TALA O LE LALOLAGI

Pago Pago - AMERIKA SAMOA

FA’ATUPEGA DMWR MAI LE NOAA MO LE FA’ALELEIA O A’AU

I se pepa o fa’amatalaga ua fa’ailoa ai le $591,594 ua fa’auia mai e tufatufaina i galuega ma poloketi e ‘auga i lea fa’amoemoe, galuega fa’atino e fa’aleleia atili ai le A’au. Peita’i e auina fa’atasi mai ma lea fa’atupega o se pepa o le maliliega ina ia usita’ia ma galulue fa’atasi ai lea matagaluega o le tatou Malo ma le NOAA ina ia mautinoa o lo’o fa’aaoga tatau i ai le seleni ua toina mai.

Fa’ailoa le fa’afetai tatou sui i le Konekeresi Uifa’atali Aumua Amata, i lea matagaluega o le tatou Malo, mai le ta’ita’i Fa’atonusili Taotasi Archie Soliai o le DMWR ma le aufaigaluega atoa, ona o le galulue fa’amaoni ma atina’e le gataifale o le atunuu ina ia mautinoa o fa’aleleia, ae maise fo’i o le latou fa’amautu o fa’amaumauga uma ina ia mafai ona fa’aauau le toina mai pea o fa’atupega nei a le NOAA i le atunuu.

“Fa’afetai galulue punoua’i i tiute ma faiva e mafua ai ona maua pea nei fesoasoani tupe mai le NOAA, ua le gata i le pulega a le tou matagaluega ua tuana’i, ae o le soloa’i mai fo’i o ta’ita’i o tula’i mai nei. Ua fa’apea fo’i ona fa’afetaia le aufaigaluega a le NOAA i le tatou atunuu ma i latou i le Ofisa Ulu a le Malo tele i le susuga le Pule Sili Dr. Richard Spinrad mo lea fesoasoani a le Malo tele i lo tatou teritori. Ua iloga lava i tausaga ta’itasi le fa’amatu’u mai o nei fesoasoani ma o le fa’ailo fo’i lea o le tuu mai o latou tau’au mo i tatou i le teritori ina ia tatou maua uma sosia nei e fa’aleleia atili ai le tatou Gataifale ma ona sosia mo le mamalu lautele o le atunuu ae maise le tatou Malo.”

“O se isi lava mea e sili ona fa’afiafiaina ai le agaga, ona e le o taofia lava le faia pea o ituaiga faiva eseese sa masani mai ai o tatou tautai mo le fagotaina o le tatou gataifale.” O se toe upu lea a le afioga Uifa’atali Amata i lana saunoaga fa’amalo ma le fa’afetai.

O fa’atupega mai le NOAA e aoga tele mo poloketi ua mae’a fa’atautaia, fa’aauau suesuega i mea e a’afia ma mea fo’i e aoga e fa’aolaola lelei ai a’au o setete ma teritori, toe fa’aulu nisi poloketi fou e aoga i le fa’aleleia atili pea o a’au ma ia fa’ateleina i’a ma meaola uma i o tatou gataifale.

VAIASO MUAMUA I FONOTAGA FA’ALEAOAOGA TAYLOR FARMS - MUAMUA

Ua fa’ailoa mai ma le agaga fa’afetai e le tamaitai o Fiapia Tasi Taito le tele o fa’asoa aoga, fetufa’iga o manatu, ae maise o tima’iga tu’uina atu ma le agaga fiafia i sui uma o le aufaigaluega fou a le Taylor Farms Northwest, lea na masi’i mai le tatou malo.

“I le taimi muamua sa tau le mafai ona talanoa mai, ae ua fa’asolo pea lava fetufa’iga, ua iloga ai nisi o mea e mana’omia lava ona ave i ai le fa’amuamua, a’o fa’agasolo pea le soifua tautua o nei uso, tuagane ma matua o malaga mai e faigaluega i nei avanoa lelei. O le fa’afetai, e matau lava i latou uma i le soifuaga o le Samoa o le fa’aaloalo, va’ai i e matutua, e matele ina le taliupu pe fa’aali gofie o latou lagona ma ootiaga.”

“O le ala lea o le muamua lava ona tima’ia i latou i le vaiaso muamua lenei, “Ia e fa’amuamua ona e alofa ia te Oe!”

“Ua manatu ina ia mua’i fa’ataua lava lou mana’oga tupito, puipuia lou tagata ia soifua saogalemu a’o i ai iinei e faatino tiute ma faiva. Ia sapaia ni ou gasegase, ia e fa’ailoa atu o oe o se tagata e taua lou soifua maloloina ma ia lelei ona e fa’ailoa atu, sa a’oa’oina lelei oe ina ia e iloa lelei tausia lou tino ma lou tagata atoa.”

Ua mae’a le vaiaso muamua, ae ua mae’a auai uma le to’atele na masii mai ina ia auai i nei fetufa’iga mo le lua itula o le aso ua atofa ai e aofia i le fetufa’iga.

“Poo a lava ni mea sa fa’anenefu ia i matou, ua avatu uma lava i fafo, aua e sili ona fetufa’i i ai mo ni avanoa e mafai ai ona fa’aleleia, ae leaga le nofonofo ma ni fa’aletonu i le mafaufau, e ono toe mapuna mai ua le manogi lelei,” o se tala ata lea a’o se mea e tonu ona faia a le tina o Telesia Sami, o se tasi o le aufaigaluega.

“O lo’u fa’anaunauga lea e i ai, o le mae’a atu o lenei tausaga na sau ai, ae ua mautu le va’ai patino ane lava ia te a’u lava ia, faia fa’amalositino ia fa’aititia le mamafa, ae ia foliga ua tele se suiga lelei mo a’u. Ona o lenei vaiaso, o le ‘auga, ia alofa ia te oe.” 

O tima’iga sa avatua i le mamalu o e na auai i vasega ta’itasi i le vaiaso atoa.

“Ia tausia lelei oe, lou tino ma lou mafaufau, ia saunia mo galuega i aso ta’itasi; Ia i ai sou taimi mo oe lava, e teuteu lelei ai ou tino ma faia lelei ou lavalava, fa’atino lelei nisi mea o tau fa’aletonu mai lau va’aiga lautele ia te oe; ia lava lau malolo ina ia malosi le tino mo galuega o le isi aso o soso’o mai. O mea patino fo’i nei, ua iloga ona tele ai manatu fa’aalia o le aufaigaluega,” o se tala lea a Fiapia Taito.

“O le vaiaso lona lua o le fonotaga fa’aleaoaoga lenei, o le a amata ai ona taga’i toto’a i le fa’atumuga o le tele o pepa e te agava’a ai e faigaluega, lou malamalama lelei i tulafono o le faigaluega ai i lau Konekarate sainia ma le Kamupani lenei, fa’atasi ai ma ou uiga feso’ota’i ma le pulega o lo’o e faigaluega ai, ma le isi fo’i uso faigaluega o lo’o lua galulue fa’atasi.” 

“E tele lava mea ua iloga mai, e mana’omia ai lenei ituaiga o fonotaga fa;aleaoaoga ma le aufaigaluega o lo’o ua masii mai e faigaluega iinei,  ua tele mea ua aoga mo i matou, ae silisili ona lelei fetufa’iga tima’i mo i latou o malaga mai, ia fesoasoani i lo latou nonofo fa’atasi, faigaluega fa’atasi ma fetufa’i i tiute ma manatu ma isi fo’i ua loa ona faigaluega ai i lenei kamupani, ia malamalama fo’i i lo latou va fealoa’i ma le pulega e pei ona fa’ataoto lelei mai le latou konekarate faigaluega,” se toe fa’asoa mai lea a Taito.

VAEGA TUPE MO LE FA’ALELEIA O UAFU I AMERIKA SAMOA

I se pepa o fa’amatalaga ua fa’ailoa ai e le tatou Faipule i le Konekeresi Uifa’atali Aumua Amata, “O le taimi nei i le tele o Uafu tetele i le atunuu atoa, ua matele ina tele ina tuai le fela’ua’iga esea pusa oloa tetele ina ia fa’ato’ai taunuu lelei i setete ma teritori ua tatau ona oo i ai i le taimi atofa mo fela’ua’iga ma feoa’iga i le vasa. O lona uiga ua tuai tele lea gaoioiga e mana’omia lava ona fa’avave. Ua iloga ai fo’i o le a i ai fo’i se fesaosoani a le Konekeresi ina ia fa’aleleia le tautua lea mo setete ma teritori.”

Ua matauina mai e le Konekeresi ua tuai tele le tulaga o fela’ua’iga o uta ma pusaoloa tetele ma o se taimi sili lea ona tuai talu mai le 30 tausaga o lea tautua. O lona uiga i totonu o le 45 aso, ua tatau ai ona faia feutaga’iga uma ina ia fa’avave lea tautua, ma e amata mai lava mea uma i le fa’atupega e tatau ai ona fa’aleleia nei tautua se’ia oo i le fa’atinoga a’ia’i o le fa’amoemoe, ia fa’ata’alise le tautua.

Ua tuuina atu i le vaega o Inisinia a le USArmy latou te fa’ailoa maia poo a tonu lava mea e tatau ona fa’aleleia, ae maise lava i tulaga o i ai Uafu o setete ma teritori ta’itasi, ua fa’atulaga mai fo’i le $4piliona  e toe fa’atautaia ai galuega toe fa’aleleia atili o Uafu i setete ma Teritori uma.

O le pili lea ua fa’ailoa mai e Uifa’atali Amata ua ia una’ia fa’atasi atu ai ma pili uma mo tatou malaeva’alele laiti ma galuega o le malaeva’alele tele i Tafuna, ma ia fa’aleleia atili ai fo’i ma feoa’iga i le atunuu i le va o tatou motu ma fesoota’iga ma le falema’i tele i Faga’alu, ia vave ma lelei ona feso’ota’i ma tatou malaeva’alele laiti ma uafu laiti.