TALA O LE LALOLAGI

Pago Pago - AMERIKA SAMOA

FA’ALAUILOA SIAPO MA LE SUA O LE U’A I NEW YORK E LE “FA’ASAMOAARTS”

O le aso Faraile na te’a nei, sa fa’alauiloa ai e le tamaitai o Regina Meredith ma Su’a Uilisone Fitiao le la’ua folasaga ua faaalia nei i Pearce Green Gallery i New York le a’ai tele ma le pisi o le Iunaite Setete, ma ua tele ai fo’i fefa’ataua’iga e lolofi i ai mo ni avanoa e folasia ai latou oloa fia fa’alauiloa ma fa’atau atu.

“O mamanu uma ua folasia mo le maimoa a nisi e to’atele i lea falemata’aga o Mamanu Samoa Moni. O le galuega fo’i ua folasia, o le galuega faitele a i matou ma le susuga le Atisi lauiloa i lona avea ai ma Tufuga Ta Tatau, Su’a Uilisone Fitiao ma le ma’ua vasega faapitoa ua mae’a fa’atuina ma ua a’oa’oina ai fanau e agaga i lea taleni, le Fa’alapotopotoga a le Fa’asamoaArts,” ose  se fa’asilasilaga lea a Meredith.

“O le matou galuega fa’atino ua folasia, ua matele i le Siapo ma ona Mamanu Samoa moni, ma le sua o le u’a, le vali Samoa Moni e tusia ai ata o Siapo. O nei mea uma e matua talafeagai ma le Siomaga mama e leai ni ona lapisi e ono a’afia ai le Siomaga, aua o mea uma e maua mai le siomaga.”

“E le gata i lea, i le mamalu sa maimoaina le matou folasaga ma fa’afofoga fo’i ma le toto’a i ai, sa lagona ai le mafanafana ma le agaga toafilemu mai le tatou atunuu, a’o fevesia’i le lalolagi i fa’ama’i pipisi ma le mata’utia,” o se tala fiafia lea a Meredith.

“O oloa ua fa’atau atu ma folasia mo le maimoaga ma fefa’ataua’iga, ua aofia ai pupuni fofoga matagofie ma le saunia lelei o latou mamanu Samoa moni. E gaosia fo’i i le siapo o le pau o le la’au samoa. Ua taua’aoina atu nei oloa taua sa gaosia i a’ao o le fanau ua i ai i le Fa’asamoaArts ma ua avatu ma se agaga o le alofa mai le tatou atunuu.”

O le vasega fa’apitoa a le Fa’asamoaArts i le vaitau o le tu’uaga umi o a’oga faapea ma le vasega o le Fine Arts i le tatou Kolisi Tuufa’atasi, o i latou na e ona uma sao ua fa’auia i lenei folasaga matagofie i New York.

E ese mai Faia’oga Atisi lauiloa o le Fa’asamoaArts, ua i ai sui e to’alua o le vasega Atisi a le tatou Kolisi ua auai fa’atasi ai i le aumalaga lenei i New York, o i la’ua nei o Atamai Tuiolosega ma AJ Afano.

Ua le gata ina folasia nei measina a Samoa i le fa’aiuga o le vaiaso, ae ua faafofogaina fo’i pese Samoa matagofie ua taina fa’aleotele ma ua sisiva aga’i i ai le au malaga.

“Ua ese fo’i lagona ina ua ta pesega a Samoa i lea a’ai mamao ma le pisi, ua sisiva ma le agaga ua toe fo’i i laueleele ma aiga pele,” o se tala fiafia lea ma le misialofa a le tamaitai faia’oga.

Ua fia fa’afetaia e le aumalaga ae maise o faiaoga Reggie Meredith ma Su’a Uilisone Fitiao le tamaitai o Liz Curtis ma Pearce Green o i la’ua nei e ona le fale mata’aga ua fa’aalia ai nei measina a le tatou atunuu, ma ua faapea fo’i ma se tasi o alo o Samoa, Tony Meredith, lea sa tele i ai feuiuia’iga o lenei taumafaiga ia fa’alauiloa a tatou measina i a’ai pisi o le Malo Tele o Amerika.

O le a tumau pea lea folasaga mo le maimoaga a le mamalu fegasoloa’i i lea a’ai se’ia oo ia Novema 15, 2021.

FA’AALIGA O TATAU A “TISA’S TATTOO FEST 2021” 

O fa’aiuga o le vaaso nei o le a fa’atautaia ai lava le fa’aaliga tele o Malofie, Tatauma Malu ma isi lva ituaiga o Pe’a ua taina ma nisi fo’i e fia ta latou pe’a i le fa’aaliga a le “Tisa’s Tattoo Fest 2021.”

I le tausaga ua te’a, e ui lava ina tetele a’afiaga o le fa’asa a le Covid-19 i le lalolagi atoa, ae pau fo’i lea o le fa’aaliga tele fa’aletausaga e le’i taofia pe tolopoina ai.

O lo ua fa’aaogaina fo’i ala fa’atafailagi fa’aneionapo tau fesootaiga e fa’atautaia ai pea lenei fa’aaliga tele o Tatau ma Pe’a ua fiafia i ai le mamalu lautele o talavou a le atunuu i so’o se mea o nonofo ai i lenei vaitausaga.

O fa’asalalauga masani uma ua fa’auia lea i le Facebook. O le amataga o lenei fa’aaliga o le a amatalia i le aso Toonai nei i Alega Beach ma e fa’ato’a faamae’a i le aso Sa ma o le a tele mea ua fa’atulaga e fa’atino i lea taimi atoa. 

O le a i ai fa’afiafiaga eseese ua masani ona faia i fa’aaliga fa’apea ua te’a, ma e mafai ona maimoaina mai fafo a’o fa’atautaia lava nei fa’aaliga, pau o le ma o le eseese o taimi o nofoaga o alaala ai le lautele o tatou tagatanuu.

Ua fa’ailoa mai e le tamaitai sa matuaina lenei fa’amoemoe mai lona amataga, Tisa Faamuli, “O le tausaga lenei o le a fa’alauiloa ai, le faiva o le tagata ua mae’a la’eia le malofie, ma ona tiute e ao ina faia i tulaga o aiga ma le aganuu fa’asamoa i lona aotelega.”

“E fa’ataua ai le tautua a le Soga’imiti i lenei tausaga. O le isi lea mea o le a fa’alauiloa i le fa’asologa o fa’afiafiaga ma mea ua fa’atulaga i le tausaga nei mo le fa’aaliga. O sui uma fo’i o le a oo mai i Alega i lea fa’aaliga, o le a fa’amauina e avea ma ni sui totino o le Asosi a Tatau Samoa.”

“Ua vala’auina fa’apitoa fo’i aiga ina ia fa’aavanoaina se taimi e asiasi mai ai ma maimoaina e le fanau talavou lea fo’i agaifanua a Samoa. E le gata i lea ae o le a maimoaina ai fo’i ma le itulagi o le Siomaga matagofie o lo’o ua tausia lelei i Alega, le Ea malu, le sami tioata ma le Laufanua lauolaola lanumeamata.”

O se tala fiafia lea a le tamaitai o Tisa Fa’amuli e tusa o le taumafaiga ua naunau e faaalia i lenei tausaga i le Tisa’s Tattoo Fest 2021. “Peita’i o se mea sili ona taua, o le a tofo ai sina palolo mai le siomaga o Alega.”