Tala otooto mai le Fa’amasinoga

MOLIA SE ALII FAIGALUEGA I LE GAOI

Ua molia nei e le malo i le gaoi se alii e faigaluega i se Kamupani e lolomi ai laei (Printing Company) i totonu o le atunu’u, e mafua mai i le fa’alavelave lea ua tu’uaia ai o ia i lona ave faagaoi o ni miti afu se 8 mai le kamupani o loo galue ai.

O le vaiaso nei na tula’i ai Apelu Pati i luma o le Fa’amasinoga Faaitumalo ma ia teena ai le moliaga o le gaoi e pei ona tu’uaia ai o ia. Na teena e le Tama’ita’i Fa’amasino ia Gwen Tauiliili-Langkilde le talosaga a lana loia ina ia tatala o ia i tua e aunoa ma se tupe e fa’atulaga.

E $100 lea ua fa’atulaga e totogi ona fa’atoa mafai lea ona tatala Pati i tua e fa’atali ai taualumaga o lana fa’amasinoga.

Na taua i le tagi a le malo e fa’apea, o le faaiuga o le vaiaso na te’a nei na aga’i atu ai le Pule o le Kamupani i le Ofisa o Leoleo i Fagatogo ma ripoti i ai le mataupu e fa’atatau ia Pati, i lona gaoia lea o ni mitiafu ua maea ona lolomi mo le toniga a se tasi o au va’a mo le tuuga fautasi o le fu’a i lenei tausaga.

Na taua e le malo i le latou tagi e fa’apea, o se tasi o tagata faigaluega na ia iloaina Pati o loo ia nana se miti afu i le taimi na mavana ai. Ina ua iloa e Pati ua maua e le tagata faigaluega lana gaioiga, sa ia tago loa ma toe fa’apau i lalo le mitiafu. Ae ina ua siaki e le to’alua o le Pule masini pu’eata i totonu o le faleoloa, na iloa ai e tele isi mitiafu na alu le ua molia ma ave.

E $19.99 le tau o le mitiafu e tasi, ae $159.92 le tau o mitiafu e 8 ua tu’uaia Pati na ia gaoia mai le kamupani o loo galue ai.

FAATONU E LE FA’AMASINOGA SE AU USO E TUUA LE TERITORI

O le au uso mai Samoa lea na ta’usala e le Fa’amasinoga Faaitumalo i le moliaga mama o le fa’atupu vevesi i nofoaga faitele, ua poloaina i laua e tuua vave loa le teritori ae toe fo’i atu i Samoa, ina ua faamaonia tulaga faaletonu i o la pepa nofomau.

E ta’i 24 masina lea ua fa’anofovaavaaia ai e le fa’amasinoga le alii o Anetone Leota ma lona uso o Jordana.

O Anetone na ulufale mai i se pemita e 30 aso i le aso 21 o Iuni 2018, ae o lona uso o Jordana na ulufale mai i se pemita e 30 aso i le aso 14 o Iulai 2016. Ina ua ulufale mai i laua i le atunu’u, sa fa’aauau ai lava ona la aumau iinei e ui ua leva ona mae’a le aoga o pemita na malaga mai ai.

I le ta’usala ai o i laua nei i le moliaga o le faatupu vevesi i nofoaga faitele, na ta’utino ai i laua nei e fa’apea, i le aso 18 o Ianuari o le tausaga nei, sa la auai i se vevesi na mafua mai i se inugapia i totonu o le nu’u ma le latou aiga, ma i’u ina faaleagaina ai meatotino a le aiga ma nisi o aiga tuaoi.

Ua poloaina e le afioga i le ali’i Fa’amasino ia Elvis P. Patea i laua nei ina ia tuua vave le atunu’u i le taimi e mae’a ai ona totogi a laua pasese, e le mafai ona la toe taumafai e ulufale mai i le teritori.

LOMA TALITIGA

O le masina fou o Me lea ua fa’atulaga e lau ai le fa’asalaga a le ali’i o Loma Talitiga, ina ua ta’usala o ia e le fa’amasinoga maualuga i le moliaga mamafa o le gaoi.

I le talia ai e le fa’amasinoga o le tali ioe a Talitiga i le moliaga o le gaoi, i lalo o se maliliega sa latou sainia ma le malo, na solofua ai loa e le fa’amasinoga ma isi moliaga o lo o totoe ai i le pepa o tagi sa fa’aulu e le malo.

I le tali ioe ai o Talitiga i le moliaga e pei ona ta’usala ai o ia, sa ia ta’utino ai e fa’apea, i le aso 10 o Tesema 2017, sa ia osofaia ai se fale i Utulei ma ave faagaoi ni meatotino sa i totonu.

Na ta’utino atili Talitiga e fa’apea, o mea totino sa ia gaoia e aofia ai ni lavalava, pea seevae, o filifili auro ma se uati, o se laptop atoa ai ma se tino i tupe e $321 sa i luga o le laulau i totonu o le potu.

Na taua e se molimau i Leoleo lona vaaia o Talitiga ua oso i totonu o le fale i se taimi o le aoauli, ma se ato fa’a fafa lanumeamata. E le i umi ae toe vaaia e le molimau le toe aga’i mai o Talitiga i fafo ma lana ato ua tumu mai, ae na te le o iloa atu poo a mea o loo i ai i totonu o le ato..

E leai ma se meatotino na mafai ona toe fa’afo’i ina ua maua e Leoleo le ali’i o Talitiga i le tuana’i ai o aso e 2 talu ona mae’a le osofaiga. Ua talosaga le malo i le fa’amasinoga ina ia faasala le ua molia i se faasalaga faanofovaavaaia, atoa ai ma lona toe totogiina o le tupe e $1,421, o le tau lea o meatotino sa ia gaoia mai le fale o le aiga na a’afia i Utulei.

O loo taofia pea Talitiga i le toese i Tafuna ina ua le mafai ona ia totogi le $10,000 sa fa’atulaga e tatala ai o ia i tua.

TAFITO LEVAULA

O le alii pagota lea na tu’uaia i lona sola ese mai le toese i Tafuna, ao taofia ai e faatali ai le faaiuga o le mataupu o loo tuuaia ai o ia i le gaoi ma le talepe fale, ua ia ta’utino i le fa’amasinoga e fa’amaonia tu’uaiga fa’asaga ia te ia.

O le vaiaso na te’a nei na tula’i ai Tafito Levaula i luma o le fa’amasinoga mo le fofogaina o le latou maliliega ma le malo.

E 3 tagi eseese na tuuaia ai e le malo ia Levaula. I le tagi muamua, o loo tuuaia ai Levaula i le moliaga o le gaoi. I le tagi lona lua, o loo tuuaia ai o ia i le moliaga o le gaoi, 3 moliaga o le talepe fale i le tulaga muamua, faapea ai le moliaga o le sola ese mai i Leoleo ao taumafai e pu’e faapagota o ia.

I le tagi lona tolu, o loo tuuaia ai Levaula i le moliaga o le sola ese mai le toese a o taofia faapagota ai o ia.

I lalo o se maliliega ua sainia e Levaula ma le malo, ua tali ioe ai le ua molia i le moliaga o le gaoi ma le talepe fale i le tulaga muamua. I le tali ioe ai o Levaula i ia moliaga, sa ia ta’utino ai e fa’apea, i le masina o Novema o le tausaga e 2017, sa ia osofaia ai ni faleoloa se 3 ae gaoi ni oloa mai totonu e silia i le $100 lo latou tau.

O oloa na gaoia e Levaula e aofia ai i telefoni feavea’i fou, o masini laptop, o ato telefoni, faapea ai ma isi lava totoga o masini e alu i le uila. O loo finau le malo, e tusa ma le $5,000 le tau aofa’i o meatotino na gaoi e le ua molia, ma e leai ma se meatotino na mafai ona toe maua e le malo.

O le aso 31 o Me lea ua fa’atulaga e lau ai le fa’asalaga a le ua molia, ma o lo o taofia pea o ia i le toese i Tafuna e fa’atali ai le aso e lau ai lana fa’asalaga.