TALA O LE PASEFIKA

PASEFIKA

FINAGALO TAITAI ITU AGAI A PAPUA NIU KINI E FA’ATE’A SUI O LE KAPENETA

Na fa’aalia e le taitai o le Itu Agai a le malo o Papua Niu Kini, o Douglas Tomuriesa, ia sona manatu ina ia fa’ate’a le alii minisita o le kapeneta lea sa molia i Ausetalia, i le fa’ao’olima i lona to’alua.

O le alii minisita o Jimmy Maladina sa molia i lona fa’ao’olima i lona to’alua i se la fe’ese’esea’iga na tula’i i Sydney i le faaiuga o le vaiaso ua mavae, ma o le aso ananafi, sa tula’i ai i luma o le faamasinoga.

E ui ina ua malolo mai mo sina taimi pu’upu’u ia Maladina, mai ona tiute fa’alekapeneta, ae peitai, ua finagalo Tomuriesa ina ia fa’ate’aina o ia mai ona tofiga fa’aletaitai, ona o le mataga ma le maasiasi ua a’afia ai le atunu’u ma le malo.

Sa ta’ua i se ripoti a le Post-Courier se saunoaga a Maladina, e ta’ua ai le tatau ona faasalaina sui o le kapeneta, e tusa ai ma a latou amioga i luma o le mamalu lautele, faapea totonu o latou aiga.

A’AFIA MASINI FALETUPE (ATMs) I TONGA, ONA O TULAGA FAALETONU I INITENETI

O le amataga o le masina sa tula’i mai ai ni fa’afitauli i totonu o Tonga, ona o feso’otaiga faale initeneti, lea na a’afia ai ma a latou masini tupe (ATMs) ma ‘Eftpos’.

Sa ripotia e le vaega fa’asalalau a le ABC’s Pacific Beat, le tulai mai o lenei fa’afitauli, na i’u ai ina sui agai i fesootaiga tau i le satelite ia nisi o ofisa telefoni.

Na fa’aalia mai foi e se tasi mai i le ofisa faasalalau a le Kaniva News le tetele o faafitauli i feso’otaiga i luga o telefoni a le Digicel, o le ola ma pe o masini ATM ae o’o lava foi i le EFTPOS, sa tau le ola mai.

O lo’o agai atu nei i Tonga se va’a lipea ‘cable’ mai i Singapore ae ua fa’ailoa mai le fa’ato’a taunu’u i le aso Tofi o le vaiaso fou.

Na ta’ua e le Kaniva News i le aso ananafi, e ui lava ua amata ona toe lelei mai le initeneti, ae iai lava taimi e pe atu ai.

FINAGALO PALEMIA FITI E FA’AAUAU LE TAUTUA A NISI O PALEMIA A LE ITU AGAI

Ua lipotia mai le u’una’ia e le Palemia o Fiti, ia Sitiveni Rabuka, ia ni minisita se to’aiva (9) mai i le Itu Agai – lea na fa’aalia lo latou lagolagoina o le alii Palemia – ina ia fa’aauau pea la latou auaunaga mo tagata o le atunu’u, sa palota mo latou.

E tusa ai ma se faatalanoaga ma le ‘The Fiji Times’, sa fa’aalia e Rabuka le taua tele o le fa’aauauina o le auaunaga a nei sui faitulafono, aua tagata o latou itumalo.

E silia ma le 200,000 tagata sa palota mo le pati o le ‘FijiFirst’ lea ua fa’aleaogaina nei, i la latou palota ua mavae atu.

Na ta’ua e le alii Faipule o Mosese Bulitavu, e toaiva ni minisita a le ‘FijiFirst’ na mauaina ni palota e 7,000.  

MALILIU NI TAGATA SE TOALUA I PAPUA NIU KINI AE FA’ALEAGAINA AI FALE MA FA’ATO’AGA

O se fa’alavelave na tula’i mai i totonu o se nu’u i Papua Niu Kini, ona o se inuga pia, ua maliliu ai nei nit agata se to’alua, ae faaleagaina ai o latou fale ma fa’ato’aga mea’ai.

E tusa ai ma se ripoti mai i le nusipepa o le ‘National’, sa ta’ua ai se alii sa fa’asuaava ae na to’atama’i ina ua leiloa lana telefoni ma fa’amisa ai ma alii na o latou inu fa’atasi.

E to’alima ni tagata sa osofa’ia e lenei alii i se naifi ona sulufa’i ai lea i lona fale, ae peitai, sa i’u ina fasiotia ai o ia, e tusa ai ma lipoti a leoleo.  

Ina ua nofo malamalama tagata ma aiga o i latou na maliliu, e tusa ai ma lenei faalavelave, sa o latou agai mai loa i le nu’u a le alii sa faatupuina le faalavelave, ma susunuina fale o aiga faapea le fa’aleagaina o latou mea toto.

O lo’o taumafai nei le alii minisita o Richard Maru, e fa’ato’ato’a lenei mataupu.

FA’AO’OLIMA SE TAMALOA NIU SILA I LONA TO’ALUA I TOTONU O LE McDONALD’S

O le ogatotonu o lenei vaiaso, sa tula’i ai i luma o le Faamasinoga Maualuga i Aukilani ia le alii o Mitesh Kumar, e tali i ona moliaga o lona taumafai e fa’ao’o le oti, i lona to’alua, ona o se faafitauli na tula’i mai i lo la va, i totonu o le fale’aiga a le McDonald’s i le amataga o le tausaga.

E tusa ai ma fa’amaumauga a le faamasinoga, sa fa’aaogaina e lenei alii e 45 tausaga le matua, ia se naifi a le McDonald’s, sa ia nanaina i totonu o le taga o lona ofu, e tatui ai lona to’alua.  

O le faamatalaga o lenei mataupu, sa ta’ua ai le tete’a o Kumar ma lona to’alua, i le 18 tausaga o le la faaipoipoga ma sa fai sa la fuafuaga e la te fetaui i le McDonald’s, faatasi ai ma le la fanau e to’alua.

Ua fa’amaonia nei moliaga a Kumar ma o Novema lea ua fuafua e lau ai lona fa’asalaga.