TALA O LE LALOLAGI

Pago Pago - AMERIKA SAMOA

LIPOTI MAI IA TESEMA 30, 2021 - AOTELEGA UA MAE’A FAIA TUI PUIPUIA E LE’I ATOA 70%:

Ua fa’ailoa mai, e tusa lava pe ua to’atele ua mae’a faia tui o le i le tuiga tele a le atunuu, ae le’i to’ai taunuu lava i le 70% le aotelega o le atunuu ua mae’a faia tui e lua e puipuia mai ai le Covid-19 pe a lutia ai nei le atunuu.

O le tulaga o le faitauga o lo tula’i mai ai nei ua maua le 69.3% ua mae’a tui e lua o le Covid-19; 79.5% ua na’o le tasi le tui ua mae’a faia; 11.9% e lei faia lava tui se tasi ma le 8.6% e le tatau ona tui, o le fanauiti lea e i lalo mai o le 5 tausaga le matutua.

O le tuiga lava latou o Tesema na faia ma maua ai fa’amaumauga e 7,586 tui na faia ma o le masina lona fa lea mai le fa’atulagaga o le aotelega o e ua mae’a faia tui i le tausaga atoa. Ua fa’ailoa mai fo’i ua toe maua mai le isi sapalai o tui Pfizer mo le fanauiti mai le 5 tausaga seia pa’ia le 11 tausaga le matutua.

I le taimi nei o le aotelega o tuiga a le fanau agava’a mo tui mai a’oga ua atoa ai le 48% ua mae’a tui e lua, 76.6% ua na’o le ta’itasi tui puipuia Covid-19 ua mae’a faia, 27.7% o lo’o tatalia le faia o latou tui lona lua, ma le 23.4% o le fanau a’oga e tatau ona tuia o lo’o tatalia e tatau ona faia tui puipuia nei.

Sa tapunia uma lava nofoaga mo tuiga mo le tausaga fou ma ua fa’ato’a tatala e afua i le aso Gafua lenei mo le tatou fa’amoemoe e ausia le tatou matati’a o loo mo’omia.

Mai ia Tesema 31, ua fa’amauina ai le faitauga o i latou ua mae’a tuia i le 31,499 sui. Ua pa’u fo’i le aofai o suega ua fa’aaogaina i lenei masina ona ua leai se isi malaga e lua a’i malaga mai Honolulu fa’apea fo’i ma nisi malaga fa’avaomalo ma Samoa Tuto’atasi ua faia.

O le sui e to’atasi lava na maua ane lana suega e fa’amaonia le i ai o le Verusi Covid-19 i le aumalaga mai Honolulu ia Tesema 06, ua mae’a toe tatala i tua i le afiafi o le aso Kerisimasi, e le o i ai se tasi o a’afia fo’i ia te ia.

I le taimi nei, e matua leai lava se tasi o nofoia le Falema’i fa’apitoa e fa’anofova’ava’aia ai i latou ua masalomia o lo’o i ai le Covidd-19 ina ua mae’a maua ia i latou verusi coronavirus e ala i a latou suega na faia.

O le aotelega o i latou ua mae’a maua mai suega fa’amaonia o le Covid-19,  mai malaga uma ua toe fa’afo’ia mai o tagata Amerika Samoa mai fafo, e 11 i latou i le to’atasi lenei ia Tesema 06, 2021.

2 KOMITI FOU - KOMITI O LE SAOGALEMU I OLOA FEFA’ATAUA’I & ENETIA SUI TOTINO TOFIA:

Ua mae’a ona fa’asalalauina fa’alauaitele tusi faapoloa’iga a Kovana Lemanu e fa’alauiloa mai ai ana Komiti Fa’afoe e lua ua tapena ina ia mata’i ma taga’i toto’a i tulaga o fefa’ataua’iga o Oloa gaosi eseese e aga’i mai i totonu o le atunuu ma auina fo’i i fafo, ma le tulaga fo’i o le saogalemu a’ia’i o le atunuu.

“Ua afua lenei taumafaiga fou, ina ia mautu lelei ona taga’i toto’a i tatou uma i ala e saogalemu a’ia’i ai o tatou tagatanuu ma ia faia mea uma a’o i ai se Komiti latou te iloilo toto’a i ala uma e ono sofa’i mai ai le saogalemu o le atunuu e ala i oloa fefa’ataua’i poo isi fo’i mea uma lava tau femalaga’i o tagata.”

“E i ai mea e ao ina fefa’asoa’i ai ta’ita’i ina ia vave ona faia fa’ai’uga tatau e fa’amalosia ai le tulaga saogalemu a’ia’i o le atunuu ae maise fo’i o oloa tau mea taumafa, ia le maua ai se isi fo’i ala e fa’auia mai ai ni gasegase ma lamatia le soifua o tatou tagata o tausamia na oloa.”

Ua fa’ailoa mai e Kovana Lemanu Mauga, “Ina ia mautinoa ua va’ava’aia toto’a nei ala e lua, le saogalemu mai i mea taumafa fefaataua’i ma le fa’atulaia o le Komiti o le Saogalemu e ao ina galulue maumaua’i e fa’amautu le saogalemu, ia va’ai toto’a i tulafono mo le gaosiga o mea taumafa ma auina mai i le atunuu, ia taga’i toto’a fo’i i mea o gaosia ai mea taumafa nei fa’atasi ai ma le taga’i toto’a pe o a mai le sapalai o mea taumafa i le atunuu, o le a mautu ai lea fa’amoemoe o le Malo.”

Ua fa’atulaga ina ia lipoti mai le Komiti fou lenei i le afioga le Kovana, e tusa o latou faamaumauga ma le tulaga o i ai le saogalemu o le atunuu e ala i fofoga taumafa, ma le gaosiga o oloa fefa’ataua’i mai i totonu o le atunuu i masina ta’itasi.

O lenei tusi fa’alaua’itele ua fa’alauiloa ai nei Komiti ma latou sui tofia e galulue e fa’atino galuega ua fa’ailoa mai, o le a suia atoa ai nisi o suiga sa mua’i faia i le GM 019-2020 e fa’atutu aga’i i Mea Taumafa ma le Suavai Taumafa ma Komisi tofia e fa’ataunuuina galuega tima’i aua le saogalemu o le atunuu.

O le isi tusi fa’alaua’itele na sainia fa’atasi i le aso lava e tasi, ua fa’ailoa mai ai le Enetia ma le Komiti Fa’afoe e taga’i toto’a fo’i i le saogalemu o lea sapalai e fa’afoea ai le atunuu i le lumana’i.

Ua fa’atula’ia fo’i lea Komiti Fa’afoe ina ia latou taga’i toto’a i ala e mafai ai ona lava pe fa’aauau le gafatia ona sapalaia le atunuu atoa i le tulaga tau Enetia, lea e matele i le gaosiga lea o le Eletise i le atunuu.

O le isi vala e tatau lava ona taga’i toto’a i ai, le tulaga ia lava le sapalai o le eletise mo aiga uma o le atunu’u e aofia ai ma fale tetele o le Malo ma isi Kamupani ma aiga e tauau e manatu ina ia fa’atutuina pe fausia i le lumana’i.

Ua i ai nei le avanoa ua fa’atulaga ina ia toe sailia mai ai nisi ala e mafai ai ona maua mai ai le eletise poo le enetia pe afai o le a le toe maua pe lava le suau’u ma kesi e fefa’ataua’i mai i le atunuu. O le isi lea matafaioi a lea Komiti e ao ina faia.

O le komiti lea e ao ina latou lipoti ane i le Kovana e fa’atasi i le kuata o le tausaga, ma ia lelei fo’i a latou sailiiliga ma o nei ala e maua ai le eletise fa’aopoopo ma ia mautu mo le lumana’i o le atunuu.

O nei mea uma ia fa’aaoga ala nei, ae le fa’alapisia ai le Siomaga e afua mai le Ea se’ia oo i le laueleele ma le Sami i le gataifale.

Ua fa’ailoa mai fo’i e le Kovana Sili, o lenei fa’asalalauga ua suia atoa ai nisi fo’i o tusi sa mua’i fa’atula’ia ai nisi Komiti Fa’afoe mo lea vaega o tautua lautele a le atunuu poo le GM 019-2020 e fa’asino i le Enetia ma Sapalai o le Enetia i le atunuu.