Tala o le Lalolagi

Pago Pago, AMERIKA SAMOA

AMATA ONA I AI SUI LE USITA’I O LE AUMALAGA FAIGALUEGA I LE TAYLOR FARMS

Ua iloga mai e le o toe faigofie uiga o nisi o le aumalaga na filifilia mai Amerika Samoa ina ia faigaluega i le Kamupani Tele a le Taylor Farms Northwest Inc. i Kent, Washington. 

“O mea lava ia sa fautuaina ai i matou, peita’i ua malamalama foi i a’afiaga fa’apenei o tagata e masii ese mai o latou aiga ina ia auai mai e faigaluega i se isi setete, ma se isi lava nuu e matua le masani ai,” o se tala lea a le alii pule o le galuega atoa i Taylor Farms, VLadivar Diaz.

E le o i ai se fa’avaivai o nei ta’ita’i ma pule o galuega i le latou aumalaga na masi’i muamua mai Amerika Samoa, e pau le mea e fia malamalama lelei ai i latou, poo le a se vaega o le galuega ma le taumafaiga e aumaia i latou e le o fiafia i ai le mamalu na masii mai.

O le aumalaga muamua lea na fa’ato’ai mai, e sailia mai i le taeao na soso’o mai e fa’amatamata ma taumafai e fa’ailoa ia i latou le galuega, ia fa’amasani ma faatulaga o latou taimi e galulue ai, ua amata ona onana i latou. Ua fai pati ina ua fa’anonofo i nofoaga lelei e faigaluega ma nonofo lelei ai.

E mautinoa ua mae’a ona solituina e i latou nei nisi o aiaiga tamau o le malaga mai e faigaluega. O le mea ua oo mai i le vasega o le pulega, ua matua le malamalama i latou pe aisea ua faapea ai?

“O le to’atele lava ua amata ona faigaluega. O nisi e to’aititi ua matua le faigaluega lava, e foliga mai e te’i pe aisea ua sau ai? Ua leai ma se manatu e usu mai e faigaluega? Afai o lea tagata sa faigaluega i Amerika Samoa, e mautinoa lava sa ia silafia lelei, e tatau ona faigaluega e maua ai le tamaoaiga tausi o ia lava ma lona aiga.”

“Ae afai e le’i faigaluega, sa manatu ina ia maua se galuega e totogi lelei ma lava ai le faasoa. O lea ua ia maua lena avanoa,” o se tala lea a Bernard McFarland, le atalii Amerika Samoa sa tele lona fa’atuatuaga i ona tagatanuu latou te fa’aaogaina tatau lenei avanoa ua maua i ana taumafaiga.

Ua talosagainaaiga uma sa malaga mai le latou alo i nei taumafaiga, ia fa’amalosi mai ia i latou ia amio tausa’afia. O Diaz, sa matua fiafia ina ua maua lenei avanoa mo tagata Pasefika e fia galulue i le latou Kamupani, ma ua atili ona fiafia ona o si ona to’alua pele ia te ia, o le tamaitai mai Samoa. Ua fai si te’i o lea tama i le taimi nei, sa le manatu e le talimana’o fa’apea nisi o le tatou atunuu.

“O lea ou te malamalama e i ai lava nai sui o le a fa’asea pe le fiafia mai le amataga, ae o le a maua se avanoa e mafai ai ona galulue pea, amata ona fa’amasani ma tuuavanoa i ai i lo latou lagona ootia. Peita’i, o le isi vaega itiiti lea e i ai i le aumalaga, o le matua le fa’alogo ma ua le faigaluega mai lava i le taimi na to’ai taunuu ai,”  sana fa’amatalaga lea. 

Ua fa’atautaia nei ni fonotaga a le pulega, ina ia soalaupule i latou i le isi gaoioiga e ao ina faia, ae mautioa o le a auai ma le sui o le tatou nusipepa e fa’alogo i le fa’aiuga o le a fa’atino. Mautinoa e tuu avanoa lava le Kamupani, ona o tulaga malamalama i omiga o le alu ese mai le aiga o so’o se tasi, ae o le a le avea ma alofaga, pe afai o le a fa’aalia e sui nei sa le galulue, poo le a tonu se mea o manatu ai i latou, e tatau ona faia. O se mea e maofa ai, ona sa totogia atu e oo i le tau o pepa malaga mo sui nei, ae o lea ua tatala lava le nonofo i faletalimalo i inuga pia.

O le itula e 4:00 i le afiafi o le aso ananafi sa faia ai le fonotaga e fefa’aalia ai taofi o i latou uma sa malaga mai, pe afai o i ai se isi mea e fia fesili ai, pe o se mea o fa’aletonu ai lana nofo i le fa’amoemoe na tu’ua ai lona aiga, ae malaga mai e galue mo se suiga o lou fo’i aiga.

O le a fa’ailoa atu fo’i nisi o latou fanoga, ma ni fa’aiuga o le a taumafai le Kamupani a le Taylor Farms e faia mo i latou.

FA’ATELEINA PUSAMEA TAUMAFA NA TUFATUFAINA ATU E “LEND A HAND”

Sa va’aia le fa’amalieina o i tatou na taua’aoina Pusa Me’a’ai e tele na tufatufaina i le aso Faraile ma le Aso Toona’i e le Lend a Hand Foundation. O i latou na mafai ona oo ane i lea nofoaga “Church of All Nations 111 112th Street, Tacoma, Washington 98445, na fa’amalieina i latou i le tele o oloa mai fa’ato’aga, o pusa fuala’au ‘aina mata e mafai ona fa’aaogaina e le aiga atoa mo le masina atoa.

Ua le gata i lea, ae ua sii atoa mai fo’i o pusa mea’ai ma meainu, ua mae’a tapenaina lelei uma, ma meaai tu’u apa o so’o se ituaiga, ua aofia i nei pusa o mea’ai na latou tufatufaina atu  i le mamalu lautele.

“O ituaiga mea nei o lo’o faia lava i fa’aiuga o vaiaso ta’itasi, ina ia mafai ona fa’asoa atu i e uma o lo’o i ai se mana’omia i totonu o latou aiga, ae maise le tausiga lelei o la le tino e ala i mea’ai ma vaiinu,” o se tala fiafia lea Fiapia Tasi Taito, lea e fa’atautaia le Lend a Hand Foundation ma si ona aiga.

I le va’aiga lautele, ua i ai nai uso, o tagata lanu, i ai fo’i nai tagata atumotu ma nisi e to’atele mai sasa’e tutotonu, o e uma lava ua va’aia e i ai le mana’omia.

“E le o ni mea’ai ua fa’aleaogaina lea e tufatufaina atu. O lo ua fa’ato’a fa’aleaogaina nei mea’ai i le tausaga fou, ae o lo’o lelei atoatoa mo le tausiga o le soifua maloloina,” o se tala lea a se tasi na va’aia le fiafia ina ua masiii atu ana pusa o oloa eseese o mea taumafa i ona luma, siakia lelei fo’i e ia poo ni oloa ua fa’aleaogaina nei oloa.

MAUGA O SIONA LEONE - SAUNIGA O LE TAUNUU MAI O LE TALALELEI

O le fa’amanatuga o le “Aso Sā ole Tala Lelei" e faia lava lea i le Malumalu o Siona i Leone, i tausaga ta’itasi i le ulua’i aso Sa o Setema, e fa’amanatu ai pea le aso 24 Aukuso, 1830 lea na ulua’i fa’ato’ai i ai le Talalelei i Sapapali’i, Savaii.

O le tala’aga o le Talalelei, na muamua lava aga’i mai Misionare i Leone, ma latou taula mai i gatai, peita’i e le’i afea le afio’aga, ae na latou muamua va’aia le nuu to’afilemu, sa latou fa’aaauau lea o le Malaga ma fa’ato’a afea ai Sapapalii ia Aukuso 24, 1830.

O Leone ua fa’amauina le latou ava, “O le Faga o Atua” aua na toe fo’i mai lava i ai Ioane Viliamu i le tuanai ai o le lua tausaga ma afea mai loa Leone i Oketopa 12, 1832 ma aumaia le Talalelei ua malamalama ai Samoa na lua e oo mai i lenei vaitau. 

O lo ua fa’amauina fo’i le oo mai o Ioane Viliamu ma le Talalelei i le va’a o le Savali o le Filemu, na malaga mamao mai Lonetona, lea e fa’aigoaina ai le latou talitonuga fa’akerisiano, Lonetoena Misionare Sosaiete. Ua avea lea mau ma se tasi o taeao iloga ia Samoa, ua laulauvivilu ai failauga uma, “O le Taeao na malamalama ai Samoa i lona Atua, le taeao nai Mataniufeagaimaleata.” O le malaefono lea o Sapapali’i, Savaii.

Ua aga atu nei le EFKAS i Leone  mo le atoaga o le 190 tausaga talu ona taunuu mai le Talalelei i ona laufanua i le tausaga a sau, 2022, ao lenei tausaga ua atoa i ai le 191 tausaga talu ona suluia Samoa i le malamalama o le Atua, ina ua malamalama o tatou tagata i le Talalelei ia Iesu Keriso.

O le sauniga i Leone sa ta’ita’ia lava e le Taitaifono Fa’aeteete Saifoloi mai Amuia, auai fo’i ma Rev. Lisi Thompso o Asili & Afao, ma Rev. Iese Fa’avaoga mai Leone EFKAS.

E le galo i ta’ita’i o Ekalesia Kerisiano uma lea aso iloga i le latou faiva e feagai ai ma le galuega a le Atua o galulue ai, aua o le ulua’i malamalama lea sa ulufale mai, ma latou aumaia fo’i le Tusi Pa’ia ma fa’aliliuin i le tatou Gagana Samoa.

Ua le gata ai le galuega i Samoa na malamalama i ave o le galuega Kerisiano a Samoa, ae sa auina atu i Solomona, Elise, Tuvalu, Tokelau ma Papua nisi ma lea lava fe’au taua o le Talalelei.

Ua le o toe mamao nei, o le masina fou, ona fa’amanatuina lea e le Ekalesia i Leone, Siona le Mauga Pa’ia, le atoaga o le 191 tausaga talu ona oo mai le Talelei i Leone ma Amerika Samoa atoa.