TALA O LE LALOLAGI

Pago Pago - AMERIKA SAMOA

AMATA LE GALUEGA O LE UAFU O VA’A LAITI I MALALOA - KONEKERATE A LE SILVA GROUP:1 

Ua fa’ailoa mai ua avatu se avea’i a le vasega o e faiva’a fagota Longliners i le PRFMC ina ia fesoasoani mai i se taumafaiga e maua ai se isi avanoa e taula ai latou va’a fagota i le Uafu o Vaa Fagota Alia, aua o lea o le a amatalia le galueaina o le Uafu o va’alaiti lea e taula ai i latou va’a.

O le poloketi tele lenei sa vaevaea lea i ona vaega e tolu mo le tauofoga i le tau fa’asiusiuga o le nofoaiga a Kovana Lolo Moliga, ma ua fa’atulaga ai le vaega muamua o lea galuega e fa’atautaia e Silva Group Construction.

Ina ua fesiligia le sui o lea Kamupani i se tulaga ua i ai le galuega i le ogatotonu o le tausaga ua te’a, ae ua fa’ailoa mai, e muamua i mea uma ona taumafai muamua i latou e fa’ataoto le ata ma le fausaga o le Uafu ua mana’omia. O lona ata lava le vaega muamua, soso’o lea ma pasia o lea ata o le galuega ma e fau aga’i i ai le galuega, ona fa’ato’a la’u mai lea o mea e gaosia ai. O le mea mulimuli lava o le fa’ailoa atu i le mamalu lautele le galuega ma ona a’afiaga i le tulaga o feoa’iga ma le taulaina o va’a faila ma va’a fagota alia faapea ma va’a fagota ituaiga o Longliners.

O le taimi nei, o lea ua oo mai la i le vaega lea sa fa’ailoa mai, o le a’afiaga o feoa’iga ma le taulaina o va’a laiti o loo fa’aaogaina lea Uafu, ua fa’atulaga ai le 45 aso ua faaavanoa mo ni fa’amatalaga e tusa o lea galuega mai le mamalu lautele o le atunuu, le vasega o le au faifaiva ma le malo fo’i i fuafuaga e patino i se nofoaga fou e taula i ai va’a laiti ae o lo’o fa’atautaia le galuega soso’oga o lea Uafu, i lona itu e agai mai i Pago Pago.

Ua aofia ai fo’i i lenei taimi atoa, se avanoa mo se fa’afesili tau le Siomaga o lea galuega ina ia fa’atautaia le galuega ae ua saogalemu lagona uma e ao ina nofouta i le tele ma le aoga o lea galuega atina’e a le Malo.

Ua mautinoa sa tele ni fa’afesili a le vasega o faipule ma senatoa o le fono faitulafono e tusa o lea galuega ma lona taimi e tatau ona amata ai. O lo ua mautinoa o le Matagaluega o Uafu ma Malaeva’alele o lo’o ua avea ma matagaluega e mataituina lea galuega mai lona amataga se’ia oo i le fa’aiuga, ae o le matagaluega o Galuega Lautele lava latou e va’aia le fausaga o le galuega ina ia fausia e tusa ai o le ata ma ona aiaiga uma o aofia ai.

O le Matagaluega o Uafu ma Malaevaalele sa sa latou fa’alauiloa fa’asalalauga fa’alaua’itele e tusa o ni fa’afesili tau le siomaga ma ni fa’afesili tau le fausaga o le galuega tau le soso’oga o le Uafu o Va’a Fagota Malaloa.

O le tuatusi ua tuuina mai mo ni fa’afesili ma manatu fa’aalia e tusa o lenei galuega, ua fa’auia mai ai le upega tafailagi https://americansamoaport.as.gov/ e mafai ai ona e maimoaina le aiaiga atoa o le galuega ma o le a mafai fo’i ona fa’auia mai ai sou manatu, pe o le fa’ao’o ane lava o lau tusi i le Ofisa Autu o le Matagaluega o Uafu ma Malaeva’alele lea ua mae’a fa’atula’ia nei i le fogafale muamua o le Pago Plaza i le taimi nei.

Pe afai e mae’a lelei Vaega 1 o lenei galuega ua mae’a tauofo ma taua’aoina, o lo ua aofia ai le fa’alolotoina atili o le Uafu o va’a fagota lenei i Malaloa, Fa’alautele lea lava Uafu ma o le a mafai ai ona maua lelei se nofoaga e taula i ai va’a fagota Longliners, fa’atautaia ai ta’aloga i le tai mo Tautai Fagota, lava fo’i ma le nofoaga e taula i ai va’a faila ae maise ai va’a faila malaga mai fafo.

O le faamoemoe ia fa’alautele le Uafu lea ona ua mautinoa ua lelei fo’i le maketi mo le Alapakoa lea e fagotaina mai e le vasega o Fagota Lonliners mai totonu o le tatou sone fagota, o lea ua mae’a fa’atulaga mai le a’ano o le i’a lea e tapena ai e le tatou Kamupani I’a le Pepa I’a fa’apitoa mo le Vaega Au a le Malo Tele ma le Militeri atoa a le Iunaite Setete o Amerika.

Ina ua talosagaina e le vasega o va’a fagota Lonliners le fesoasoani mai a le PRFMC i se nofoaga saogalemu mo i latou e taula ai latou va’a, na talileleia mai lea fanoga ma ua fa’auia mai ai le fa’atupega e fa’atautaia ai se suesuega tatau mo lea fa’amoemoe poo le galuega ua tau amatalia nei.

Na talosaga fo’i le Matagaluega o Uafu ma Malaeva’alele i le Initeria mo se faatupega aua le galuega lava lea e tasi ma ua mafua ai ona fa’ataunuuina lea fa’amoemoe lelei.

FA’AILOA MAI E SAMOA LE MAFUAAGA O LE FA’ASA O FEMALAGA’IGA I LE TATOU VA:

Ua mae’a fa’alauiloa e le Matagaluega o le Soifua Maloloina ma o le taitai fo’i o le National Emergency Operations Committee i Samoa Leuasa Dr Take Naseri, o le mafuaga tonu e le fa’atagaina ai femalaga’iga i le va ma Amerika Samoa, ona e le’i mae’a fa’amaonia mai pe o maua sui e toafa na maua ane ua maua mai le Covid-19 i malaga tuusa’o mai Hawaii.

E ui ina ua taofia pea le faimalaga mai o va’alele tetele mai Ausetalia ma Niu Sila, ae ua taofia va’alele laiti mai Amerika Samoa, ua le mautinoa ai e nisi e to’atele pe mafua i se a lenei taofiga. O lo ua sosolo foi i Niu Sila ma Ausetalia le Delta Variant lea e fefefe i ai Samoa.

O lo ua fa’ailoa mai o e uma lava o malaga i Samoa, o lo’o malaga atu lava ma nonofo ai, e toe fo’i mai nei malaga a va’alele e leai nisi o toe taliu pe malaga mai ai.

Ua i ai fo’i ni suega e 10 ua auina atu nei e le NEOC mo le suesuega pe maua i le covid-19 ina ua sola i tua se tasi o sui sa nofova’ava’aia ma maua atu i le Western Union. O e uma na feso’ota’i ma le tama lea, fa’atasi ai ma ana suega, ua auina atu i fafo mo nei suesuega a le CDC mo Samoa.

Ua ta’ua e Agafili Shem Leo, “Ina ua matou fa’asalalauina fa’alaua’itele ata o le tama lea na sola ese mai le nofova’ava’aia, sa maua uma mai fa’amatalaga a i latou na feso’ota’i ma lea sui ma ua atoa nei le 70 o i latou ua nofova’ava’aia talu ai le sola i tua a lea sui.

O lea faitauga lea e tauau e ono fa’aopoopoina atili pe a oo ina uma lelei ona faia suesuega i e uma na fetaui ma feiloa’i lea sui na sola i tua mai le nofova’ava’aia.

O lo ua mae’a aumaia uma i totonu le aiga o lea sui fa’atasi ai ma nisi ua o ane lava i latou ona ua mae’a fetaui ma lea sui.

Ua fa’ailoa mai e Agafili, ua mae’a fa’aoo atu le talosaga i le afioga le Palemia mai le latou fo’i itu o le tautua, ina ia toe tolopoina isi malaga uma mai Ausetalia ma Niu Sila se’i mua’i mae’a le galuega o lo’o fa’agasolo nei e tusa o le suega atoa o nisi e ono a’afia i le sui ua sola i tua mai le Nofova’ava’aia.