Tala otooto mai le Fa’amasinoga

PATI JENNINGS

O le aso 26 Novema lea ua fa’atulaga e le fa’amasinoga e faia ai le ulua’i iloiloga o le mataupu a le ali’i o Pati Jennings, i le mae’a ai lea ona faila e le Ofisa Fa’anofovaavaaia o sa latou talosaga i le fa’amasinoga mo se poloaiga e fa’aleaoga ai tuutuuga o le nofovaavaaia a Jennings na tuuina atu i le tausaga e 2014, ona o lea ua ia le tausisia tuutuuga o lana nofovaavaaia.

Na faailoa e le loia a le malo ia Jerard Murphy i luma o le fa’amasinoga maualuga i le taeao ananafi e fa’apea, o fa’amaumauga ua maua e le malo mai le Ofisa Fa’anofovaavaaia, o lo o tu’uaia ai Jennings i lona le usitaia o tuutuuga o lana nofovaavaaia.

E ui e le i fa’ailoaina i luma o le fa’amasinoga maualuga i le taeao ananafi poo a tuutuuga o le nofovaavaaia a le ua molia ua ia le usitaia, peita’i o le aso o lana ulua’i iloiloga o le a mafai ai loa e le malo ona fa’alauiloa tuutuuga o lana nofovaavaaia ua ia soliina.

O le tausaga e 2014 na fa’anofovaavaaia ai e le fa’amasinoga ia Jennings mo le 7 tausaga, e mafua mai ina ua ta’usala o ia i moliaga mamafa e lua o le talepe fale atoa ai ma lona taliaina o ni oloa sa ave faagaoi e ni isi tagata.

O le va o le masina o Iuni ma Iulai 2013 na osofa’i ai e Jennings ma ni isi ali’i se fale o se aiga sa malaga i fafo, ma gaioia ai le tele o oloa e aofia ai ma se fana, lea na fa’atau atu e Jennings i se isi tagata i le tau e $350.

O lo o tatalaina pea i tua Jennings e fa’atali ai le vaiaso mulimuli o Novema lea ua fa’atulaga e faia ai lana ulua’i iloiloga i luma o le fa’amasinoga maualuga.

O le afioga i le ali’i fa’amasino sili ia Michael Kruse na iloiloina lenei mataupu, fa’atasi ai ma le lagolagosua a afioga i alii fa’amasino lagolago ia Fa’amausili Pomele ma Muasau T. Tofili.

SAMUELU WRIGHT

Ua taoto atu nei i se fa’aiuga a le fa’amasinoga maualuga le talosaga na fa’aulu e le ali’i pagota o Samuelu Wright ma lana loia fautua ia Douglas Fiaui, mo se poloaiga fou a le fa’amasinoga e fa’aleaoga ai le fa’aiuga a le vaega iloilo iuga lea na ta’usala ai le ua molia i le amataga o le tausaga nei, ae fa’atulaga loa se isi ana fa’amasinoga autu fou.

O le amataga o le tausaga nei na ta’usala ai e se vaega iloilo iuga ia Wright i le moliaga o le faomea i le tulaga muamua fa’apea ai ma le fa’aaoga fa’asolitulafono o se a’upega mata’utia, e mafua mai i le fa’alavelave lea na latou osofaia ai ma ni ali’i se to’atolu le faleoloa o le Gold Conda i Faga’alu i le po o le aso 1 Me 2014, ma fa’asala ai loa e le fa’amasinoga le ua molia i le umi e 15 tausaga i le toese.

Na taua e Wright i lana talosaga lea ua i luma o le fa’amasinoga, e i ai isi fa’amaumauga fou fa’atoa maua e lana itu e mafai ona fesoasoani i se isi ana fa’amasinoga fou, pe afai ae talia e le fa’amasinoga le talosaga.

I le iloiloga sa faia i le taeao ananafi, na finau ai le loa a Wright i le fa’amasinoga mo se isi avanoa e tali atu ai i le fa’afinauga a le malo lea fa’atoa faila i le aso Tofi na tea nei e fa’atatau i lana talosaga mo se fa’amasinoga fou.

Na fesili le ali’i fa’amasino sili ia Michael Kruse ia Fiaui i le mafua’aga ua ala ai ona tuai le tu’uina atu o sana tali e tusa ai o le fa’afinauga a le malo, ae na tali le ali’i loia ia Fiaui e faapea, “ua mafua ona tuai atu sa’u tali, ona o lea fa’atoa ou mauaina i le taeao nei le fa’afinauga a le malo e fa’atatau i la’u talosaga sa faila, ae o le aso 15 Oketopa na poloaina e le fa’amasinoga maualuga ia le malo e tatau ona faila ai la latou tali.

Na liliu Kruse i le loia a le malo ma fesili i ai pe sa’o na tuai ona faila la latou tali, ae na tali le loia a le malo ia Jerard Murphy, “O lea lava lau afioga, o le mafua’aga lea ou te fa’atoese atu ai ona o le afiafi ananafi (aso Tofi) na fa’atoa faila ai la’u tali”.

Na fa’ailoa e Kruse ia Fiaui, e le mafai ona vave tuu atu se fa’aiuga a le fa’amasinoga e toe sui ai le fa’aiuga a le vaega iloiloga iuga lea na latou ta’usalaina ia Wright i moliaga e pei ona nofosala ai o ia i le toese, ona o le tuai o le taimi na faila ai le tali a le malo, ma mafua ai ona leai sana tali e tusa ai o le fa’afinauga a le malo, ae sili pe a tu’u atu aso e 5 e faila atu ai sana tali fa’asaga i le tali a le malo, ma taoto atu ai loa le talosaga a le itu tete’e mo se fa’aiuga a le fa’amasinoga.

Na ta’usala uma e le fa’amasinoga ali’i e to’atolu e aofia ai Wright na tu’uaia i le osofaiga o le faleoloa o le Gold Conda i Faga’alu, ma poloaina uma ai i latou e le fa’amasinoga latou te tuliina le fa’asalaga fa’a falepuipui e ta’i 15 tausaga i le falepuipui.

O ali’i e to’alua na ta’usala fa’atasi ma Wright e aofia ai Alatuna Simi lea na avea ma molimau autu a le malo fa’asaga ia Wright, ma le ali’i o Falefatu Asi, lea na maua lona tino maliu i le umukuka o a pagota i le lua masina na te’a nei.

FEGAUIA’I TOESE

Ua talia e le fa’amasinoga maualuga se talosaga na fa’aulu e le loia a le malo ia Bob Pickett, ina ia fa’atulaga loa se aso e faia ai le fa’amasinoga autu a le tama’ita’i o Faguaiai Toese, ina ua le mafai e itu e lua ona fa’amautu se maliliega aufaatasi e fa’amuta ai taualumaga o le mataupu fou lea ua tu’uaia ai e le malo ia le ua molia.

O le aso 13 Fepuari 2017 lea ua fa’atulaga e le fa’amasinoga e fa’ataunuu ai le fa’amasinoga a Toese, lea o lo o taofia pea i le falepuipui e fa’atali ai le aso lea ua fa’amoemoe e fa’ataunu’u ai lana fa’amasinoga autu.

E ese mai i le mataupu fou lea ua tu’uaia ai le ua molia, na ta’usala fo’i o ia e le fa’amasinoga maualuga i le 2012 i le moliaga o le gaoi, e mafua mai i le fa’alavelave lea na ia sainia ai siaki e lua mai le kamupani o le Kooline Refrigerator e silia i le ta’i $1,000 le aofa’i.