TALA O LE PASEFIKA

PASEFIKA

MAOTA O TAGATA FAIGALUEGA O LE MALO O TUVALU

Ua iai nei se maota fou mo le Palemia o Tuvalu, ia Dr. Feleti Teo, ma e pei ona ripotia mai e le Tuvalu TV, e $1.8 miliona tupe Amerika, sa faafouina ai.

O le toe fa’afouina o maota a le Palemia faapea ma le Kovana Lautele, sa fa’atula’ia e le faigamalo a Enele Sopoaga i le 2017.

Sa tuai ona fa’amae’aina ona o nisi o poloketi sa tau faamae’e, e aofia ai le fale mo le aumalaga a taitai o le Pasefika i le 2018 faapea ma leisi a latou fonotaga i le 2019, soso’o mai ai ma le pepesi o le faama’i o le Koviti.

Na toe amataina galuega i le 2020 ma fa’amae’aina i le tausaga ua mavae.

LAGOLAGO A LE MALO TELE MO LE PASEFIKA

Ua pasia nei e le Maota o Sui i le Konekeresi a Amerika ia se i’ugafono e mafai ai ona faateleina feutagaiga a le malo o Amerika ma ana pa’aga i le Pasefika.

O lenei pili (Pacific Partnership Act), e u’una’ia ai le peresetene o le Iunaite Setete ina ia atina’eina ma faauluina atu i le Konakeresi, ina ia faatasi i le tausaga, ia se fuafuaga faipa’aga ma le Pasefika, e aofia ai ni sini faatuina faatasi ai ni faigamalaga, a le Iunaite Setete i motu o le Pasefika.

ENETIA A LE ATU SOLOMONA

Ua fa’amatu’uina atu nei e le Faletupe o Atina’e a Asia ia se nonogatupe e $10 miliona (tupe Amerika), faapea ma se vaegatupe e $5 miliona (tupe Amerika) mo se poloketi (renewable energy) o lo’o galuea’iina nei i le atu Solomona.

Ua ta’ua mai e le faletupe, o lenei poloketi o le a faatupeina ai ni ‘solar farms’ fou i Guadalcanal faapea ma le Malaita, faapea ai ma se polokalama e teu ai enetia i Honiara.  Faapea ma le tele o nisi poloketi mo aoga ma vaega o le eletise.

O lenei vaegatupe o lo’o aumai mai I se vaegatupe ua ta’ua o le “Saudi Fund for Development” faapea ma le paoa a le atu Solomona.  

Ua faapea foi ona fa’amatu’u mai e le malo o le atu Solomona ia se vaegatupe e $7 miliona, mai i lafoga totogia a tagata lautele.

FITI MA FUALAAU FAASAINA

Ua faaleoina e le sui Palemia a Fiti o Biman Prasad, ia sona atugaluga i le alualu i luga o le fuainumera o faafitauli tutupu mai i totonu o aoga faapea ma a’afiaga o fanau talavou, e a’afia ai fualaau faasaina.

I sana tautalaga i le faamanatuina o le 50 tausaga a le Sosaiete Faavaomaolo o le ISKCON (International Society for Krishna Consciousness), sa toe faaleo ai e le sui Palemia le mana’omia ona taofia vave, o le sosolo o nei fualaau faasaina.

I se ripoti mai a le FBC, sa ta’ua ai le saunoa foi o Prasad i le taua o le tiute a faalapotopotoga faalelotu, e pei o le ISKCON, i le taua e faasaga tau i fualaau faasaina.

FA’AU’U SE ALII I LE ATU POLENISIA FALANI SA MALO MAI I LE OLIMIPEKA

Ua faapaleina nei le alii pine auro o Kauli Vaast i se tofi (Knight) i tototonu o le atu Polenisia Falani, i se fa’atasiga sa faia i le faaiuga o le vaiaso na se’i mavae atu, e tapunia aloaia ai ia ta’aloga faaolimipeka o le 2024, lea sa faia i Paris.

Na tofutofusia uma tagata ta’a’alo a Falani ma ni fa’ailoga.