TALA O LE LALOLAGI

Pago Pago - AMERIKA SAMOA

JASON T. TUUAO - ATALII SAMOA GALUE I LE MATAGALUEGA O MEAAI MA VAILAAU I AMERIKA (USDA)

O Jason T. Tuuao, o se alo e tupuga mai i Matua na soifua a’e i Amerika Samoa, le susuga le Fa’afeagaiga EFKAS Rev. Dr. Iese Mapu Tuuao mai Pavaiai i e aiga o Sa Paogifie mai i Fitiuta Manu’a ma le faletua o Iaeli Lago’o Tuuao mai Faga’alu ma Ofu Manu’a.  Ua fa’amanuiaina fo’i lona soifua saili i le atamai ma taleni, ma ua galue nei o ia o se “Consumer Safety Officer” i le Matagaluega o le US Food and Drug Administration.  Na amata mai Kalefonia ae ua siitia mai fo’i i Hawaii ma ua fa’apea lava ona galue ai i lea tofiga taua.

Ua mae’a asiasi mai Jason i Amerika Samoa ma e matua fiafia tele o ia i le tatou atunuu, aua o lona tupuaga, e ui e le’i soifua a’e ai. Na ola a’e o ia i Kalefonia a’o fa’amautu ai matua ma le aiga, ma na amata mai ai fo’i ana aoaoga e tausailia ai le atamai e amata mai lava i a’oga laiti.

O iina fo’i sa tautua ai matua i le Ekalesia Fa’apotopotoga Kerisiano i Amerika Samoa, ma na atoa le 20 tausaga o le la’ua auaunaga i lea setete o Amerika. Peita’i i le tasuaga e 2012 ua siitia mai le la’ua auaunaga i Hawaii ma ua fa’apena ai fo’i ona siitia mai i ai ma i matou le fanau. O lo ua avea nei ma Faife’au EFKAS i Nanakuli, Hawaii.

Na amata aoga i le a’oga maualuga i le Gahr High School i Kalefonia ma sosoo ai ma le ulufale i le Iunivesite o Chapman ma ua mae’a umia ai le Bachelors of Science in Biology.

“Ina ua mae’a le kolisi sa manatu loa e saili se galuega e aoga i ai le fa’ailoga ua umia, na ou iloa lava e mafai ona maua ai sa’u galuega i le Matagaluega o le Soifua Maloloina. Na fesoasoani mai se tasi o o’u Uncles ma fa’asino a’u e tulimata’i se avanoa i le US Food & Drugs Administration USFDA, Na talosaga i galuega ma sa faato’a talia ou te faigaluega i le tausaga e 2008.”

“E ui ina le faigofie ona ausia lea ituaiga o galuega, ae ou te matua iloa lelei, o talosaga fa’atauanau a i matou ma nai matua ma le aiga, ua mafai ai ona mautu se galuega mo a’u le atali’i.”

“Sa tumau i le tatalo ma sa i ai fo’i le fa’atuatuaga e tusa poo le a le faigata, ae le mafai ona soloia ai fa’amanuiaga a le Atua pe a oo lava ina manatu o ia e toina mo oe lea fa’aeaga. E leai se mea e faigata ona e maua, e te toe manatu ina ia fa’amamulu gofie ese atu ma oe. O lea ua a’ea’e ia manu ua ulu, o le fa’amoemoe sa tuu atu i le Atua, ua tali mai, o le fa’afetai lena i matua ma le aiga i le nofo tatalo mo a’u ma le taumafaiga.”

“O lo’o faia lava le galuega, ae ua mae’a timata le upega fagota i so’o se taimi o le olaga galue, ia fai le faiva, ae ia tepa ma taula’i le va’ai i le ala na maua ai le fa’amanuiaga ua se’ei ai. Na tu’ua nai o’u matua le atumotu ina ia taumafai e faaleleia le olaga o i matou le fanau, ia mautu la i le taumafaiga le toe tepa poo le a se mea e aoga ai i aiga ma matua pe a oo ina fa’amanuia le Atua i o matou ala. O le fa’afetai sili lena, ua maua se avanoa e mafai ai ona toe fa’afo’ia le sao i le atunuu, aiga ma tagata uma e mafai ona oo i ai le tautua.”

“O si ou tina na alu tauave ana mataupu i Kalefonia ma ua maua ai lona fa’ailoga o le Tausima’i Pasi [RN], ae o le tama o le aiga le susuga le Faife’au Samoa na alu tauavea ana mataupu i le Seminare ma ua fa’amanuiaina ai i lona tofi Fa’afaife’au.

I le vaitau nei, o lo’o fa’aauau pea lava le la’ua auaunaga i le galuega a le Atua aua ua ula lava i fa’amanuiaga ma ua tini taunu’u faiva sa agaga i ai, ona o le a’ao o le Atua Soifua.”

“Ou te fa’afetaia lenei avanoa, e mafai ai ona tu’uina atu se fa’amalosi’au mo isi uma alo o Amerika Samoa o lo’o tau asaina le vao filifili o aoa’oga, Ia tatalo i le Atua e le mafai ona misia fa’amanuiaga pe a tatou faia le sailga ma le mata’u lava e tatau ai.”

“Afai ou te mafaia, e mafai foi e le to’atele o i tatou o alo o Amerika Samoa. E le o se galuega maualuga, ae a faia lava ma le fa’amaoni tiute uma ua fa’atulaga e te fa’atinoa, o fa’amanuiaga e mulimuli mai i ou ala.”

O se toe tima’i mai lea a Jasona T. Tuuao i lana fa’amalosi i fanau o lo ua amata a latou sailiga o fa’ailoga maualuluga i so’o se Kolisi poo se Iunivesite i le Malo tele, ae maise fo’i i latou o lo’o ua tapena e tausailia ni o latou fa’ailoga pe a mae’a a’oa’oga maualuluga ia Iuni o lenei tausaga.

O matua o le susuga Jason Tuuao o le susuga le Faife’au Dr. Iese Mapu Tuuao ma le faletua o Iaeli Lagoo Tuuao. O afio’aga o lona tama o Pavaiai i le aiga o Sa Paogofie ma le Fitiuta i Manu’atele, peita’i o aiga o si ona tina o le Aiga Sa Lagoo i Faga’alu ma Ofu o le Manuatele.

O lona Ofisa autu i Hawaii o lo’o i ai lea i le International Mail Facility, US Food & Drug Administration, o se vaega o le West Coast Imports.

PALE LE TAUSALA PAPUA NIU KINI - TAUSALA LALELEI O LE PASEFIKA 

Mai Samoa ua fa’ailoa mai ai le fa’aiuga o le tauvaga tausala a le Pasefika ma ua manumalo a’ia’i le tausala lalelei mai Papua Niu Kini i lenei tausaga i le tauvaga. Ua ia tauavea nei le pale o le Tausala Lalelei o Atumotu o le Pasefika, ae ua tulaga tolu ai le tausala lalelei mai Amerika Samoa, Kauhani Meaalofa Fuimaono.

O le tamaitai tausala lalelei mai Papua Niu Kini, 24 tausaga le matua, Mis Josie Nicholas ma o le fa’aiuga lea o le fa’amasinoga o le latou tauvaga sa faatautaia ai e le to’alima o sui fa’amasino i lea tauvaga.

Ua fa’ailoa mai o le tamaitai manumalo lenei o se tasi o tamaitai Su’etusi ma Tausitusi lana galuega o loo galue ai i LOna atunuu, ae o lo’o ia te ia fo’i le agava’a tau le tu’ufaatasia o sikaili eseese ma e fiafia i feso’ota’iga fa’apisinisi i lona soifua galue.

O ia lenei, sa mua’i i ai lona sootaga ma le Tauvaga Tausala a le Pasefika, aua o ia a tapena ma nafa ma la’ei o le tamaitai tausala na tauva mai mo Papua Niu KIni i le tausaga 2018, ma sa manumalo fo’i le tausala i le pale o le Tausala Lalelei o le  Atumotu o le Pasefika.O le ulua’i tausala lea na manumalo i le tofi lea mo Papua Niu Kini, le lalelei o Leoshina Kariha.

Na manumalo Josie Nicholas  i le fa’ailoga mo le Taleni; fa’apea ma le Tausala Lalelei na filifilia e le lautele, i le tauvaga lenei ua faai’uina ia te ia le tausinioga.

O le tamaitai tausala lalelei o Samoa Haylani Kurruppu, lea na ia mauaina le tulaga lua, ae sa ia mauaina le fa’ailoga o le Ofu Ta’ele sili ona matagofie.

O le tatou Tausala Lalelei Kayhani Meaalofa Fuimaono, lea na tulaga tolu, sa manumalo i lona La’ei Fa’aleaganu’u sili ona mata’ina ma le fa’ailoga o le Ata Lelei.

O lana taleni sa ia faaalia ai lana taleni o le tata fiti poo le akaropati [acrobatics] ona usu lea o lana pese. O lona la’ei na sili ona mata’ina ona o lo’o aofia uma ai fu’a a malo uma o le pasefika i lona pulupulu ae tatala ese atu lea pulupulu o lo’o ua ia la’eia le ofu suia lelei e fa’afetauia lona fika lelei ma e agatonu mo tausala lalelei filifilia.

O le tausala lalelei mai Solomona, Tiare Haro na sola o ia ma le fa’ailoga na tapena e le National Tourism  o le Fesili lelei ona talia ma lana fa’atalanoaga.

Na mua’i patipatia fo’i e Amerika Samoa le taumafaiga a le tatou tausala Lalelei i le Ta’avale Teuteuina ina ua tumati’e fo’i lana taumafaiga i lana ta’avale teuteuina, ma sa faatino le teuteuga o lea ta’avale e le Autalavou mai Tanugamanono o le Ekalesia Fa’apotopotoga Kerisiano i Samoa.

Fa’ailoa mai sa matua fesoasoani malosi i ai le tina o Kauhani i lea taumafaiga a le autalavou EFKS ma sa matua savavali lava nisi o i latou e fa’afeao ma molita’i mai le Tausala Lalelei mai le Motuosalaia i le ala atoa na fa’atulagaina e uia  e taavale teuteuina.

Sa matagofie fo’i lana fa’atalanoaga i le amataga o le tauvaga lenei, ma sa toatele fo’i i latou na latou patipatia lana taumafaiga i le ulua’i aso ua fa’alauiloa ai a latou tauumafaiga ae silamio Samoa lea na talimalo.