Tala otooto mai le Fa’amasinoga

TOE FA’AMALOSIA TUUTUUGA FA’ASAGA ALI’I FAIA UIGA MATAGA

Na toe fa’amalosia e le fa’amasinoga maualuga poloaiga sa tu’uina atu e le fa’amasinoga fa’aitumalo, fa’asaga i le ali’i pe a ma le 50 tausaga le matua lea o lo o tu’uaia i lona toe faia o ni uiga mataga i lona lava afafine moni.

O le taeao ananafi na tofu atu ai i luma o le fa’amasinoga maualuga le mataupu a lenei ali’i, lea fo’i na ia teena ai moliaga o lo o faia fa’asaga ia te ia, ma fa’atulaga ai loa e le fa’amasinoga maualuga lana ulua’i iloiloga e faia lea i le aso 4 Novema.

O tu’utu’uga na toe fa’amalosia e le fa’amasinoga maualuga fa’asaga i le ali’i ua molia, e aofia ai le matua fa’asaina lea ona ia toe taumafai i soo se auala e fa’afeso’ota’i lona afafine na a’afia i lana solitulafono, poo se tasi fo’i o lona aiga, ma ia saili se isi nofoaga mamao e nofo ai pe afai e mafai ona totogi le tupe e $20,000 lea ua fa’atulaga e tatala ai o ia i tua.

O moliaga o lo o tu’uaia ai e le malo le ua molia e aofia ai moliaga mamafa e 4 o lona tagofia lea o itutinosa o se teineititi e laititi i lalo o le tulafono, lea e mafai ona fa’asala ai se tasi i le toese mo le umi e le silia i le 5 tausaga, po o le fa’asala fo’i i se salatupe e le silia i le $5,000, fa’apea ai ma le moliaga mama e tasi o lona faia lea o ni gaioiga e ono lamatia ai le saogalemu o fanau laiti.

E le i mana’o le ua molia e fa’ataunu’u lana ulua’i iloiologa lea e tatau ona fa’ataunu’u i luma o le fa’amasinoga fa’aitumalo, ae ua ia manatu e tu’u sa’o atu loa lana mataupu i luma o le fa’amasinoga maualuga e fa’atulaga ai se aso e faia ai lana fa’amasinoga autu, poo le faia fo’i lea o se maliliega ma le malo ma fa’amuta ai loa lenei mataupu.

O lo o taofia pea le ua molia i le toese i Tafuna e fa’atali ai le aso lea ua fa’atulaga e toe valaau ai lana mataupu i luma o le fa’amasinoga maualuga.

ALFRED FILIMAUA

Ua finagalo malie le fa’amasinoga e fa’aaoga aso e 35 lea na taofia ai le ali’i o Alfred Filimaua i le toese i Tafuna, e fai ma ana fa’asalaga i le mataupu lea ua ta’usalaina ai o ia, ae o le a fa’anofovaavaaia o ia i lalo o tuutuuga e ao ona ia usita’i i ai.

O moliaga e lua ua ta’usala ai Filimaua e le fa’amasinoga, e aofia ai le moliaga o le fa’ao’olima i le tulaga tolu, fa’apea ai ma le moliaga o lona le usitaia lea o tuutuuga o lana nofovaavaaia, ina ua fa’amaonia lona toe solitulafono ae o lo o fa’anofovaavaaia o ia.

O se inugapia i le va o Filimaua ma ni isi o ana uo, na tula’i mai ai le fa’alavelave lea na mafua ai ona taofia o ia e leoleo, ina ua ia fa’ao’olima i le ali’i na a’afia ma manu’a ai lona ulu.

O le masina Fepuari o le tausaga nei na ta’usala ai Filimaua i le moliaga mama o le fa’aoolima i le tulaga tolu, ma nofovaavaaia ai loa o ia e le fa’amasinoga i lalo o tuutuuga e ao ona ia usita’i i ai, e aofia ai le fa’asa lea ona ia toe solitulafono.

Na talia e le fa’amasinoga fautuaga a loia ina ia fa’aaoga aso ua mae’a ona tuli e le ua molia i le toese e fai ma ana fa’asalaga i lenei mataupu, a ia toe faaopoopo ni isi tuutuuga o lana nofovaavaaia.

O ni isi o tuutuuga o le nofovaavaaia a Filimaua ua toe teuteu e le fa’amasinoga mo le umi e 18 masina, e aofia ai le matua faasaina lea ona ia toe tagofia le ava malosi, fa’asa ona ia toe soli se tulafono, ma ia auai i ni aoaoga fa’a faufautua e fa’atatau i le leaga o le ‘ava malosi ma le ita.