TALA MAI SAMOA

PASEFIKA

FOA’I E TAGATA SAINA IA LE $5K MO LE LEOLEO NA MALIU FASIA

O le aso Gafua na se’i mavae atu nei, sa foa’iina ai e tagata Saina o lo’o aumau i totonu o Samoa, ia se vaegatupe e $5,000 i le Ofisa a Leoleo ma Falepuipui, aua le susuga ia Det. Sgt. Peniamina Perite, lea na maliu fasia i le lua vaiaso talu ai, e Pokati Tu’u lea na molia i le fasioti tagata.

I se fa’aaliga i luga o upega tafa’ilagi mai i le Ofisa a Leoleo i le taeao o le aso Lua na soso’o ai, sa fa’aalia ai e le Minisita le agaga fa’afetai i le a’ai o Saina mo la latou foa’i alofa, i le ufitia ai o le matagaluega i le ao pogisa ona o le maliu o se tasi o a latou taitai.

E le gata i lea sa faapea foi ona maua mai se faamaisega mai i nisi o alo a le susuga ia Daniel Evans, le Detective Superientendent o le ofisa leoleo feterale i Ausetalia.

O le susuga i le sui malu o le malo ua maliu, o le lona lua ai lea o tagata, na maliu ona o le ua molia.  Ua mae’a ona fa’ate’aina e le afioaga o Fasito’o-Uta ia le alii o Pokati Tu’u mai o latou laufanua.  Ma sa faatinoina foi e le nu’u ia se ifoga i le aiga o le alii na maliu mai i Nofoalii , ae e o’o mai i le aso, e le’i faamautuina se aso o se ifoga mo le aiga o le sui malu o le malo.

MU LE FALE MOA A FRANKIE I TANUMALALA

Ua atoa nei le vaiaso talu ona fa’atama’ia le falea moa a le kamupani a Frankie, i le afioaga o Tanumalala, ina ua mu, e pei ona fa’amaonia mai e le komesina o le Matagaluega Tineimu (SFESA), le susuga ia Tanuvasa Petone Mauga.

Sa ta’ua e Mauga, na amata mai le mu i le fale na teu ai meaai a moa, ona agai atu lea i tua i le nofoaga sa teu ai atigipusa.  Ae e fa’afetai ona o le vave o le tali atu o le vaega tineimu i Aana, sa mafai ai ona tineia le afi ae le’i sosolo atu i isi fale.

O lenei fa’alavelave sa tula’i mai i le 4 i le afiafi ma sa mafai ona faasaoina e le vaega tineimu le tele o fale sa tu lata ane.

Ae peitai, sa fa’aalia e Mauga e faapea, o lo’o latou su’esu’eina le mafuaaga tonu o lenei mu, ona e le i amataina i ni uaea eletise.  Ae sa amata mai le mu i le fale o iai meaai a moa.

Na faamamafa mai e Tanuvasa mo le nofo mataala, ona talu mai lava le amataga o lenei tausaga, ua va’aia lava le tele o fa’alavelave i le mu o fale.

ULUAI TAGATA PASEFIKA UA TAUSINIO SAILIGA SIAMUPINI I ‘TRACK & FIELD’ A LE OLIMIPEKA

Ua ausia nei e le alii mai Samoa, o Alex Rose, ia le avanoa e tausinio ai i le sailiga siamupini o le fa’agatama o le ‘discus’ a alii, i ta’aloga o le Olimipeka ina ua au lana togi, i le 62.88 mita.

O lenei alii e 32 tausaga, o lo’o umia le pine mo le Pasefika, i lenei fa’agatama o le togi mamao (discus) i ta’aloga sa faia i Oklahoma, Iunaite Setete ia Aperila 2023.

O le 7:30 i le taeao nei o le a faapea ona faia ai le sailiga siamupini o lenei fa’agatama.

O le susuga ia Rose sa soifua mai i Amerika ma sa ta’alo i ta’aloga o le ‘football’ ma pasiketipolo, a’o aoga o ia.  Na fa’ato’a amata ona ta’alo i le ‘discus’ a’o iai i le aoga maualuga a Ogemaw Heights i Michigan.

O le 2012 sa maua ai lona sitiseni Samoa, tauala mai i lona tua’a lea na malaga atu i Amerika ma se faili a le latou aulotu.

O le 2011 na mauaina ai e Rose ia se valaaulia mai i le Afeleti (Athletics) Samoa ina ia avea ma sui o Samoa i ta’aloga fa’avaomalo.

LIMA TINO MALIU O LE A FAIA SU’ESU’EGA

Sa amataina i le aso ananafi su’esu’ega i ni tino maliu se lima o lo’o iai nei i le fale maliu i Samoa, e ni foma’i faapitoa (forensic pathologist), sa taunu’u maim ai Fiti.

O nei tino maliu e aofia ai le tino maliu o se tamaloa, na pa’u i le taeao o le aso Sa, faapea le tino maliu o se tamaititi e 12 tausaga lea na maliu mai i Salelavalu, Savaii, ina ua fanaina e se tagata a’o moe o ia, i le aso Toonai, atoa ai ma le tino maliu o le susuga i le sui malu o le malo ia Det. Sgt. Peniamina Perite lea na maliu a’o feagai ma le faatinoga o ona tiute faaleoleo.

O leisi tino maliu o le a su’esu’eina e foma’i faapitoa, e aofia ai le tino maliu o se alii mai Utualii lea e iai lona so’otaga i le maliu o le alii leoleo.

Ua fa’aalia e le komesina o leoleo, le susuga ia Auapaau Logoitino Filipo, e atoa le lima o tino maliliu o le a faia iai suesuega a fomai faapitoa mai i Fiti, i le tino maliu o alii e 45 tausaga, mai i le afioaga o Malie, lea na maliu i le aso Sa, ina ua pa’u mai luga o se niu a’o toli ni ana niu mo le suavai a le latou aiga i le aso Sa.