TALA O LE SENATE

Pago Pago - AMERIKA SAMOA

Sa fa’aleoina e le Afioga i le Peresetene o le Senate, le tofa ia Tuaolo Manaia Fruean ia sona atugaluga e tusa ai ma tu’ua’ia sa faia e le Komesina o Leoleo a Samoa, lea na ta’ua ai le avea o Amerika Samoa ma nofoaga autu, o lo’o au atu ai se vaega o fualaau faasaina (Aisa) i totonu o Samoa Tuto’atasi, faapea ai ma le fa’aaogaina o fanau iti e fa’atauina atu nei vaega o fualaau faasaina.

Na saunoa Tuaolo, e tusa ai ma tu’uaiga a le ofisa o Leoleo a Samoa, ua mafai ona o latou fa’amaonia le alu atu o le Aisa mai Amerika Samoa ma o se tulaga e le tulaga lelei i lana fa’afofoga.  O nei tu’ua’iga sa ulua’i ripotia e le nusipepa a le Samoa Observer, ona toe lomia lea i le itulau muamua a le Samoa News, i le aso Gafua, Iulai 21, 2025.

Na ta’ua e Tuaolo, le tatau i le malo ona su’esu’e auiliili lenei mataupu, ma ia faamamafa le a’afiaga tele o Amerika Samoa i nei ituaiga tu’ua’iga, ma e le tatau ona ta’atia ai faapea.

Sa fesiligia foi e le alii Peresetene, le mafua’aga e le’i o’o atu ai se ripoti aloa’ia e tusa ai ma vaega o fuala’au faasaina ia na aumai fa’anana i totonu o le teritori, lea sa pu’eina e ofisa o tiute ma leoleo.  Sa ta’ua e Tuaolo le tutupu o nei tulaga i le taimi o le Faigamalo ua tuana’i atu.  Ae o lea ua atoa le fa tausaga, o lo’o faatalitali lava le Fono i se ripoti.

Na fia malamalama le afioga i le Peresetene, po o fea o iai le ripoti i le Aisa lea na aumai fa’anana, tauala mai i le Falemeli mo lmaue Ofisa o le Medicaid.  E le gata i lea, o le Aisa lea na auala mai i le Ofisa a le Procurement.  Sa fia iloa e Tuaolo le mafuaaga e le’i maua ai se ripoti o ia tulaga.

Sa faapea ona talosagaina e le tofa ia Tuaolo ia le Afioga i le Senatoa ia Olo Uluao Letuli, o le taitaifono o le Komiti o le Puipuiga o le Saogalemu Lautele ma le Lotoifale, ina ia sapina uma taitai o le malo, o lo’o a’afia i lenei mataupu, e aofia ai ma le Loia Sii, aua se iloilga i lenei vaiaso, ina ia faamalamalama lenei mataupu. 

Na ia toe fa’aleoina foi le le tatau ona tu’u pogisa le atunu’u, ma ia fa’atusatusaina ai o lenei mataupu ma le mataupu i Amerika lea e ta’ua o le “Lisi a Epstein”, lea o lo’o tauanauina ai e tagata o le atunu’u ia le fa’alauiloa mai o igoa o tagata o lo’o a’afia i lea mataupu.  Sa saunoa Tauolo, o se mataupu ‘oga’oga lenei mataupu ma e le tatau ona tu’umamaina.  O vaega o fualaau faasaina ia o lo’o aveina fa’anana atu i totonu o le teritori, tauala atu i ofisa ma matagaluega ‘ese’ese a le malo, e le o se tulaga e tatau ona le amana’ia.

O le aso Lulu o le vaiaso nei, i le 8:30 i le taeao, ua faapea ona taloina ai e le afioga Olo ia le iloiloga mo lenei mataupu.  Ma o molimau o le a ‘subpoena’, e aofia ai le Loia Sili, le Faatonusili o le Puipuiga o le Saogalemu Lotoifale, le Komesina o Leoleo faapea le Pule o le Ofisa o Tiute.

PASIA E LE SENATE IA FA’ATONUSILI E TO’ATOLU A MATAGALUEGA

O le aso Lulu o le vaiaso ua tuanai, na pasia ai e le Senate ia le susuga ia Taua’isafune Niualama Taifane, e avea ma Faatonu o le Ofisa o Polokalama ma le Atina’e o le Paketi, faapea ai le susuga ia Tapusalaia Maneafaiga e avea ma le Faatonu o le Ofisa o Paka ma Malae Ta’alo, atoa ai ma Nathan Ilaoa, e avea ma Faatonusili o le Matagaluega o Alagamanuia o Sami ma Vaomatua.

O Taua’isafune sa pasia i se palota e 11-5, o Maneafaiga sa pasia i se palota e 14-2, ae o Ilaoa na pasia e afioga uma i Senate, 16-0.  Ma ua kilia ai nei le ala mo Taua’isafune ma Ilaoa, ae se’i vagana ai Maneafaiga, lea ua faamoemoe e faataunu’uina lona palota i totonu o le Maota o Faipule, i le taeao nei.

Sa fa’aleoina e le afioga i le Senatoa ia Gaoteote Palaie Tofau, ia nisi o atugaluga e tusa ai ma le fa’atulagaga o totogi a le malo, i le taimi.  Na ia ta’ua e faapea, e $120,000 le totogi a le Kovana i le tausaga, o le Lutena Kovana e $100,000, ae o faatonusii ma sui lagolago sinia, e amata atu a latou totogi i le ta’i $80,000 ma le $90,000, ma e iai ma nisi o lo’o sili atu o latou totogi.

Sa faapea ona fesiligia e Gaoteote ia Taua’isafune, pe o lo’o iai sona faamoemoega, e fautuaina le Kovana e tusa ai ma lea tulaga.  Na tali mai ai  o Taua’isafune, o le a ia fautuaina le Kovana ae peitai, sa ia faamamafaina, o le fa’ai’uga, e pa’u lava i luga o le kovana.

Sa faaleoina foi e le afioga i le Peresetene o le senate ni ona popolega, e tusa ai ma le agava’a o Taifane, ona o lona tala’aga po o a’oa’oga, e pa’u i luga o tulaga tau a’oa’oga.

Na fesiligia e Tuaolo ia Taifane, pe sa ia talosagaina le tofiga lea ua pasia ai nei o ia.  Sa tali Taifane, e leai.  Na aloa’ia e le afioga i le Peresetene ia le lagolago malosi o Taifane, i le taimi o kemupeni mo Pula ma Pulu ma sa ia ta’’ua e faapea, na iai lava lona talitonuga, o le a tu’uina atu ia Taifane le fa’amuamua e filifili ai sona avanoa i totonu o le Faigamalo.

Sa ta’ua e Taua’isafune, o lona a’afiaga i le kemupeni, na mafua mai i sona talitonuga maumaututu i le taitaiga a Pula ma Pulu, ae le o se mana’o ina ia  fa’amautu sana galuega i totonu o le malo.  Ina ua mae’a le palota, sa ta’ua e Taua’isafune, le fa’asalalauina o le mana’omia ona apalai mo avanoa i totonu o le malo.  Ma i le taimi lena, e le’i sona agaga ia saili sana gauega, ona o la e iai lana galuega.   Ma e ui ina sa ofoina atu e le Kovana se avanoa faigaluega m ia, ae sa ia faatalitali se’i soalaupule muamua le kovana ma isi ana soatau.

Na fa’aalia e Taua’isafune, o lenei avanoa faigaluega, o se valaauga.

Ina ua fesiligia o ia  sa iai sona sao i le tu’ufa’atasiga o le Paketi mo le Tausaga Tupe o le 2026.  Sa saunoa Taua’isafune, ina ua mae’a ona filifilia o ia, sa faapea loa ona o la galulue ma le sui Faatonu o Aukuso Satia, i le tuufa’atasia o le paketi.  O tupe aoina lotoifale, mo le Paketi FY2026, o lo’o taumateina, i le $141.2 miliona, e tusa ai ma le aotelega o le ripoti ua mae’a ona fa’ao’oina atu i le Fono.

Na fa’asoa mai foi Taua’isafune, ina ua fesiligia o ia i se fuafuaga, pe afai ae le tino mai le tulaga e pei ona taumateina, na ia ta’ua ai le mae’a ona soalaupule o lona ofisa ma le Tausitupe, faapea le afioga i le Kovana, mo le iloiloina o ni tulaga e mafai ona fa’amalosia ai le aoina o tupe.

I se saunoaga a le afioga i le Senatoa mai i le Alataua, ia Noa Vae, sa ia ta’ua ai e faapea, o Taua’isafune, o se tasi o matai fa’atuatuaina, i lo latou italo, ae le gata i lea, sa faapea ona fa’asoa mai e le afioga i le Senatoa ia  lana tautua i totonu o lona aiga nu’u, ito le umalo, ekalesia ma le malo.  Sa ia ta’ua lona fa’atutuaina o le agava’a a Taua’isafune, aua lona tofiga fou.

Na fa’aleoina e le afioga i le Senatoa, ia Tuana’itau Malaki Togiola ia sona popolega, e tusa ai ma tulaga o totogi, lea pei ona ia ta’ua, o se tasi o faufautua sinia i totonu o le Ofisa o le Kovana, e tutusa lona totogi ma le Lutena Kovana.  Ma sa fesiligia ai e Tuana’itau le mafua’aga.  Na saunoa Taua’isafune, i sona talitonuga, e le o se gaioiga sa’o lea ua faia e le Kovana.  Ma sa ia folafola mai, afai ae pasia o ia e avea ma Faatonu, o le a ia fautuaina ni auala e mafai ona fofoina ai lea faafitauli.

I le saunoaga a le afioga Senatoa Togiola T.A. Tulafono, sa ia ta’ua ai le pa’u o taumatega mo tupe aoina faalotoifale, mo le tausaga tupe fou, mai i le $165 miliona, i le $141.3 miliona.  Sa saunoa Togiola ia lona maitauina, o le leai o se vaega, e talifuaitau ai le aitalafu a le malo o iai nei, ma sa ia ta’ua foi le le’i fa’amalosia o le 10% o le pa’u o taualuga o paketi i le tausaga tupe 2025, i totonu o matagaluega ma ofisa.

Sa fa’aleoina e Togiola sona popolega tele, i le agai  luga o le fuainumera o le aitalafu a le malo, e aofia ai ma le tupe o lo’o nofo aitalafu ai i le Teugatupe le Ofisa o Ritaea, ma sa ia ta’ua le leai o se fuafuaga ma’oti e fofoina ai lea tulaga.  Ae lea e na’o le toe lua masina o totoe o le tausaga tupe 2025, sa saunoa Togiola, e leai se fuafuaga fa’ata’atia a le faigamalo, e fa’atele ai se tupe aoina, e mafai ona totogi ai nei aitalafu.

Ae sa tali mai Taua’isafune, o lo’o iloiloina nei e le loia ia se auala, e mafai ai ona fa’aaogaina vaegatupe a le ARPA e totogia le aitalafu i le Teugatupe a le ofisa ritaea, talu ai sa taofia ia le tatipiina o tupe a tagata faigaluega i le vaitaimi o le Koviti.  Ma sa ta’ua foi e Taua’isafune sa iloiloina foi se pili mo se tupe fa’aopoopo, ae peitai, e le’i pasiaina lea tulaga e le kovana.