TALA O LE LALOLAGI

Pago Pago - AMERIKA SAMOA

Fa’ailoa i fa’asalalauga a le Leitio i Niu Sila (Radio New Zealand - RNZ Pacific) le anoanoai o i latou o fia iloa poo a mai o tatou uso i Tonga, ae maise o aiga talu mai le Galu Lolo sa aafia ai le malo o le pasefika i le fa’aiuga o le vaiaso ua te’a. 

Ua fa’asalalauina “Ua toe fa’aleleia le eletise i nisi o nofoaga mautu i Tonga, peita’i o lo’o ua motusia pea ala o feso’ota’iga tau telefoni ma nisi lava ituaiga o fa’asalalauga. Peita’i ua fa’aaogaina fo’i satelite ina ia tau mita’i ai, se tulaga o i ai le atumotu atoa o le Malo o Tonga.”

I le taimi nei ua fa’asaga le malo o Tonga ina ia auina atu latou va’a e vaaia le tele o motu laiti e i le latou malo, ina ia fa’amaumau mai le a’afiaga o lo’o feagai ai ma nisi o alaala tumau ai.

O le pa ai o le maugamu o Hunga Tonga-Hunga Ha’apai ua iloga ai ona oo atu le maualuluga o galulolo i Samoana lua, Niu SIla, Ausetalia ua oo lava i le Iunaite Setete o Amerika, Amerika i Saute ma Iapani ua fa’aiteite mai ai fa’asalalauga o galu maualuluga ma lapata’iga. 

Ua auina atu e le malo o Niu Sila va’alele e vaaia le tulaga o mea fa’aleagaina i Tonga ona o le Galu Lolo. 

Ua fa’ailoa i le lipoti a Niu Sila, “E tusa ma le 80% o le eletise na toe mafai ona fa’atula’ia i le Laumua i Tongatapu, peita’i e matua leai lava se aoga o le so’otaga fa’ainitenti i lenei vaitau, e le mautinoa fo’i se taimi e mafai ai ona toe fa’aaogaina lena so’otaga.”

O le mea muamua lava o le a fa’amautu muamua ua lelei atoatoa, o le sapalai lea o le suavai mama mo le fofoga taumafa i le atumotu atoa, e mautinoa o se taimi o le taeao ananafi, o le a mafai ai ona saunoa aloa’ia mai le ta’ita’i o le Malo o Tonga mo se fesoasoani atu mai malo eseese o le lalolagi, ona o le pagatia ua latou i ai nei.

O lo ua fa’atulaga fo’i nisi o vaega au a Niu Sila ina ia latou o atu i Tonga mo le fesoasoani lava ia fa’ao’o atu ia vave ona toe tau fa’atula’ia mai le soifuaga o tagata lautele i le mea sa i ai muamua a’o le’i lutia i latou i lenei fa’afitauli fa’anatura.

O se tasi o sui i le Palemene a Niu SIla, Jenny Salesa, sa mafai ona ia feso’ota’i e ala i le Zoom i le afiafi o le aso Sa lea sa mafai ai ona talanoa mai ma le Faife’au Ekalesia Metotisi i Tonga ma le Faife’au fo’i i Ha’apai, lea sa fa’ailoa manino, “E leai se tasi ua maumau le soifua i Tongatapu, e pau le mea ua i ai nei, ua matua tele le tauasuasu ua i ai ma le efuefu ma ua fa’aleagaina le tele o le suavai taumafa a le atunuu ma nisi o fale ua faaleagaina ae maise lava i fale e tu lata i le sami.”

“O nisi o aiga o lo’o lelei lava le sapalai o le suavai taumafa, aua o lo’o i ai a latou tanevai sa fa’atalia mai timuga, peita’i o isi uma ua faaleagaina i le ea ua tele na’ua le efuefu o lo’o ua aofia ai ai.”

Ua faailoa mai e le Red Cross i Tonga, ua mafai e i latou ona sapalaia na’o le 1200 aiga i totonu o le atunuu i le taimi nei i a latou sapalai o i ai, peita’i e le’i fa’ailoa maia poo a mea nei o aofia i le latou sapalai.

Ua auina atu foi e le malo o Ausetali a latou va’alele i Tonga e fesoasoani tele i le suesuega o mea uma ua fa’aleagaina i lea malo ona o le Maugamu ma le Tsunami ua a’afia ai. 

Ua leai lava ni lipoti mai o nisi ua maliliu ona o le galulolo ma ua va’aia i nisi o ata muamua lava o le Tsunami le i ai o fanau talavou sa manatu latou te fa’afeiloa’ia le Tsunami i le matafaga ma ua va’aia le tafea mai o i latou i gauta a’o faia o latou ofu fa’aola.

O le tauasuasu lea ma ua fa’atumulia i le pefu poo le efuefu o le maugamu, ua oo mai i Samoa ma ua fa’apena ona punitia ai le masina ma fetu o le lagi i Amerika Samoa i le po o le aso Toona’i, peita’i e toe malama ane le taeao fou o le aso Sa, ua toe oso a’e le la ua matafi uma fo’i fa’aletonu o le aso na muamua atu.