TALA O LE PASEFIKA

Pago Pago - AMERIKA SAMOA

FA’AMUTA SAILIGA MO SE ALII ATU KUKI NA PA’U MAI I SE VA’A I LE FA’AI’UGA O LE VAIASO

Ua faamutaina nei e leoleo o le Atu Kuki ia a latou sailiiliga mo se alii e 22 tausaga, e suafa ia Luke Vakayawa, lea na pa’u mai i le Lady Moana, i le fa’ai’uga o le vaiaso na se’i mavae atu nei.

O Vakayawa e malaga mai i Fiti ma na faigaluega i luga o le Lady Moana, i lana faigamalaga mai i le motu o Mangaia mo Rarotonga.

Sa ta’ua e le so’oupu a leoleo, o Trevor Pitt, sa mauaina le li’o fa’aola (lifesaver ring) lea sa taumafai e fa’asaoina mai ai Vakayawa ina ua pa’u i totonu o le sami, i le aso Lua.  Ma ua tasi le finagalo a i latou uma sa auai i le sailiga o Vakayawa, ina ia taofia a latou su’esu’ega, ina ua mae’a su’esu’ega a le ‘patrol boat’ lea sa faia i le nofoaga na pa’u ai Vakayawa i totonu o le sami.

Sa amata mai lava sailiga a le ‘patrol boat’ a leoleo i le taeao o le aso Sa se’ia o’o mai i le po o le aso Gafua.

E faapea le faamatalaga o lenei fa’alavelave, sa taunu’u se valaau fa’aola i le va’a a leoleo, o le Te Kukupa II, i le vaveao o le aso Sa ona o se tagata ua pa’u i totonu o le sami, mai i se va’a la’u oloa.

Sa faapea loa ona aga’i atu le va’a a leoleo i le vaega o le sami na iai le Lady Moana, ae peitai, i le iva o itula na mavae, ae e le i maua lava Vakayawa.

Na ta’ua e Pitt, o le a logoina e leoleo ia le tua’a o Vakayawa ma o le a tu’uina atu i le alii foma’i su’esu’e o tagata maliliu, e faia le fa’aiuga mo leisi la’asaga.

TAU LEAI FOI NI LOIA I LE OFISA LOIA I VANUATU

I se lipoti mai a le Vanuatu Daily Post, na fa’aalia ai le feagai nei o ofisa loia a le malo, e aofia ai ma le Ofisa a le Loia Sili, ma fa’afitauli i le to’alaiti o a latou loia, o galulue nei.’a

Sa ta’ua e nisi o loia o lo’o galulue nei, le mamafa o le avega o lo’o o latou tauaveina i le taimi nei.

FA’AAUAU ONA TULA’I MAI FA’AFITAULI I LE OFISA O MATAUPU FA’AVAOMALO I TONGA

O le amataga o le tausaga, na fa’aalia ai e le afioga i le Tupu o Tonga, ia Tupou VI, ia lona le fiafia e tusa ai ma le filifilia e le malo Minisita o Mataupu Faavaomalo.  Ma o le mafua’aga lea na tu’ua ai e Fekita ‘Utoikamanu ia lona tofiga ia Aperila, ae peitai, e o’o mai i le aso, e leai seisi ua toe filifilia mo lea tofiga.

Ma ua tu’ua ai le leai o se ta’ita’i o lenei Matagaluega talu ai le le’i pasiaina o Paula Ma’u, ae o lo’o fa’atalitali ia Viliamu Malolo, lea na avea ma Faatonusili o lenei ofisa, mo se faaiuga mai i le faamasinoga e tusa ai ma lana tagi e fa’asaga i le malo.

Sa ta’ua e le sui o le RNZ i Tonga, o Kalafi Moala, o lo’o iai nei se tagi a le failautusi filifilia a le Ofisa o Mataupu Faavaomalo, e faasaga i le malo ma le Komisi o Tautua Lautele (Public Service Commission), faapea le failautusi a le malo, ona o lo latou taumafai e fa’ate’a o ia mai lana galuega.

Sa ta’ua e Moala le leai o se tasi o ta’ita’ia le Ofisa o Mataupu Faavaomalo, ae o se tulaga o lo’o manaomia mo le Fonotaga a Taitai o le Pasefika lea o le a faia i Tonga i le masina fou.

Na fa’aalia foi e Moala e faapea, e tusa ai ma le taofi a le Tupu, e na o ia lava e mafai sainia feagaiga fa’avaomalo.  O lona uiga, afai e faia se feagaiga a le malo o Tonga ma seisi malo, e tatau ona pasia ma sainia mai e le Tupu o Tonga.  Ma o se tulaga o lo’o fa’amaonia mai i le Faavae.