TALA O LE PASEFIKA

PASEFIKA

FA’AGATA LESITALA PALOTA A SAMOA IA IULAI 4

O tagatanu’u o le malo Tutoatasi a Samoa, o lo’o fa’amautu i atunu’u i fafo, e fa’agataina a latou lesitala mo le palotaga ia Setema, i le aso 4 o Iulai.

Sa ta’ua e le Komesina o Palota a Samoa, le susuga ia Toleafoa Tuiafelolo John Stanley, e ui o lo’o avanoa ia luga o upega tafa’ilagi e lesitala ai tama fanau a le atunuu o lo’o aumau i atunu’u i fafo, ae peitai, mo le fa’amae’aina o le lesitala, e mana’omia ona o latou malaga atu i Samoa e fa’amae’aina ai a latou lesitala, e ala i le pu’eina o ata o a latou tamatama’ilima (fingerprints) ma o latou foliga.

Ae ua mae’a ona nofo tapenpena lo latou ofisa, mo lea tulaga.

Sa ta’ua e Toleafoa e faapea, ae e le’i fa’ata’apeina le palemene, sa na’o le 48% tagata palota ua mae’a ona lesitala.  Ae e o’o mai i le aso 10 o Iuni, ua 60% tagata ua mae’a ona lesitala.  Ma o le fuainumera o tagata palota ua mae’a ona lesitala, ua 70,395,

Ma o le aso 4 o Iulai, o le a tapunia aloa’ia ai fa’amaumauga o lesitala. Ae o le aso 29 o Aukuso, o le aso palota lea.

Na fa’amaonia foi e Toleafoa le le’i pasia o se pili, ae e le’i tapunia le Palemene, sa ono mafai ai ona palota atu tagata Samoa i atunu’u i fafo, mai nofoaga o lo’o latou fa’amautu ai (overseas voting).

O lea ua fa’amalosia ai pea le tulafono tau palota 2019, lea e fa’amalosia ai le fa’atinoina o palotaga, i totonu o Samoa.

Sa fa’auluina e le Ofisa Palota ia se talosaga i le Faamasinoga Maualuga mo le toe tu’uina atu i tua o le aso palota, e mafai ona o latou tapenapena, ae peitai, sa te’ena lea talosaga.

AUSETALIA – GALUEGA FA’A VAITAIMI

O lo’o iai nei se fa’alapotopotoga (NGO) i Ausetalia, o lo’o fesoasoani malosi i tagata faigaluega fa’avaitaimi o le Pasefika, ua leai ni nofoaga pe fa’amautu ai, ina ua mae’a a latou konakarate.

Sa fa’aalia e le peresetene o le fa’alapotopotoga a le Australian South Sea Islanders, ia Eemelda Davis, i le Fiji Times, o lo’o latou fesoasoani i ni tagata faigaluega sa tu’u tia’i e kamupani na galulue ai, i le ‘Central Station i Sydney.

Sa ta’ua e Davis le toatele o tagata faigaluega o lo’o fefefe ma le mautonu, i le tulaga e tupu, pe a mae’a a latou konakarate.  Aua o le toatele o i latou, e le malamalama i tulaga o a latou VISA ma konakarate, ma auala e mafai ona faafouina ai.

E le gata i lea, sa ia ta’ua foi le to’atele o pule o kamupani, e latou te le malamalama i a latou tiutetauave.  Ma e mana’omia ona toe a’oa’oina i latou, i tulafono e fa’atatau i VISA.  Ae le gata i lea, o le mana’omia o se lagolago malosi mai i tagatanu’u, ina ia taofia ai a’afiaga o tagata faigaluega a le Pasefika, lea ua tu’u tia’i faapea. 

FINAGALO PURINISESE O TOGA IA IAI NI AIA TATAU O TAFOLA

Ua talitonu le Purinisese o Tonga, le Afioga ia Angelika Lātūfuipeka Tukuʻaho, ua tatau ona iai ni aia tatau o tafola.  E pei ona sa ia fa’alauiloa atu i le Konekerese o le ‘One Ocean Science’ i Falani, o nei i’a, ua le gata ina o ni alagamanuia, ae o ni I’a, e iai lagona ma e tatau ona iai ni o latou aia tatau.

Ma e pei ona sa ripotia mai e le Talanoa Tonga, o lo’o ua talosagaina e totino se kemupeni ua ta’ua o le ‘I’m a Person Too (O a’u foi o se tagata)”, ia talosagaina ia malo ina ia pasia tulafono e tu’uina atu ai aia tatau i tafola.

Ua silia ma le 367,000 tagata o le lalolagi, ua o latou lagolagoina lea tulaga.

I le malo o Tonga, e iai so latou so’otaga mautu ma tafoa.  I le tausaga e 1978, sa fa’asaina ai e le Tupu o Tonga, na soifua i lena vaitaimi, le Afioga Taufa’ahau Tupou IV, ia le toe fagotaina o tafola, i totonu o ogasami a Tonga, ma na avea ai ogasami o Tonga ma ulua’i nofoaga puipuia mo tafola.

O le tausaga ua tuanai, sa sainia ai e Kiingi Tuheitia mai Aotearoa ma Kaumaiti Nui Tou Ariki o le Atu Kuki, ia se maliliega, sa ta’ua o le ‘He Whakaputanga Moana’ i Rarotonga, e fa’amalosia ai le puipuiga o Tafola, o lo’o aloa’ia nei fa’avaomalo.

O lea puipuiga, ua faapea ona mafai ai ona feoa’i tafola, e aunoa ma le fagotaina.