TALA O LE PASEFIKA

PASEFIKA

TO’ALIMA ALI’I FAIFAIVA NA FA’ASAOINA I LE ATOA O LE 55 ASO O TAFEFEA

O le amataga o lenei masina na fa’asaoina ai e se va’a fagota tuna mai Ecuador, e ta’ua o le ‘Aldo’ ia ni alii faifaiva se to’alima, na leiloloa talu mai le ogatotonu o Mati i le sami o le Pasefika, ma sa mafai ona faatumaina o latou ola, e ala i le taumafaina o vai timu ma vai sami.

O nei alii faifaiva, na aofia ai ni alii Peru se to’atolu ma ni alii  Colombia se to’alua.  O le aso 7 o Me sa faasaoina ai i latou.

E tusa ai ma se faamatalaga mai i le Fuava’a a Ecuador, na fa’amatalaina e alii faifaiva le fa’aletonu o le ‘alternator’ a le vaa, i le aso lona lua talu ona o latou tu’ua ia Pucusana, lea e i le itu I Saute, o le a’ai tutotonu o Peru, o Lima.

Sa fa’asoa atu foi le tamaitai Kapeteni a le Fuava’a a Ecuador, o Maria Fares, i l e vaega fa’asalalau a le Associated Press e faapea, o le leaga o masini o le va’a na mafua ai ona le maua se feso’ota’iga.  Na saunoa Fares, na leai se ‘starter’, o moli ma tulaga e mafai ona fa’aola ai le ma’a o le va’a.

Ma sa mafai ona feola le auva’a e ala i le fagotaina o i’a e taumamafa ai faapea ma vai sami ma vai timu.

Ua ripotia mai le tulaga lelei o le soifua maloloina o nei alii faifaiva ma o lo’o galulue faatasi ma taitai o malo o nei alii faifaiva, mo le toe fa’afo’iina atu o i latu.

FA’AAUAU ONA LAGOLAGO E LE TAITAI LEOLEO NIU SILA IA FITI MA SAMOA

A’o fa’aauau pea ona tuputupu tele ia le fa’afitauli i tulaga o fuala’au fa’asaina, ua faapea ona folafola atu e le taitai leoleo a Niu Sila i taitai o le malo o Fiti ma Samoa, le nofo sauna o Niu Sila e fesoasoani mai i nei malo e lua.

O le vaiaso ua mavae, sa faapea ona asia e le alii Komesina o Richard Chambers, ia Fiti ma Samoa aua le soalaupuleina o auala e mafai ona fa’asagatau atu ai i la’uina mai fa’anana o fuala’au faasaina, i totonu o atunu’u taitasi, o galuega a le vaega o Tiute, o le fefa’asoaa’iina o ripoti atoa ai ma tagata faigaluega po o taitai o malo, o lo’o solia tulafono.

Sa ta’ua e Chambers le ave o lana fa’amuamua i le polokalama lea o lo’o fa’aaogaina ai ta’ifau faapitoa (Pacific Detector Dog Programme – PDDP), e mafai ai ona fa’aauauina le fa’aaogaina o nei taifau faapitoa i totonu o motu o le Pasefika.

Ma ua fa’ailoa mai e le alii komesina le mae’a ona fa’au’uina o nisi e to’aiva, e latou te taulimaina ia nei ta’ifau faapitoa, mai i le tele o motu o le Pasefika.

Sa saunoa Chambers, o lenei polokalama a Niu Sila lea o lo’o fa’aaogaina ai ta’ifau faapitoa, o se tasi o polokalama sili ona maoa’e, i le lalolagi.  Ma ua fa’atupeia e le PDDP ia Fiti, Samoa, Tonga ma le atu Kuki talu mai le 2018.  Ua pe a ma le $3.5 miliona (tupe Niu Sila) ua fa’aaluina i lenei polokalama.

Ae peitai, o le amataga o le masina ne isa tatau ona fa’amae’aina ai le vaegatupe mo lenei poloketi.