TALA O LE LALOLAGI

Pago Pago - AMERIKA SAMOA

PASIA MAOTA O SUI A LE KONEKERESI - SIITAGA TOTOGI O VAEGA AU

Ua fa’ailoa mai nei ua pasia lelei e le Maota o Sui o le Konekeresi a le Malo tele le pili e siitia ai totogi o fitafita uma o vaega au a le Malo tele. Ua fa’ailoa mai fo’i, e mautinoa lava e pasia nei fo’i e le Senate lea lava pili.

O le pili lea ua pasia nei e le Maota o Sui o le Konekeresi ole aotelega o le seleni e $768piliona mo le NDAA poo le National Defense Authorization Act 363-70.

O le NDAA i lana nofoaiga lona 61 lenei ua latou pasia ai se siitaga e 2.7% mo le vaega au atoa lava e aofia fa’atasi ai ma vaega uma e aufaatasi i le puipuiga o le saogalemu atoa o le Malo tele, ma o le a fa’amanuiaina ai fo’i ma Amerika Samoa, aua e matua iloga le tautua a le tatou teritori i le militeri ma le maualuluga o le faitau aofai o tatou sui e ulufale i le vaega au i tausaga taitasi.

Mai le tele o tausaga o lo’o ua tula’i mai lava Amerika Samoa e sili lava o latou sui e ulufale i vaega au, pe afai e fua fa’atatau o le faitau aofai o le faitauga o le atunuu. Ua tumati’e lava Amerika Samoa i le to’atele o a latou fitafita tauto ma ua tautua nei i le vaega au, nai lo se isi teritori ma setete o le Malo tele atoa.

O le vaega tupe ua mae’a pasia nei e le Maota o Sui o le Konekeresi ua aofia ai le $7piliona e toe una’ia malosi ai le saogalemu a’ia’i o le Indo-Pacific, fa’apea ma le saogalemu o Taiwan, ma ia tapena ai le fa’ataututu atu i le tau fa’amata’u mai a le Malo o Saina i ana meatau ua i ai nei.

O se isi vaega tele o lea lava faatupega ua faatulaga ina ia toe iloilo toto’a ai fa’aiuga ma suiga tetele na feagai ai ma fitafita a’o feagai ma le taua i Afakanisitana, e aofia ai ma sauaga fa’aleituaiga ma isi uma ituaiga o faiga mataga sa a’afia ai fitafita a’o fetaua’i i na tafa o taua.

E i ai nisi maga o lea lava pili sa fa’auia atu e le tatou Faipule Uifa’atali Aumua Amata ma ua pasia fa’atasi ai nei. O ia vaega o le pili e aofia ai fesoasoani mo pisinisi laiti ma le tulaga i otaota fa’aniukilia i le Atu Maleasala ina ia ‘aveesea ina ia mautinoa ai le saogalemu o le soifua o tagata lautele i lena teritori ma ia le a’afia fo’i le gataifale i le moana fagota.

MANUIA TUIGA I LE ATUNUU - ITUMALO OGATOTONU

O le aotelega o tui ua mae’a faia i le va o Tesema aso muamua e oo atu ia Tesema aso 3, mo le tuiga fa’alauaitele o le Koviti-19 Itumalo Ogatotonu i le vaiaso ua te’a, ua fa’ailoa mai le 3,130 ma o se tasi fo’i o faitauga ua maualuga tele lona aotelega talu mai ona faia tuiga o le Covid-19.

Ua fa’ailoa e le taitai o le Komiti Fa’afoe o le Covid-19, Talauega Elesalo Ale, “O le tuiga lenei ua iloga lava le lava sapaia e le falelima, aua ua matua maoa’e le aofai ua tatou maua, ae o le to’atele fo’i o le atunuu sa mua’i vevesi lava i le maua ai o le alamanuia mo le fanauiti. Toeiititi lava pa’ia le 5,000 o tui e faia pe ana i ai foi nisi metotia fa’atauanau e fa’ataunuuina i lea lava taimi e tasi i lea lava aso. O se galuega tele ma ua fa’afetaia le mamalu o le atunuu fa’apea le aufaigaluega uma sa tuufa’atasia o latou loto i lea fo’i fa’atofala’iga taua i le atunuu.”

I le taimi nei ua tula’i mai nei le aofai o le atunuu ua mae’a faia tuiga i le 67.1% ua mae’a tui e lua o nei tui puipuia o le Covid-19; 74.9% ua mae’a faia tui taitasi, 16.5 e le’i faia ni tui i le aotelega o i latou uma e tatau ona faia tui i le atunuu. O le 8.6% o le faitauga aofai o le atunuu e le tatau ona faia ni tui nei.

O le vaiaso lenei sa fa’aauau ai tuiga fa’alauaitele mo le Itumalo Sisifo i le aso Lulu ma le aso ananafi. 

E ui ina ua fa’atulaga o le aso patino mo le tuiga lona lua i le atunuu, Aso Lulu ma le aso Tofi o lenei vaiaso, ae ua lualuagia fo’i i le gasolo o le mamalu o le atunuu ina ia mua’i fa’amautu latou alamanuia tau lafoga a le fanau mo lona tufatufaga lona lua lenei. O le tuiga lea sa fa’atulaga mo le falelima i sisifo o el atunuu.

O le tele o fa’amanuiaga nei mo le fanau, sa fa’aalu sa’o lava i teugatupe a le mamalu lautele o le aufaigaluega a le malo, peita’i o nisi sa fa’auia i pusa meli, ae o nisi sa tufatufaina mai i le Gov. Rex Lee Auditorium e pei ona fa’ailoa atu, aua ua leai ni pusa meli i a latou faila o Lafoga totogi.

Ua fa’ailoa mai fo’i, e le’i taitai le taeao, e ta ane le 6:00 i le taeao ua mae’a tumu saisai le pakaga a le falemeli, ua o atu tagata e siakia latou pusa meli pe ua mae’a fa’auia i ai latou lafoga a le fanauiti.

FA’AMONIA MALAGA HAWAII AIR IANUARI - MATI 2022

Ua fa’amonia e le Hawaiian Airlines le ma’ea ona fa’atulagaina o malaga i le va o Honolulu ma Pago Pago mo le kuata muamua o le tausaga e 2022 e pei ona fa’atalosagaina e le afioga i le Kovana Sili, Lemanu Peleti Mauga. 

O malaga fa’amaonia ua fa’atulaga mo Ianuari 6 ma Ianuari 27; Fepuari 17, fa’apea ma Mati 10 ma Mati 31. 

I le fonotaga a le Komiti Fa’afoe o le Koviti-19 i le amataga o le vaiaso lenei, sa talosagaina ai e le ta’ita’ifono ia sui o le komiti ina ia iloilo ma taga’i i le fuafuaga o malaga mo le masina o Aperila e o’o atu ia Iulai, ina ia vave faia se fa’aiuga.