TALA MAI VAIFANUA

FA'AU'U 15 TAOA E LE ASCC LAND GRANT-ACNR - MAE'A AOAO FA'APITOA I LE SU'ISU'I:

O le aso Lua na te'a nei sa fa'ataunu'u ai le fa'au'uga o le to'a 15 o toa mai le TAOA lea na a'oa'o fa'apitoa e faia'oga o le Su'isu'i mai le ASCC Land Grant ACNR DIvision, i le matata tau le Su'isu'i i so'o se ituaiga o lavalava ma la'ei, ie eseese ma teuga o maota ma laoa.

O le vasega lea na fa'atautaia e le tama'ita'i faia'oga i lea matata i le ASCC Land Grant i Polokalama fa'apitoa o le Laufanua ma Atina'e Diana Tarrant, ma ua iloga fo'i ona matua tinou o ia e mautu le tomai ua fa'asoa ma a'oa'o atu ia i latou uma na auai i lea vasega.

E tolu masina talu ona a'oa'o mai i latou nei, ma sa fa'ailoa e nisi o i latou nei o tina, "Ua aoga lava ia i matou lenei tomai. Ua matutua fo'i ae fa'ato'a toe tago e fai lenei taleni, faafetai lava, ua mafai ona fa'aavanoa le taimi o le tama'ita'i faia'oga o Diana Tarrant ina ia a'oa'oina i matou. Ua sefe le tupe ua maua fo'i le avanoa e su'ia ai lavalava ma ofu o le fanau a lata fanau. Ua tau le faaalua fo'i le tupe ae fa'asoa ane i isi mea e ao ina faia o aiga." O se tala lea a le tina l Miliama Falefata.

O le vasega suisui, sa molimauina e le tama'ita'i faia'oga, "E fai si faigata ona a'oina o lenei vasega, ae le'i umi lava ua latou iloa patino mea e ao ina tapena ma sauni mai i ai i aso ta'tasi. E ui fo'i ina tala so'o sipa o ofu ua sese na su'i, ae ua mafai ona fa'asa'o ma toe galue aga'i i ai, ua ou fiafia ua mafai ona fa'au'u ma taua'aoina tusi pasi o nei sui totoa e to'a 15 o le vasega ua mautu le iloa suisui, i le vasega amata mo le TAOA.

E to'alua sui o lea vasega ua agava'a mo le tusi pasi o le suisui sa le mafai ona pa'au atu i le fa'au'uga ona o fa'alavelave le ma'alofia. O le tama'ita'i o Analosa Pauli ma Enerieta Masoe. Peita'i o lo'o aofia i la'ua i nisi o le to'a sefululima o le au fa'au'u.

O sona manatu lea na fa'aalia ma le agaga fa'agae'etia, ma sa iloga fo'i ona patipatia e matua uma sa aofia i le nofoaga autu a le TAOA i Pago Pago i lea taeao.

"E ui ina ua tatou tino matutua, ae le o taofia ai i tatou mai le tausaili pea o ala e mafai ona fesoasoani ai i fanau ma latou aiga, ia tausia ma fa'asoa atu pea ia i latou ala e mafai ona fa'aleleia ai latou aiga, ma o se faata'ita'ita lelei tele lea mo i tatou uma."  O sana toe fa'aopoopo fa'amalo lea i le vasega fa'aiuaso.

Ona o le fiafia tele o le vasega fa'ai'uaso, e tau le nonofo filemu ai fo'i ae ua fa'asaga ane e matua fa'afiafia le vasega o i latou na vala'aulia fa'apitoa, fa'alauiloa fo'i a latou oloa o loo fa'atau atu. O le tele o latou oloa e fa'atauina lea i le latou faleoloa ma maua ai fo'i le latou lava seleni, ae o nisi sa latou su'ia lava e i latou la'ei mo latou aiga.

O i latou ua fa'ai'u ma le manuia lenei a'oa'oga ua aofia ai: Afano Sa'au; Analosa Pauli; Enerieta Masoe; Fesuia'i Muagututi'a, Fetuisaute Kaiva; Fualelupe Tia'i; Ioniti Falefata; Luisa Ma'aseia; Malia Feula; Miliama Falefata; Ofa Vavao; Rosita Godkin; Ruby Reed; Taifau Fa'agogo ma Tale Gauta.

I le saunoaga a le sui o le vasega sa ia fa'afetaia ai le fa'asoa a lenei tina faia'oga o Diana Tarrant ia i latou. Ua le natia e ia le taleni, ae ua fa'asoa ma tufa atu. Atonu o le a avea lava lenei taumafaiga ma se puna'oa i le latou TAOA i le lumana'i, aua o lo'o i ai le latou faleoloa e fa'atau atu ai latou Ofu e su'ia pe afai e le taulia i o latou afio'aga ma aiga.

I le taimi nei, ua fa'ailoa mai o le a soso'o le vaega lea ma le vasega fa'amasani i masini Komipiuta e mafai ai ona feso'ota'i ma latou fanau i fafo. E fou fo'i i nisi lea a'oga, ae ua loto lava i latou ina ia o'o maia lena taimi e amata ai lea fo'i a'oga aoga mo i latou, ia le tia'ia i latou i tua, ae gasolo i luma le atamamai o fanau i nei ituaiga o masini tetele.

"E fia maua fo'i so'u taimi e emeli ai i la'u tama i fafo, pe fai fo'i i ai sa'u post i le facebook." O le tala 'ata lea a le tina o Nunuvale.

MAUALULUGA MAI TOGI UA AUSIA E LE FANAU I SUEGA A LE MILITERI - ASVAB:

Ua fa'ailoa mai e se tasi o lo auai i le Ofisa autu o le US Army Recruiter Sgt.1st Class Josh Polonowski, "Ua maualuluga mai togi o le fanau na su'ea le suega a le ASVAB i lenei vaitau o le tausaga, ua tula'i mai ua to'aga fo'i le fanau o lo'o sailia tusi pasi nei e "faitau tusi!"

O lo ua fa'atulaga fo'i nei suega e faia ia Iuni 6, 13, 26 ma le 27 o lenei tausaga. Afai o lo'o mana'omia e lou alo ona su'e i lea su'ega, e mafai ona o'o ane i le Ofisa o le US Army Recruiter lea e i le fogafale lua o le Laufou Shopping Center Nuuuli, ma fa'atumu ai fo'i sana pepa e auai ai i le su'ega.

Ua fa'ailoa mai fo'i e mafai fo'i ona vala'au ane i le Ofisa o le US Army Reserve mo nisi fa'amatalaga, ae o le Ofisa lea o le US Army Recruiter e mafai ona alu ane i ai fanau e faia ai ana su'esu'ega fa'amasani i lea su'ega ina ia o'o atu fo'i i le taimi o le a su'e ai e ia le su'ega moni, ua masani ma ua iloa fo'i ituaiga fesili e masani ona su'ea e i latou e pasia ai le ulufale i so'o se vaega o le Militeri.

O le isi lea avanoa sili ua maua e le to'atele o tatou fanau, o le ulufale atu lea i le Militeri, ma amata ai ona faigaluega e aoga mai i aiga, ae maise fo'i o le toe a'o'oga ai i mataupu eseese e fa'amae'a ai latou tusi pasi AA, ASci, Bachelors ma o'o atu lava i Masters ma Doctrate, ae totogia e le Militeri latou a'oga.

O lo ua taumafai atili fo'i le Matagaluega o A'oga ina ia toe una'i lava le faitau ma le malamalama o le fanau a'oga i le gagana peretania po'o le Igilisi, o le ala lea e fa'aleleia atili ai togi i so'o se ituaiga su'ega lava e togi atu i le fanau a'oga, po'o su'ega a le tatou nei malo, po'o su'ega fou mai fafo, e pei o le SAT ma le ASVAB.