TALA O LE LALOLAGI

Pago Pago - AMERIKA SAMOA

TAPENA TUIGA FAFAU - FA’AALIA FALEMATA’AGA I AUKILANI

O se va’aiga lea i le Tuiga Fafau ua mae’a tapenaina e le susuga Tuifa’asisina Korina Seiuli Lee, o le tamaitai fo’i o lo’o ia fa’afoea le Au Siva Fa’afiafia a le Taupou Manaia Productions i Amerika Samoa, Samoa, Niu SIla ma Hawaii. Ua iloga lana lea fo’i fa’atofala’iga i le atunuu, ma ua molimauina e nei malo uma, ana taumafaiga lelei i lea agaifanua, o Fa’afiafiaga Fa’asamoa.

O lo ua la’eia le Tuiga Fafau e le tamaitai talavou lalelei o Lorrina Melanie Seiuli Lee, ina ia fa’aalia ai le matagofie o lea Measina a Samoa pe afai o le a la’eia e Taupou poo Manaia Samoa.

O le afuaga o lea faaaliga o le Tuiga Fafau i Aukilani, ona sa maimoaina e nisi o lea Falemata’aga i Aukilani le fa’aaliga tele o tu ma agaifanua tau fa’afiafiaga a le Taupou Manaia Productions sa malaga atu i Niu Sila ina ia fa’aofi fo’i le Taupou Manaia Dance Group a Aukilani ma Ueleigitone i le Taupou Manaia Productions i le tausaga 2018. 

“Ua iloga ona fa’afiafiaina i latou i le sausaunoaga a le ausiva, e le gata ia i matou na masi’i atu mo lea fa’amoemoe maualuga, ae ua fa’apena foi i le tapenaga a le ausiva ua avea nei ma lala malosi i Aukilani ma Ueleigitone i Niu Sila. Ua latou va’aia ai le onomea ma le tausa’afia o nei fanau talavou i a latou sausaunoaga, ae o loo latou la’eia uma Tuiga Fafau Samoa,” i se tala fiafia lea a Tuifa’asisina Korina Seiuli Lee.

Ua fa’amautu nei lea mana’oga, peita’i ua fa’auilavea loa le Covid-19 ma ua le toe maua se avanoa e fa’ao’o lelei atu ai le Tuiga Fafau ma le Tala’aga o le Tuiga, ua mae’a tapena ina ia tuuina lea i le Falemata’aga Auckland War Memorial, peita’i ua le mafai ona ua poloka feoa’iga ma femalaga’iga.

Fa’ailoa e Tuifa’asisina, ua mae’a pu’eina ata ma fa’auia atu, ina ia mafai alauta le taua’ao aloa’ia atu o lenei Measina a Samoa mo le fa’aaliga.

“O lo ua mae’a tapena fo’i le fa’aupuga e tusa o le sui ua la’eia le tuiga fafau, ‘O le afioga Taiaopo Tuifa’asisina Lorrina Melanie Lee’ - Measina: Tuiga Samoa - 4 Vaega,” o se tala lea a Tuifa’asisina. “E le gata i lea, ae ua ofoina atu ma se gafa puupuu lava o le tamaitai Taupou i le ata: ‘Taiaopo’ igoa Taupou - Afioga Le Na Au i Ao, Afioga Seiuli mai le afio’aga o Solosolo, Apia, Samoa. O se tasi e tupuga mai ia Seiuli Polesi Jacob Lee, o le augatama o le tamaitai Taupou i lenei ata.”

“O le suafa Matai Tuifa’asisina - O le suafa Matai Ali’i mai lo’u tupuaga mai Faleasiu, Apia, Samoa. O lo’u tupuaga mai lou aiga tina, Le Aiga Sa Salamo, tina matua o Netini Mata’utia Leaupepe Solomona Lee.”

“O le fa’aupuga lenei sa fautuaina ai lo’u nei sui, e le afioga I’iga Fofo I.F. Sunia, ina ua saili fo’i se iloa e mafai ai ona taua’aoina ma le tausa’afia lava lenei measina, ma sona tala’aga ia agatonu ma le aganuu a Samoa. Ua iloga ai, o lenei measina e teu mau ma fa’amautu e aiga i o latou Sa’o Tama’ita’i, ina ia soloa’i i ai tamaitai o Aiga, o le ala lea e ao ai ina avea ma Tuiga Fafau, ina ia mafai ona fa’aofi i so’o se ao o tamaitai, matutua pe talavou, ae tasi lava e soloa’i atu e fa’aaoga.”

Ina ua fesiligia Tuifa’asisina e tusa fo’i o lona avanoa e na te tapenaina ai lea fa’amoemoe maualuga o le Fale Mata’aga tele i Aukilani, Niu Sila, ae ua ia fa’ailoa, “Masalo o nisi nei o fa’amanuiaga e te le ano i ai mai se amataga o se taumafaiga se’ia oo i lona fa’aiuga. Peita’i o le Atua e sisila pea o ia i so’o se mea e te faia ma lou loto poo tonu ma sa’o lelei le afuaga o au galuega fa’atino uma. Ina ia ou maua le avanoa, e muamua lava fa’afetai i le Atua o manuia, le Atua o fa’amanuiaga uma, ona ua tafa le finagalo, e fa’aea ia te a’u e ala i lea auala. E le o mea tele, ae atonu e sau aso e alu aso, ae fa’aauau atu lenei fa’atofala’iga i sona fa’aeaga e ta’ua ai lo’u sui fa’atauva’a i fa’amaumauga aoga mo le atunuu pele Samoa, ma ana measina tau fa’afiafiaga ma teuga uma e tatau ai.”

O le tuufa’atasia ai o le Tuiga e tele mea taua ua fa’aautu lava ia Amerika Samoa ua ia fa’aaogaina. Le atunuu ua soifua a’e ai Taiaopo Lorrina Tuifa’asisina Seiuli Lee. O le siapo ma ona mamanu ua fa’aaogaina o se measina e taula i ai le silasila i lea la’ei Samoa, e ta’i uma i ai le fafauga o le Tuiga, o le mamanu masani ma lanu auga i atisi a Amerika Samoa. Ua fa’apea fo’i i lona la’ei Siapo Samoa, ua iloga mai mamanu a atisi Amerika Samoa, ua masani ai Pritchard Designs.

Ua fa’ailoa e Tuifa’asisina, “E faia se sauniga mamalu o le feiloa’iga aloa’ia mo le taua’aoina aloaia atu o lenei measina, pe a mavae le fa’asa o le Covid-19, ma ua tatala aloa’ia feoa’iga.”

“O se mea ua va’ai toto’a atu i ai aua e le o toe mamao lenei fa’amoemoe, ma o se isi mea lelei ua amata ai, ona o le a fa’alauiloa fa’atasi ai ma sina tala’aga puupuu o lenei tamaitai talavou ua ia la’eia le measina a Samoa, le Tuiga Fafau. Fa’afetai tele i le Bluwave, Aukilani Niu Sila mo nei ata ua fa’auia mai mo le fa’asalalauga,” sana toe fa’afetai lea.

FA’AALIGA AUFAI FA’ATO’AGA AMERIKA SAMOA, ASO FA’AFETAI 2021

Ua tapena le Matagaluega o Fa’ato’aga a le tatou Malo mo le fa’atautaia le Fa’aaliga o Fua o Fa’aeleeleaga a le Atunuu, le Fa’aaliga lea o Fa’ato’aga i le aso Fa’afetai.

O le nofoaga fa’atulaga e faia ai o le  Malae o Suigaula a le Atuvasa i Utulei amata i le aso Tofi, Novema 18 e oo atu i le aso To’ana’i. 

Ua tatala mea uma mo lenei fa’aaliga o Fua o Faaeleeleaga ma Lafumanu, ua fa’apea fo’i ona fa’aalia ai ma so’o se ituaiga o taumafa Samoa ua fa’ananau i ai le to’atele, ma ituaiga mea’ai ua kukaina masani mo so’o se tasi i le atunuu, ua mafai ona laulauina fo’i mo le fofoga taumafai o e maimoaina lenei fa’aaliga tele.\

Ua fa’atulaga le isi itu tele o le fa’aaliga mo le Aufai Faiva ma Tautai Fagota o le gataifale o le atunuu. O lona uiga, ua tatala mea uma i le fa’aaliga lona tolu lenei o le tausaga, ma o le fa’aaliga lea ua sili ona lava tapena i ai le vasega o faifa’ato’aga, aufaifaiva ma le vasega o e gaosia taumafa eseese i le atunuu atoa.

Ua fa’ailoa mai e amatalia lea fa’amoemoe i le Talotaloga muamua i le taeao ona soso’o ai lea ma le sauniga mamalu e tatala aloa’ia ai le Fa’aaliga o Fua  Fa’ato’aga, Lafumanu ma Faiga Faiva o le Gataifale. Ua le gata fo’i i lea, ae ua fa’aalia ai so’o se mea taumafa gaosi ma la’ei eseese ua gaosia ma fefa’ataua’i ai le atunuu lava fa’aaliga tele.