TALA O LE PASEFIKA

Pasefika

MOLIA SE ALII SA AVEA MA LEOLEO I GUAM, I FUALAAU FAASAINA

O le amataga o le vaiaso, na tula’i ai i luma o le Komisi o Tautua Savili (Civil Service Commission-CSC) a Guam, ia le susuga ia Brian Awa, lea sa avea ma leoleo ae na livi mai lana galuega talu mai le 2017 talu ai moliaga i vaega o fualaau faasaina.

O le ulua’i taimi lea ua tulai ai Awa i luma o le CSC.

O le masina o Fepuari, sa faate’aina ai Awa mai lana galuega i totonu o le Ofisa Leoleo a Guam, ona o se osofaiga a leoleo na faia ia Me 2020, lea na masalomia ai o ia i fualaau faasaina.  Ma na faia ai loa se suesuega fa’alotoifale a le ofisa a leoleo e faasaga ia Awa.

Sa faauluina e Awa sana apili i luma o le CSC e fa’asaga i lona le taliaina o le fa’ate’aina o ia mai i lana galuega.

O le alii loia o Peter Santos o lo’o tulai mo Awa, ae na fa’aalia e le alii Lutena Brantley, David A. mai i le ofisa a leoleo, e le i faamautuina se loia e tula’i mo le Ofisa a Leoleo.

O le aso 12 o Aperila lea ua fuafua e toe fa’aauau ai lenei mataupu i luma o le CSC.

TO’AFITU ALII TA’UTAU’A I LAKAPI UA FAAULUFALE I LE ‘HALL OF FAME’

E to’afitu ni alii lauiloa i le fa’agatama o le Lakapi, i totonu o le Pasefika, ua faaulufale atu nei o latou suafa i totonu o le faalapotopotoga o tagata iloga i lenei fa’agatama (Pasifika Rugby Hall of Fame – PRHOF), i Aukilani, i le aso Tofi o le vaiaso fou, Mati 28, 2024.

O i latou ua fa’amanuiaina i lenei fa’agatama, e aofia ai ni ali’i ta’a’alo ua fai’ilagi le folauga, o Johan Lomu mai i le ‘au lakapi a le All Blacks, ma Papali’itele Peter Fatialofa mai i le Manu Samoa.

O isi o le a aloaia i lenei ‘Hall of Fame’, e aofia ai Waisale Serevi mai i le ‘au lakapi a Fiti, o Tuifa’asisina Bryan Wiliams mai i le All Blacks, o Muliagatele Brian Lima lea o lo’o avea nei ma faiaoga a le ‘Au Ta’ito’afitu a Samoa, o le susuga ia Seiuli Fiao’o Fa’amausili lea sa avea ma kapeteni o le ‘au a le Black Ferns ma George Smith mai i le ‘au lakapi a Ausetalia (Wallaby).’

O lenei faamoemoe ua fuafua e faataunuuina i le vaiaso fou, Mati 30, 2024 i le Paka i Etena i Niu Sila.

MALO LE ‘AU LAKAPI A ALI’I MAI SAMOA I LE LATOU TA’ALOGA MA TONGA

O le aso ananafi na manumalo ai le ‘au Lakapi a Samoa i le latou ta’aloga ma le ‘au mai Tonga i le malae ta’alo (Teufaiva Stadium) i Nuku’alofa, i le Taamilosaga a le Oceania (OFC).

O le ulua’i ‘ai o le ta’aloga, na sikoa ai le alii o Dilo Tumua mai i Samoa, ae fa’ato’a iva minute talu ona amata le afa muamua.

Sa soso’o ai ma le sikoa a Samoa mai i le alii o Nathan Viliamu, i le faaiuga o le afa muamua, ma maua ai ‘ai a Samoa 2-0.

I le afa lona lua, na toe sikoa ai Nathan Viliamu ma soso’o mai ai ma le sikoa a Ethan Stowers.

Ae peitai, i ni nai toe minute o le ta’aloga, ae sikoa loa Tonga.

O le malo muamua lenei a Samoa, i ana ta’aloga e tolu.  Afai ae manumalo uma ana ta’aloga, ona mafai lea ona au le ‘au a Samoa i le OFC Men’s Nations Cup i Vanuatu, ia Iuni.

O le aso To’onai o le a fetaui ai Samoa ma le atu Kuki, ae o le aso lua o le vaiaso fou, o le a ta’a’alo ai le atu Kuki ma Tonga.

MOLIA BAINIMARAMA, LEA NA AVEA MA PALEMIA O FITI

O le vaiaso ua mavae, na liliu ai e le sui Faamasino Sili ia Salesi Temo ia le faaiuga a le faamasinoga lea na solofua ai moliaga fa’asaga ia Frank Bainimarama, lea na avea ma Palemia o le malo o Fiti, faatasi ai ma Sitiveni Qiliho lea sa avea ma taitai leoleo, ma ua molia nei i la’ua i le fa’alavelave i le faatinoga o tiute a le malo, i le sailiga o e na solia le tulafono.

O lenei moliaga e mafai ona nofosala ai se tasi i le 10 tausaga i le falepuipui.

Ua faapea foi ona molia Bainimarama, faatasi ma Aiyaz Sayed-Khaiyum, lea na avea ma Loia Sili faapea Neil Sharma, lea sa avea ma Minisita o le Soifua Maloloina, i nisi o solitulafono.

Na fa’aalia e se alii polofesa mai i le Iunivesite o le Pasefika, o Vijay Naidu, afai ae faamaonia moliaga o Bainimarama ma faasalaina mo le 12 tausaga i le falepuipui, o lona uiga, ua i’u ai iina lona olaga galue i totonu o faigamalo, aua o le a le mafai ona toe agava’a e auai i palota mo leisi tausaga palota e lua, o loma nei.

O le aso 28 o Mati, 2024 ua faamoemoe e lauina ai le faasalaga a Bainimarama ma Qiliho.