TALA O LE PASEFIKA

PASEFIKA

TASI VAIASO AE TOLU FALE MU I SAMOA

O le po o le aso Lua o le vaiaso ua mavae, a’o faanatinati atu le Vaega Tinei Mu (S.F.E.S.A.) i le afioaga o Vaimoso, ina ua mu le fale o se aiga, ae toe maua mai se valaau mai i Falelatai, i seisi foi aiga o lo’o mana’omia se lavea’i.

I se fa’atalanoaga a le Observer ma le Komesina o le Vaega Tinei Mu (S.F.E.S.A), le susuga ia Tanuvasa Petone Mauga, sa ia faamanino mai ai e faapea, e le i iai ni isi o aiga uma e lua, sa i o latou fale, i le taimi na tupu ai faalavelave e lua.  Ae o latou tuaoi sa iloa atu le faalavelave.

Sa ta’ua e Tanuvasa, na tupu le faafitauli i le vaveao o le aso Lulu ma na vaeluaina ia le vaega tinei mu ina ia o atu isi e tali le valaau mai Falelatai ae o leisi vaega na aga’i atu i Vaimoso.

O le afi lea na tupu i Falelatai, na mafua ona o le uaea eletise.  Ma na toatele nisi o tuaoi sa fesoasoani i le tineia o le afi ma sa mafai ona fa’asaoina ai le fale ta’avale a le aiga.

Saunoa foi Tanuvasa, o le va o Apia ma Falelatai e pe a ma le 45 minute ma e taunu’u atu le vaega tinei mu, ua mu atoa le fale, toe lava o ni nai vaega sa mafai ona fa’asaoina e le vaega tinei mu.  O le fale lea e ana e se tamaloa e nofo ai na o ia ma sa malaga atu i le faleoloa i le taimi na tupu ai le faalavelave.

Ae mo le afi i Vaimoso, sa faigata ona fa’amautu le mafuaaga.  Ae na fa’ato’a iloa mai e tua’oi ina ua amata ona talali le fale.

O lo o fa’aauauina pea su’esu’ega i le mafua’aga o nei fa’alavelave.

Ae o le aso Toonai na tula’i mai ai foi seisi mu i Vaitele ma ua saunoa ai Tanuvasa, e mafua lava nei mu ona o le le fa’aeteete o aiga.  O le mafuaaga lea e fautuaina ai aiga ina ia fa’aeteete i le fa’aaogaina o le eletise, aemaise le fa’aaogaina o auli, o ogaumu ma isi lava tulaga e fa’aaoga ai le eletise.

MALIU SE ALII NA FAAMOEMOE IAI TONGA MO LE OLIMIPEKA

O le aso Toonai na se’i mavae atu nei, na maliu ai i Ha’apai, i Tonga, ia se alii e suafa ia Jackson James (JJ) Rice, lea sa faamoemoe iai le Komiti Olimipeka  ma le Asosi Ta’aloga a Tonga, e tauaveina le tagavai a le malo i le Olimipeka i Paris, i le masina fou.

Sa fa’amaonia mai e le tua’a o lenei alii, le susuga Darren Rice, i le vaega fa’asalalau a le Matangi Tonga, le maliu o lenei alii ina ua puna mai i luga o se va’a i le Aso Toonai, ma le faamoemoe e maulu i le sami, ae peitai, o lo’o masalomia, na papa’u le ogasami na maulu ai o ia.

Sa maua atu lona tino i lalo tonu o le mea na iai le va’a na puna mai ai, i lea lava aoauli ma sa le i faamanuiaina taumafaiga e toe fa’aola o ia.

Na soifua mai JJ i Amerika ae o ona matua e malaga mai i Peretania, ae na soifua a’e o ia i Ha’apai, lea o lo’o iai le pisinisi a ona matua, o Darren ma Nina Rice.

Ua mae’a ona liua ia JJ o se tagatanu’u o Tonga ma sa avea o ia ma sui o le malo o Tonga i ta’aloga fa’avaomalo, i le fa’agatama e ta’ua o le ‘kite foiling’

MAUA SE TINO MALIU I TOGAVAO O WAIKATO

O lo’o iai se talitonuga, o le tino maliu lea ua maua, o le tino maliu o le tina matua o Pauline Grey, e 67 tausaga le matua, lea sa leiloa mai i le afu i Wairere i le po o le aso Sa, lea na maua na o sona ofu i le va o Matamata ma Tauranga.

I le aso Lua o le vaiaso ua mavae na fa’ailoa mai ai e leoleo le mauaina o se tino maliu i le eria o iai afu i Wairere i le po o le aso Gafua ma o lo’o iai se talitonuga, o le tino maliu lea o Grey, e ui ina o lo’o fa’afaigata ona o’o iai vaega su’esu’e i le tino maliu, ona o le le saogalemu o le nofoaga o lo’o iai le tino maliu.