fulisia finagalo o afioga i Senatoa e ala i le palota e 12-0 e pasia ai le pili na talosagaina e le faigamalo a Lolo ma Lemanu, e suia ai le Tulafono o le Lesitala ma le Faailoa o le tagata solitulafono i tulaga tau feusuaiga.

O le tulafono lenei na pasia i le nofoaiga a le Fono Faitulafono i le 2014, ae o se suiga i le gagana o le tulafono, ua mafua ai ona toe tuuina atu i le Fono mo le pasiaina o suiga.

O le agaga o le tulafono e pei ona pasia i tausaga ua mavae, ua mafai ai ona fa’aitiitia i le 10 tausaga le taimi e lesitala ai igoa o i latou e soli le vaega o le tulafono, e pei o le faia o amioga mataga i fanau laiti.

O lenei suiga o le a fa’ataga ai le malo e fa’aauau pea ona latou vaavaaia tagata ua mae’a ona lesitala o latou igoa, i latou sa fa’atinoina solitulafono mamafa.