Tala o le Fono Faitulafono

Pago Pago - AMERICA SAMOA

Na te’ena e le Senate i lana tauaofiaga i le aso Faraile na te’a nei, i le faitauga fa’alua o le tulafono taufaaofi a le Maota o Sui, lea na taumafai e toe teuteu tulafono a le malo, e mafai ai e le Senate ma le Maota o Sui ona fa’amaonia sui o le Komiti Fa’afoe a le falema’i o le LBJ.

I lalo o le tulafono o lo o i ai nei, e na o le Maota Maualuga lava e tu’uina atu le pule e fa’amaonia ai sui o le komiti fa’afoe ua filifilia e le ali’i kovana. Ae o le tulafono taufaaofi a le Maota o Sui o lo o talosagaina ai. maota e lua o le Fono Faitulafono e fa’atino le fa’amaoniga o ia tofiga. 

E le o se taimi muamua lea ua taumafai ai le Maota o Sui e sui tulafono o lo’o i ai nei. I tausaga ua mavae, sa i ai foi isi tulafono taufaaofi mai le Maota o Sui, ae peitai e le’i manuia ia taumafaiga ina ua teena e le Maota Maualuga. 

FAAIUGA O MATAUPU ELE’ELE MA SUAFA

Na pasia e le Maota Maualuga i le tauaofiaga i le Aso To’ona’i, se tulafono taufaaofi a le Maota o Sui e ala mai i le Faigamalo e tu’uina atu ai le pule i le Ofisa o Mataupu Tau Samoa e fo’ia ai feeseeseaiga tau fanua ma suafa matai.

Ua leva ona ma’ea pasia e le Maota Maualuga lana foi tulafono taufaaofi faapea e ala mai i le faigamalo, ma o lo’o taoto atu i le Maota o Sui mo lana faaiuga. 

I le tuuina atu o le taulafono taufaaofi a le faigamalo i luma o le Fono Faitulafono, na taua ai e le afioga i le ali’i kovana ia Lemanu P. S. Mauga i ta’ita’i o Fono e fa’apea, o le tuai o fa’ai’uga o se fe’ese’esea’iga o fanua ma suafa “e fa’alavelave ai le to’afilemu ma le maopoopo o le fa’afoega o mataupu tau aiga ma nu’u”.

“O lenei pili o le a mafai ai ona faagasolo se mataupu i le Faamasinoga Maualuga [a Amerika Samoa] pe a le mafai ona foia i le ono masina talu ona tuuina atu i le Failautusi o Mataupu Tau Samoa,” o le tusi lea a le alii kovana, ma fai mai se talosagaina a le faigamalo i le Fono Faitulafono mo lo latou pasia o lenei pili taua. 

I le iloiloga a le komiti a le Senate i le amataga o le tausaga nei e uiga i le tulafono, na taua ai e molimau a le malo e faapea, o le faaumiumi o feeseeseaiga i fanua ma suafa matai - o nisi o taimi e umi ai tausaga e oo atu i le 20 tausaga - na mafua ai ona tuuina atu e le Faigamalo a Lemanu ma Talauega lenei pili e toe teuteu ai le tulafono o loo i ai nei.

Ma o afioga i senatoa sa saunoa i le iloiloga e lata i le tasi le itula, sa latou fa’afetaia ai le tulafono ua fuafuaina, ma sa latou fa’ailoa fo’i le tulaga moni o le i ai o suafa matai ma mataupu tau fa’aleaganu’u ua tele tausaga o toso solo.

O le teuteuga o le tulafono o lo o i ai nei o lo o taua i totonu o le tulafono taufaaofi, o lo o faaopoopo mai ai le aiaiga fou lenei: “pe afai e uma le ono masina mai le aso na tuuina atu ai le fanua poo le suafa i le Failautusi o Mataupu Tau Samoa ae leai se usitaia”