TALA O LE PASEFIKA

Pago Pago - AMERIKA SAMOA

TOE SAUNIGA LOTU MO LE TUSITALA NA MALIU FASIA, I SAMOA

O le aso Tofi o le vaiaso ua mavae (aso Lulu i Amerika Samoa), na faataunuuina ai toe sauniga mo le tina matua Polofesa ia Dr. Caroline Sinavaiana Gabbard, i Samoa, e aloaia ai lona soifua.

O Dr. Gabbard, o se tagatanu’u o Amerika Samoa ma i le 77 tausaga o lona soifua, na maliu fasia ai o ia i Vaivase-Uta, i le masina ua tuana’i.

O le ulua’i Samoa lenei sa avea ma polofesa i totonu o Amerika ma o le vaiaso nei, e atoa ai lona 78 tausaga, pe ana soifua mai.

O Dr. Gabbard o se tina i se fanau to’alua ma se fanau a fanau e to’afa.

Sa faasaina ona auai vaega fa’asalalau i le sauniga maliu o lenei tina, lea sa faataunu’uina i le fale maliu a Sefo, Tafaigata, Samoa.

SULUFA’I TAGATA PAPUA NIU KINI, I FALESA

Ua toatele nisi o tagatanu’u o Papua i Sisifo, ua faapea ona sulufa’i atu i malumalu tapua’i, ona o vevesiga o lo’o fa’aauau pea ona tula’i mai i le va o fitafita ma vaega fa’atu’i’ese, lea na i’u ina maliliu ai se fitafita ma tagatanu’u Papua.

E tusa ai ma se lipoti mai i le ‘Benar News’, o lo’o ta’ua ai le fa’ateteleina o fetauaiga i le va o militeri Initonenisia ma vaega a Paniai, i le ogatotonu o Papua, ina ua susunuina e vaega fa’atu’i’ese a Papua i Sisifo ia se ta’avale lea na maliu ai ma le aveta’avale.

Ae o lo’o te’ena e le so’oupu a le Ami Sa’oloto, o Sebby Sambom, ia le solia e le latou vaega o ni tulafono i Bibida lea na mafua ai ona sulufa’i solo tagata o lea nu’u.

FA’AAUAU PEA ONA LOKA TAGATA FITI MOLIA I FUALAAU FA’ASAINA

Ua lipotia mai e leoleo le fa’aauau pea ona tele ni fa’alavelave e a’afia ai fualaau faasaina, o lo’o faapea ona tutupu mai.

E tusa ai ma se fa’aaliga fa’alauaitele mai i le ofisa a leoleo i le vaiaso ua mavae, sa ta’ua ai e le sui komesina o leoleo, le lokaina o ni tagata se to’a 15, ina ua maua ai ni vaega o fualaau faasaina.

O i latou e to’aono, na loka mai i a’ai ogatotonu, ma sa mauaina ia i latou ia Mariuana ma se vaega o fuala’au faasaina, e talitonu, o Aisa.

E to’atolu nisi na lokaina foi i le aso Lua o le vaiaso ua mavae, sa maua ai foi se vaega o fualaau faasaina, o le Aisa.

MANATUAINA OLA TAUTUA A LOLANI KOKO I ONA TOE SAUNIGA

O le aso Sa (aso Toanai i Amerika Samoa) sa faataunu’uina ai toe sauniga o se alo o Samoa, na lauiloa i le fa’agatama o le lakapi, le susuga ia Misa Lolani Koko, i Tuaefu.

O lenei sauniga sa tu’ufa’atasia ma ta’ita’ia e le Asosi o Tama Tuai a Avele.

O le aso 18 o Iuni, i le 60 o ona tausaga, na o’o mai ai le valaau pa’ia a le Atua i lenei lupe fa’alele a le Kolisi a Avele.

O le susuga ia Lolani, e pei ona silafia ai o ia e le lalolagi, ona o lona saoasaoa ma lona malosi, i taimi o ta’amilosaga lakapi.  

O le va o le 1983 ma le 1994 sa ta’alo ai lenei alo o Samoa, lea sa i’u ai ina filifilia o ia e ta’alo i le ‘au a le malo o Samoa, le Manu Samoa.  Ma na ta’alo foi o ia i le ‘au lakapi a Moata’a, ae e le’i malaga atu ma faamautu i Niu Sila.

E ui ina sa maua sona avanoa i le ‘au lakapi ta’uta’ua a Niu Sila, le All Blacks, ae peitai, sa tumau pea le agaga o Lolani i lana Manu Samoa, lea na ta’alo ai i le ta’ito’a 7 ma le ta’ito’a 15.  

O le fa’atumutumuga o le ta’alo a lenei alo o Samoa, o le latou ta’aloga i le 1993, lea na manumalo ai le ‘au a Samoa i le ta’amilosaga Ta’ito’a 7 i Hong Kong, ma faapaleina ai o ia o le ‘Man of Honour”.

I se molimau a se tasi o ona uso mai i le Kolisi a Avele, sa ia fa’amatalaina ai le taimi na ta’alo ai Lolani i le ‘au lakapi 15 a le a’oga, i le va o le 1982 ma le 1983.

E le gata i ta’aloga ae sa faapea foi ona manatuaina le susuga ia Lolani, i ana foa’i, e le gata mo le atunu’u ae faapea foi le a’oga.