TALA O LE PASEFIKA

Pasefika

LOKA SE ALII I TONGA ONA O LANA TAELEGA I LE SAMI I LE ASO KERISIMASI

Na mafai ona toe tatalaina e leoleo i le motu o Vava’u, i Tonga, ia se alii e 21 tausaga, lea sa lokaina i le aso Lua (aso Gafua na i Amerika Samoa) talu ai ona sa alu sana taelega i le sami, i le aso Kerisimasi, Tesema 25, 2023.

Na fa’amatala e le tua’a o lenei alii 21 tausaga, le susuga Vava Lapota, na valaau atu leoleo ia te ia, e aumai ni moega o lona alo lea ua lokaina i le falepuipui, talu ai lona solia o le tulafono a le malo, e fa’asa ai ona ‘au’au se tasi i le sami, i le aso Kerisimasi.

Na fa’amatala e Lapota i le vaega fa’asalalau a le Kaniva News e faapea, ina ua ia taunu’u atu i le ofisa a leoleo, sa faapea le tamaitai leoleo na tiute i lena taimi, e manaomia ona loka lona atalii i le falepuipui, ona e manaomia ona fa’aulu ripoti mol ana mataupu, ae e le o atoatoa le latou aufaigaluega, ona o le aso malolo.

Ae na fa’asino Lapota i le toatele o leoleo sa iai i totonu o le ofisa a leoleo i lena taimi.

Ma sa ia fesiligia foi leoleo pe aisea na le taofia ai foi le femalagai o le vaalele o le Lulutai, lea na taunu’u ana faigamalaga i le aso Kerisimasi.

Sa fa’ailoa atu e Lapota i leoleo, le le fea o lea mea, o le lokaina o lona atalii ae le fa’asala pe lokaina foi seisi, ona o le femalagai a le vaalele o le Lulutai.

E tusa ai ma tulafono a le malo o Tonga, e le fa’atagaina se pisinisi po o se tasi, ona galue i aso Sa. E o’o foi i gaioiga e pei o ta’elega, ta’aloga, siva, fa’aleotele o musika, po o le fagota, e fa’asa i aso Sa.

Ma o lea tulafono, e fa’amamalu foi i aso Kerisimasi ma Aso Maliu.

E na o le Minisita o Leoleo e mafai ona tu’uina mai le faatagana e taofia ai lea tulafono, ona o ni fa’alavelave fa’afuase’i.

TAOFIA NI FANAU ITI I SAMOA ONA O AUGA O LE KOVITI-19

Na ripotia e le Samoa Observer i le faaiuga o le vaiaso na sei mavae atu nei, le taofia ese o ni fanau iti se to’alua, i le lala mo fanau, ale Maota GAsegase a Tupua Tamasese Meaole, i Motootua, ina ua faamaonia le a’afia i auga o le faama’i o le Koviti-19.

O lea ripoti sa mafai ona faamaonia mai e nisi o le aufaigaluega a le falemai, faapea se leoleo po, ae le mafai ona tu’uina mai o latou suafa ona o tulafono fa’alegaluega.  Ae peitai, na mafai ona fa’amaonia lenei ripoti.

Sa taumafai sui o le Samoa Observer e asiasi atu i nei fanau i le aso Toonai na sei mavae atu (aso Faraile i Amerika Samoa) ae peitai, sa le mafai ona o lo o taofia so’o se tasi mai i le o’o atu i potu o lo o taofia ai nei alo ma fanau.

I se ripoti lata maim ai i le Minisita o le Soifua Maloloina, o lo o ta’ua ai i fa’amaumauga le to’a 58 o nisi ua fa’amaonia ua a’afia i lenei fa’ama’i.

MALEMO SE TAMALOA 50 TAUSAGA MAI NIU SILA, I LE ATU KUKI

Na ripotia mai se tamaloa e 50 tausaga le matua, mai i Niu Sila, na asiasi atu i le atu Kuki e auai i le faaipoipoga a lona tuafafine, ua maliu i se taelega a le latou aiga, sa faia i se tasi o mata’aga a le atu Kuki, i se ogasami e tele ina ta’e’ele ai ia laumei.  Ma o lea foi nofoaga, ua toatele nisi ua malelemo ai i tausaga ua mavae.

Na ta’ua e Karla Eggelton, le faatonusili o le ofisa o turisi a le atu Kuki, ua tele ni polokalama sa fa’amautuina i tausaga ua mavae, e a’oa’oina ai ma fa’alauiloa atu ai i tagata asiasi atu i le atu Kuki, e lapata’i ai i latou e tusa ai ma lea ogasami.

E le gata i lea, o lo o iai ni fa’ailo i lea mata’aga, lea e ta’ua o Avaavaroa, e lapata’i ai tagata ina ia alo’ese mai i le ta’e’ele i lea ogasami.

Sa fa’amaonia e Eggelton, o lo o iai ni tulafono fou o le a amata ona fa’amalosia i leisi 12-18 masina o i luma.

LAPATA’I TAGATA CNMI MAI I LE TALIAINA O MEAALOFA

I se fa’amanatu i tagata faigaluega a le malo o le atu Mariana (CNMI), sa toe fautuaina ai i latou, ina ia alo’ese mai i le taliaina o ni meaalofa mai i isi tagata, aemaise lava i nei vaitaimi o aso fiafia.

Na ta’ua e le ofisa Su’etusi Lautele a le CNMI, e tusa ai ma tulafono a le malo, o lo o fa’asaina ai tagata faigaluega i ofisa ma matagaluega ale malo, ona taliaina ni meaalofa mai le mamalu lautele, o lo o latou tautuaina.

O le autu ma le mafua’aga o lenei tulafono, ina ia taofia ai ni gaioiga e ono solia ai ala o le tulafono.