Tala o le Pasefika

PASEFIKA

TAU SAILI TURISI MAULU I PALAU

E to’afitu ni turisi ma se faiaoga maulu, sa tau saili i le vaiaso ua tuanai i le motu o Palau, e pei ona sa ripotia mai e le vaega fa’asalalau a le ‘Island Times’.

Na mua’i taunu’u ia leoleo o le setete mai Peleliu ma Koror i le nofoaga na tupu ai le faalavelave, fa’ato’a taunu’u atu ai taavale mai i le ofisa o le Marine ma se vaalele.

E toatolu ni tamaiati ma ni alii se to’alima sa faapea ona a’afia i lenei faalavelave.

PALEMIA FOU A TONGA

Ua tofia nei ia ‘Aisake Eke e avea ma palemia fou o le malo o Tonga, ma o le vaiaso nei lea ua faamoemoe e fa’aleoina ai lana ‘au ofisa fou.

Na ta’ua e seisi mai totonu o le malo le fa’aulufaleina o suafa o ni tagata, ae e le’i fa’amautuina se lisi mautu e aveina atu i le Tupu e pasia mai.

E to’a 12 sui o le a avea ma minisita o kapeneta, e aofia ai ni sui e to’alua mai i le aiga tupu.  Ae o le taimi nei, o lo’o avanoa pea tofiga mo Minisita o Fanua, Mataupu i le va i fafo faapea Vaega’au, lea e masani ona umia e sui mai i le aiga tupu.

E to’a 16 sui o le Palemene, na o latou filifilia Eke e avea ma palemia i se palota faalilolilo sa faia i le aso 24 o Tesema.

FESOASOANI A NIU SILA MO VANUATU

O lo’o ua iai nei i Vanuatu ia ni fomai o le mafaufau, mai i Niu Sila, ina ia mafai ona fesoasoani i tagata o lea atunu’u, e tusa ai ma o latou a’afiaga i le mafui’e malosi lea na lu lu i totonu o le atunu’u i le lua vaiaso ua tuanai.

O lenei aumalaga, e aofia ai fomai o le mafaufau, tausimai, o se fomai tipitipi ma se fomai lautele.

Ua mafai ona mauaina lenei fesoasosani ona o se talosaga aloaia mai i le malo o Vanuatu aua auaunaga o le soifua maloloina, ua mana’omia vave e le atunu’u.

E le o se taimi muamua lenei ua faapea ona agai atu ni fomai faapitoa faapenei i Vanuatu.  O le taimi mulimuli, o afa e lua, o Judy ma Kevin, i le 2023.

FAAMASINOGA I NIU KALETONIA

Ua fa’asaoina mai nei ia se tina o se tamaititi e fa tausaga, na alu mo le 24 itula ae tu’u ai na’o lona ola, mai i se fa’asalaga fa’afalepuipui, i Niu Kaletonia.

E tusa ai ma se ripoti a le vaega fa’asalalau, a le ‘France info’, na fa’afeso’ota’iina e le tina matua a le tamaititi fa tausaga, ia le ofisa a leoleo, ina ua na mauaina atu ia le tamaititi, o loo’o tagi mai i le faamalama o le latou fale i Noumea, ae o lo’o loka le faitotoa o le fale.

Sa ta’ua e le alii loia o Yves Dupas le a’afia o le tamaititi i ni gasegase o le mafaufau ma ua toe fa’amautuina mai ai i lenei fa’alavelave le tupu so’o o nei ituaiga faalavelave i matua, i totonu o teritori o Farani.

Na molia le tina i lona alo ‘ese mai i ona tiute faaletulafono, o se matua  ma ua ia tu’uina atu lenei tamaititi i se nofoaga e ono a’afia ai lona saogalemu ma lona soifua maloloina.

E 8 masina sa faasalaina ai o ia, e ui ina e le’i tuliina sona fa’asalaga, ae ua nofo va’ava’aia mo le 8 masina faapea ai ma le faasalaina o ia i le faatinoina o ni galuega fesoasoani mo le mamalu lautele, e 140 itula le umi.

Ua fautuaina foi o ia ina ia faataunu’uina ni suesuega mo fualaau faasaina .