Tala otooto mai le Fa’amasinoga

FAAI’U I LE FALEPUIPUI LE VEVESI A SE AIGA MAI FALENIU

Na fa’ai’u i le Toese i Tafuna le vevesi na tula’i mai i se aiga i Faleniu, e mafua mai ona o le fale a se tasi o aiga o loo fausia i luga o le fanua. O i latou e to’a 5 na taofia e Leoleo i le Toese, na toe tatala uma i latou i tua ina ua mae’a a latou ulua’i iloiloga i luma o le afioga i le ali’i Fa’amasino ia Fiti Sunia i le taeao o le aso Lulu na soso’o ai.

O i latou e to’a 5 na taofia e Leoleo e aofia ai se Tama e 75 tausaga ia Kuiinise Moea’i, Fuefueali’i Taalili, Romas Napoleone, Lavina Fruean ma Malologa Heather. Ua tu’uaia nei e le malo i latou nei i moliaga mama ta’i 2 o le fa’aoolima i le tulaga tolu ma le fa’atupu vevesi i nofoaga faitele.

O le tama’ita’i Loia Fautua lagolago ia Anna Wells na tula’i mo i latou nei, ae o le tama’ita’i Loia Sili lagolago ia Laura Garvey na tula’i mo le itu a le malo.

O ni isi o tuutuuga ua tatala ai nei i latou e to’a 5 e aofia ai le tausia o le filemu i totonu o le aiga, aua ne’i toe taumafai e fa’afesoota’i i latou na a’afia i lenei mataupu, a ia avea i latou ma tagatanu’u e tausi i tulafono a le malo i taimi uma, ma ia auai i soo se taimi e valaau ai a latou mataupu.

O le itula e 12:36 i le aoauli o le aso Lua o le vaiaso nei, Oketopa 23, 2018 na maua ai e le Ofisa o Leoleo i Tafuna se telefoni mai le susuga a Kuinise Moea’i (o se tasi o loo molia i lenei mataupu), mo se fesoasoani a Leoleo e fa’ato’a filemu ai le mataupu o loo tula’i mai i le aiga o Moea’i i Faleniu.

E le i umi ae taunu’u Leoleo i Faleniu mo le fa’afilemuina o le vevesi, ma maua ai le avanoa o Leoleo e talanoa ai ia Moea’i e tusa ai o lona valaau atu.

E le gata na fesiligia e Leoleo ia Moea’i, ae sa fesiligia fo’i i latou uma na a’afia i lenei mataupu, ma mafai ai loa e Leoleo ona maua le avanoa e malamalama ai i le autu moni o le fa’alavelave, atoa ai ma le mea tonu sa tula’i mai i le lotoifale o le aiga.

I suesuega a Leoleo na latou maua ai e fa’apea, o le vevesi na amata mai ina ua savali atu Moea’i ma talanoa ia Lavina Fruean e taofi le galuega o lona maota fou o loo fausia i luga o le fanua o le aiga. E lei talia e Fruean ia Moea’i i ni vai, ae sa ia fa’ailoa i ai e fa’apea, o le fautuaga a lana Loia, e le taofia le galuega se’i vagana ua tuuina atu se poloaiga mai le Fa’amasinoga.

Na toe savali Moea’i i lana ta’avale ma sau ai ma pepa o loo uu mai i lona lima. O le taimi lea na fai atu ai loa Moea’i ia Fruean, o ia lea ua mafua ai le tele o vevesi o loo tutupu i le aiga. O le taimi lea na tago atu ai loa Moea’i ua uu le auvae o Fruean.

Na iloa mai e Malologa Heather le gaioiga a Moea’e, ma savali mai ai loa Heather ma tu’i Moea’i. O iina na amata fa’ateteleina ai loa le vevesi i le va o le aiga o Moea’i, ina ua iloa mai e Romas Napoleone le taimi na tu’i ai e Heather ia Moea’i, ona ia savali mai ai loa lea ma faaoolima ia Fruean.

E lei talia e Fruean gaioiga a Napoleone i ni vai, ae sa ia fa’asaga atu i le falai ma ta ai Napoleone, ma fa’aauau ai lava le tauiviga a tama’ita’i nei e to’alua o Napoleone ma Fruean seia oo ina ta’afifili i lalo i le mutia.

Na savali mai le Tina a Napoleone ia Fuefuealii Taalili ma fela’u foliga o Fruean ma mafua ai ona i ai maosia i foliga o Fruean. Ina ua fesiligia e Leoleo ia Taalili, sa ia teena lona fela’uina o foliga o Fruean, ae sa ia taua lona taumafai e taofi le vevesi na tula’i mai i le va o Napoleone ma Fruean.

O le masina fou lea ua fa’amoemoe e toe valaau ai le mataupu a i latou nei e to’a 5 i luma o le Fa’amasinoga Fa’aitumalo.

HERBERT SCHUSTER

O le ali’i lea na ia lafo upu palauvale i lona aunty ma lona to’alua, ua fautuaina o ia e le afioga i le ali’i Fa’amasino ia Fiti Sunia ina ia tausi le filemu i totonu o lona aiga.

Na loka e Leoleo le ali’i o Herbert Schuster ma tuuaia o ia i le fa’atupu vevesi i nofoaga faitele, e mafua mai i se faalavelave na tula’i mai i le va o ia ma lona aunty i Faleniu. E pei ona taua i le ripoti a Leoleo e fa’apea, o le vevesi na amata mai ina ua ta e le tuafafine a Schuster i lalo le laau sa nonoa ai le uaea e tautau ai tagamea a lona aunty.

Sa taumafai le aunty e talanoa ia Schuster mo se avanoa latou te soalaupule ai le fa’afitauli ma toe teuteu le vevesi i le o matua ma fanau, peita’i na fa’ateia le aunty ina ua lafo atu e Schuster upu palauvale ia te ia ma lona to’alua, e ala i le fa’aaoga e le ua molia o lana masini fa’aleotele leo e fa’atino ai lona vaivai.

O le masina fou lea ua fa’amoemoe e toe valaau ai le mataupu a Schuster, ae ua fautuaina o ia e le fa’amasinoga ina ia tausi le filemu i totonu o lona aiga.

UILI TEA

O le ali’i mai le vaega a le Magic Circus of Samoa lea na loka e Leoleo i le vaiaso na te’a nei ona o tu’uaiga i le fa’atupu vevesi i nofoaga faitele, ua fa’amoemoe le malo e tatau ona fa’amae’a lana mataupu i le vaiaso nei, ma fa’atulaga ai loa le toe fa’afo’i atu o ia i Samoa.

O le ali’i o Uili Tea, o se tasi o sui o le vaega a le Magic Circus of Samoa na malaga mai mo a latou fa’afiafiaga i le atunu’u, ae loka ai e Leoleo i le vaiaso na te’a nei ina ua ‘ona ma fa’atupu vevesi solo i nofoaga faitele i Nuuuli. O lana gaioiga na mafua ai ona manu’a se tamaititi e 9 tausaga le matua.

O lo o taofia pea Tea i le toese i Tafuna e fa’atali ai lana iloiloiga lea ua fa’atulaga e faia i le taeao nei.

O faamaumauga ua i luma o le fa’amasinoga o loo taua ai e fa’apea, o Tea na ulufale mai i le pemita e 30 aso, ma o loo lelei pea lea pemita fa’atoa mae’a le aoga i le masina fou.

O se tasi o tuutuga lea ua sauni le malo e faia ma Tea, o lona tali ioe lea i le moliaga o le faatupu vevesi i nofoaga faitele, ma le tuutuuga na te tuua le teritori, e le mafai ona toe ulufale mai mo le isi tausaga atoa.