TALA O TAALOGA

Pago Pago - AMERIKA SAMOA

MANUMALO LE SEAHAWKS 31-7 JAGUARS MAI JACKSONVILLE

Matagofie le toe fo’i mai a le Seahawks ina ia latou toe maua se manumalo ina ua mae’a tolu o latou faia’ina soso’o i vaiaso e tolu talu ai. I le latou au maimoa na fa’atumulia ai le Lumen Stadium i Seattle Washington, “Ua mana’omia lava e i matou lenei malo, aua e le masani ona fasi so’oa o matou lagona i le tatou lava malae.” O tagata ua malomaloa a latou vala’au, ma fa’atauanau se latou malo i le ‘auta’a’alo.

O le lona lua ai lea o ta’aloga a le Seahawks i le latou malae, ae sa faia’ina i le isi latou ta’aloga muamua.

Na avea le malosi o le fa’amalo a e na maimoa, e le’i toe fa’atali ai le Sea Hawks i le latou sofa’i atu o so’o ta’alo lava e tau fa’atulaga mai a le Jacksonville. 

Mai le amataga o le ta’aloga se’ia oo i le afa taimi, e le’i maua lava se ‘ai o le Jacquar, ma ua soso’o atu lava ina mae’a le kuata lona tolu, e le’i tau ’ai lava. Ae o le oso oso o a’i a le Seahawks e fa’aopoopo lava ai ai lelei a latou ta’alo e fia fa’ataunuu.

O le taimi na oo ai i le kuata lona fa, ua toetoe uma le taimi i luga o le laupapa ae fa’ato’a mafai ona sikoa Jacksonville ma toe kiki ma fafao lelei, na fa’ato’a to’ia ai le laupapa i le latou ‘ai o le ta’aloga e 7. Na faaauau pea taimi sipea o le ta’aloga, ae na toe maua ai le isi avanoa e toe kiki ai le isi field goal a le Seahawks ma fa’aopoopo ai latou ‘ai e lua, maua ‘ai fa’ai’u o le ta’aloga e 31-7 a Jacksonville.

O lea la ua mae’a maua le tulaga fou mo Seahawks ina ua mae’a le ta’aloga lona 8 o lenei taamilosaga a le NFL ua 3 manumalo ae lima faia’ina, tasi le malolo.

O se mea ua sa’o o lenei taaloga, ua iloga ona tula’i mai Geno Smith, le ali’i Quarterback e fai le galuega sa tofia ai mo le ‘au. O le ta’aloga na mavae atu lea sa faia’ina ai fo’i, i le va ma le Saints, sa iloga ona fa’aletonu mai le ta’alo a Geno, ae sa malosi le una’i mai a le Defense a le Saints. Lualuagia loa i le fa’aletonu na’ua o le tau, e le’i faigofie ai ona fa’ataunuu ta’alo sa fa’amoemoe e fa’aatoa ai le taumafaiga a le Seahawks i le vaiaso na te’a ta’aloga numera 7 a le NFL 2021.

O le mea mataina lona lua, ua fa’aauau pea lava ona lelei le puipuiga malu a le Defense Seahawks. Ua iloga ua sili atu ona lelei le ta’a’alo a le Seahawks i le latou ta’aloga lenei nai lo latou ta’aloga e lua na te’a atu nei lea na fetaui ai ma Pittsburg ma New Orleans. 

Ua latou mafaia ona fa’ato’ato’a lelei le taofiofiga o le maua e Trevor Lawerence ma le latou itu a Jacksonville le polo.I le ta’aloga lenei a le Seahawks ua iloga mai le lelei fo’i o le ta’a’alo a tama Tyler Lockett ma DK Metcaff, i lo latou mauaina o togi e 12 ma faamautu ai le lua sikoa mo le ta’aloga lona valu a le NFL.

Ua iloga fo’i e tau le togia le polo ia Lockett i taimi e togia ai e Smith le polo.

I le ta’aloga na se’i mavae atu nei, sa matele ina togia e Smith le polo ia Lockett ma sa maua lelei lava togi e 8 i le 92 iata ae le’i taina le afataimi o le ta’aloga, ae 12 pasi na maua i le ta’aloga atoa i le aotelega o iata e 142.

O Metcaff e na’o le ono togi sa ia maua mo le 43 iata le mamao, ae lua o nei togi na mafai ona maua ai sikoa mo le ‘au atoa. Mata’ina ala na maua ai e Metcaff polo nei, e le’i faigofie, ae ua mautu fo’i lona fa’ataunu’uga ia sikoa lelei foi nei taumafaiga fita uma e lua.

Mai le itu a le Jaquars ua fa’ailoa mai ai, “Ua uma na silafia lelei lava e le to’atele o e maimoa ma tapuaia ta’aloga a Jacksonville, e le malo lava i latou i le Seahawks. Na latou faiaina mai lava i le ta’aloga o le 2001, 2009 ma le 2013, ma o ‘ai o se tasi o nei ta’aloga e le o maua i se isi lava ta’aloga faitaulia a le NFL, 110 Seahawks i le 32 Jacksonville. Pau lava le ta’aloga na mafai ona malo ai Jacksonville, o le ta’alofa faitaulia i le 2017 lea sa fa’ataututu ai le ta’aloga i le taimi atoa ma o ‘ai o lena ta’aloga e tusa o fa’amaumauga a le NFL e 30-24. 

I le ta’aloga o le aso Sa na te’a nei, e le’i ta’alo ai le tama faamoemoeina a le Seahawks, Russel Wilson, o loo ua taumafai nei ona toe fa’aleleia ni ona manu’aga peita’i, i le taimi o le ta’aloga atoa, sa matua tula’i mai Geno Smith e fai le faiva o le fa’afiafia o le Lumen Stadium ua faatumulia i le ‘au maimoa e to’atele.

MALOLOGA AFA TA’ALOGA - MIKE HOLGREN SEAHWAKS RING OF HONOR

O Holmgren o se tasi o faia’oga o quarterbacks sili ona ta’uta’ua ma ua fa’apea fo’i ona taumulimuli ia te ia le tele o au Football i lo latou fia fa’afaigaluegaina o lea tama, i soo se taimi e avanoa ai, ia ua fa’amamulu mai e se isi ‘au o galue ai.

O lona fa’ailoga ua taua’aoina nei e le Seahwaks ua fa’amaonia ma tamau ai le sao maoa’e i le latou ‘au i le taumafaiga mai. I le tausaga 2005, o le tausaga lea o lo ua fa’amauina o se tausaga ua sili ona lelei ai fa’amaumauga o ta’aloga a le Seahawks ona o le galuega lelei a Holmgren. Na tula’i mai le Seahawks i le ta’amilosaga Football o le 2005 e 13malo 3 faiaina. Peita’i o Superbowl muamua lava a le Seahawks, 2013, na maua ona o le tula’i mai a lea faia’oga faapitoa o Quarterbacks fa’atasi ai ma lona avea ma faia’oga o le ‘au atoa a le Seahawks mai le tausaga e 1998-2002.

I le tausaga 2020 na faamauina ai Mike Holmgren i le Pro Football Hall of Fame “Centennial Slate” I le tausaga 2021 Oketopa 31, ua fa’amauina nei o ia i le sauniga mamalu i le afa o le ta’aloga faitaulia i le va o le Seahwaks ma le Jacquars ua ulufale pe fa’amauina fo’i lona suafa i le “Seahawks Ring of Honor”.

ISI FA’ALAUILOAGA SA FAIA I LE MALOLOGA PUPU’U

Sa fa’alauiloa fo’i le tautua a nisi o fanau a le Setete a Washington ua avea nei ma totino o le First Air Squardron a le US Air Force ma ua auai uma i latou e fia maimoa i se taumafaiga a le Seahawks i lea taeao. Na fa’alauiloa aloa’ia i latou i se tasi o malologa mai le ta’aloga ma sa faia lea i le itu i matu o le Stadium. Na patipatia e i latou uma fo’i lea avanoa ua maimoaina ai se taumafaiga ua manumalo a’ia’i ai le Seahawks i le Jacksonville.

E ese mai lea ae o le malologa i le va o le kuata tolu ma le fa, ae fa’alauiloa ai le ali’i fitafita tuai ua sili ona matua o lo’o soifua mai pea. Sa tau o ia i lona 17 tauaga na avea ai ma fitafita o le Maligi Koa ma auina atu i Viet Nam, soso’o ai ma le Taua i Korea, soso’o ai ma le taua i le Faga i Peresia ma ua malolo manumalo mai i ona tiute uma i le vaega au. 

Peita’i o lea tama fitafita manumalo malolo, o se tasi e matua ta’utino e ia, o le Seahawks, malo pe faia’ina.