Tala otooto ai le Fa’amasinoga

MOLIA SE ALI’I I LE UMIA FA’ASOLITULAFONO O MARIUANA

O le vaiaso na te’a nei na tula’i ai i luma o le Fa’amasinoga Fa’aitumalo se ali’i e 45 tausaga le matua, ona o tu’uaiga i lona umia fa’asolitulafono lea o vaega o le laau fa’asaina o le mariuana.

Na pu’e fa’apagota e Leoleo le ali’i Asuni Lemapu i Tafuna i le vaiaso na te’a nei, ina ua le tausisi lana ta’avale i tulafono o le alatele. Na saili e Leoleo le ta’avale a le ua molia ma lona tino, ma maua i ai se pepa o loo afifi ai lau mamago lanumeamata, lea na mulimuli ane fa’amaonia i se suega sa faia, o lau mamago ia o le laau o le mariuana.

Ina ua fesiligia e leoleo ia Lemapu e tusa ai o fualaau fa’asaina sa maua ia te ia, na ta’utino ai le ua molia, o meatotino a ia lava, sa ia fa’atauina mai i se isi ali’i ma le fa’amoemoe e fa’aaoga mo ia lava.

E $5,000 lea ua fa’atulaga e tatala ai Lemapu i tua mai le toese i Tafuna, afai ae tatala o ia i tua, ua fa’asa ona ia toe tagofia vaega o fualaau faasaina poo le ‘ava malosi, ua fa’asa fo’i ona ia toe soliina se isi tulafono a le malo.

FA’ALEAOGA LE NOFOVAAVAAIA A SEFULU MAIFEA

O le mae’a ai ona fa’asala e le Fa’amasinoga Maualuga le susuga a Sefulu Maifea i le vaiaso na te’a nei, ina ia nofosala i le toese mo le umi e 28 masina, i le mae’a ai lea ona ta’usala o ia i le moliaga o le ave fa’agaoi o tupe a le malo, o le vaiaso nei na tula’i ai Maifea i luma o le Fa’amasinoga Fa’aitumalo mo le iloiloga o lona le usitaia lea o tuutuuga o lana nofovaavaaia.

O le ma’ea ai ona ta’usala o Maifea e le fa’amasinoga maualuga i le solitulafono mamafa o le ave fa’agaoi o meatotino a le malo, na faila ai loa e le Ofisa Faanofovaavaaia se talosaga i le Fa’amasinoga Faaitumalo, mo sana poloaiga e fa’aleaoga ai le nofovaavaaia a le ua molia.

E tusa ai ma fa’amaumauga a le fa’amasinoga faaitumalo o lo o taua ai e fa’apea, o Maifea o lo o nofovaavaaia i luma o le Fa’amasinoga Fa’aitumalo mo le 5 tausaga, ona o le solitulafono o le ave ta’avale ‘ona na ta’usala ai o ia.

E fa’alua ona ta’usala Maifea i le moliaga mama o le fa’aoolima i le tulaga tolu, ae fa’atolu ona ta’usala o ia i le moliaga o le ave ta’avale ‘ona.

O taimi uma na ta’usala ai e le fa’amasinoga ia Maifea i nei mau solitulafono, sa fa’amalumalu ai e le fa’amasinoga le tuuina atu o le ua molia i le falepuipui, ae faanofovaavaaia o ia i lalo o tuutuuga e ao ona ia usita’i i ai.

O se tasi o tuutuuga o lana nofovaavaaia, o le aua lea ne’i ona toe soliina se tulafono a le malo.

Ae o le ta’usala ai o ia i le moliaga mamafa o le ave fa’agaoi o tupe sa tuuina atu na te vaaia ma tausia, ua atagia mai ai lona le usitaia o tuutuuga o lana nofovaavaaia.

Na fa’atoese Maifea i le fa’amasinoga fa’aitumalo e tusa ai o lana solitulafono, ma ia talosagaina ai se isi avanoa mo ia.

Saunoa le afioga i le ali’i fa’amasino ia Fiti Sunia e fa’apea, “sa tele avanoa sa tuuina atu e le fa’amasinoga ia te oe, ae foliga mai e le o i ai se aoaoga na e maua mai ai i nei mau avanoa e tele”.

O fa’asalaga faa falepuipui uma sa fa’amalumalu e le fa’amasinoga mo Maifea, ua poloaina e le afioga i le ali’i Fa’amasino ia Sunia ina ia tuliina uma. E le mafai e loia ona fa’amaonia mai le umi o le taimi lea o le a tuli e Maifea ina ua fa’aleaoga lana nofovaavaaia.

Pau le itu lelei mo le ua molia, o lana fa’asalaga mai le fa’amasinoga fa’aitumalo, o le a tuli fa’atasi ma lana fa’asalaga fa’a falepuipui mai le fa’amasinoga maualuga.