TALA MAI SAMOA

Apia - SAMOA

TEENA E FIGIEL MOLIAGA O LE FASIOTI TAGATA

fa’aliliu; Lali Staff

O le aso Gafua (i Samoa) sa tula’i ai i luma o le faamasinoga maualuga ia le tamaitai ia Papalii Sia Figiel lea o lo’o molia nei i le fa’ao’o o le maliu, ia Professor Caroline sinavaiana Gabbard, ma sa fa’aleoina e lana loia ia Unasa Iuni Sapolu, le te’ena e Figiel o lona moliaga.

O lo’o molia Figiel i le fasioti tagata, ma se moliaga faaopoopo o le fasioti tagata le fuafuaina, umia o se a’upega ma le fa’ao’o o ni manu’a tuga i se tagata.

O lo’o fa’aauau pea ona faia su’esu’ega o le mafaufau mo le ua molia.

Sa talosagaina e le loia a Figiel ia le fia fa’auluefaleina o se talosaga mo se vaegatupe e mafai ona tatalaina ai o ia i tua, ma ua fa’atonuina e le faamasinoga le faia o lea tulaga ae e le’i o’o i le aso 5 o Aukuso, ae o le masina o Mati o le tausaga fou, ua fuafua e faataunuuina ai se iloiloga.

Na mua’i molia Figiel i le fasioti tagata le fuafuaina ae ua toe suia lea moliaga, i le fasioti tagata, ina ua mae’a ulua’i su’esu’ega a leoleo.

O le ua maliu, o se tina e 78 tausaga mai i Amerika Samoa ma ina ua mae’a su’esu’ega a leoleo ma foma’i sa faapea loa ona fa’aliu efuefuina lona tino maliu, i le mae’a ai o ona toe sauniga.

Sa te’ena e Figiel ia le iai o sana loia ae sa ia mana’o e talanoa sa’o lava i le faamasino.

Ina ua tatalaina atu le avanoa mo sana faamatalaga, sa fa’aleoina e le ua molia sona faamaisega i le aiga o Prof. Gabbard, lea sa ia ta’ua, o sana uo mamae sa fesoasoani ia te ia, i ana tusitusiga, a’o iai i le iunivesite.

Ma sa ia faailoa atu i le faamasinoga, le leai o sona malosi i le aso na tupu ai le fa’alavelave, ina ua pulea o ia e Satani.

E tusa ai ma ripoti a leoleo, sa o’o atu le ripoti e tusa ai ma le maliu o Gabbard i Vaivase-uta, i le aso na soso’o ma lona maliu, ina ua fa’amatalaina e le ua molia, i sana uo le mea na tupu ma o la agai atu ai loa i le ofisa a leoleo.

O lo’o lokaina pea Fiegel i le falepuipui.

MOLIA NI ALII SE TO’AFA I LE FA’ATUPU FA’ALAVELAVE I LE ‘MAGIC CIRCUS OF SAMOA’

E to’afa mi alii talavou mai i le afioaga o Toamua i Samoa ua molia nei, i le umia o ni a’upega, e aofia ai ma’a ma fagu, faapea ai ma le moliaga o le fa’aleagaina o meatotino.

E tusa ai ma se ripoti mai i Komesina o Leoleo, le afioga Auapa’au Logoitino Filipino, ua mae’a ona fa’atulagaina vaegatupe mo le tatalaina o i latou ua molia, fa’atasi ai ma aiaiga, e aofia ai le tatau ona o latou o’o atu i le ofisa a leoleo i Faleata, ae le i taina le 4 i afiafi o aso Faraile taitasi, mo le sainia o latou suafa.

O lenei fa’alavelave na tula’i mai ina ua lamalama fa’ai’u fa’aaliga ma fa’afiafiaga a le ‘Magic Circus of Samoa’,  i le vaiaso ua mavae, ma sa fa’ate’ia ai le mamalu o le atunu’u, na aofia ai ma fanau iti.

Sa fa’amaonia e Auapa’au i le Samoa Observe, e to’a 15 alii talavou na lokaina e leoleo i lea lava afiafi.

Ae ina ua mae’a ona su’esu’eina auiliili lenei mataupu faapea ma le aoina o molimau, e to’afa i latou sa molia i le tulafono.  O nei alii e to’afa, e malaga uma mai i le afioaga o Toamua, ma sa fa’amaonia lo latou onana i le taimi na tupu ai le fa’alavelave.

Sa fa’aalia e le susuga ia Tupa’i Bruno Loyale, lea e ana le ‘Magic Circus of Samoa’ lona agaga faanoanoa tele ona o lenei fa’alavelave na tupu mai.  Ma sa ia ta’ua le fa’ate’ia tele o ia ona o le tupu o se mea faapenei i totonu o Samoa, aemaise ai ona e le’i tupu lava se fa’afitauli faapenei i a latou fa’aaliga i isi atunu’u.

O le fa’alua ai lea ona tupu mai lenei ituaiga fa’afitauli i totonu o le ‘Magic Circus of Samoa’.

Ma na fa’aalia e Tupa’i lona agaga fa’afetai i lana aufaigaluega ona o le lava o le to’ovae faapea ma le vave o a latou gaioiga na mafai ai ona puipuia le mamalu o le atunu’u sa auai atu i lea afiafi, a’o faatalitali le taunu’u atu o leoleo. 

O le taeao o le aso Toonai na soso’o ai, sa mafai ona feiloai ai Tupa’i ma le pulenu’u o le afioaga o Toamua, mo le talosagaina o se fesoasoani i le leoleoina ma le puipuiga o le ‘circus’ i ana fa’aaliga o totoe i totonu o Samoa.

Ma ua folafola atu le pulenu’u ia Tupa’i, o le a fesoasoani le pulega a matai faapea le aumaga a le afioaga, i le leoleoina o le ‘circu’ se’ia mae’a a latou fa’aaliga.

E le gata i lea, ua folafolaina mai foi e Tupa’i i le mamalu o le atunuu, le le toe tupu o se tulaga faapenei ma o le a auai matai ma aumaga o le nu’u, pe a ma le 50, fa’atasi ai ma sui malu o le malo, aua le leoleoina o a latou fa’afiafiaga o totoe.

TOLOPOINA FAAMASINOGA MO I LATOU E TO’ALIMA

Ua taliaina nei e le Faamasinoga Maualuga ia se apili a nisi e to’alima ina ia fa’aleaogaina moliaga fa’asaga ia i latou, ma o lo’o iai se talitonuga, o le a fa’aauauina lenei mataupu i le tausaga fou.

Ae e le’i taliaina e le faamasinoga ia le lona lua o apili a nisi e to’alua mai i lenei lava mataupu, ina ia fa’atula’i ese le susuga i le faamasino sinia o Faamasinoga Faaleitumalo, ia Taiasa Atoa Saaga mai i tauaofiaga o lenei mataupu.

O le aso Gafua (i Samoa) sa faaleoina ai le fa’ai’uga a le afioga i le Faamasino Sili ia Satiu Timativa, e pei ona ripotia mai e le Samoa Observer.

O i latou o lo’o molia i lenei mataupu, e aofia ai Samuelu Sua, Sivai Kepi Mamea, Lisamarie Schmidt, le afioga i le Minisita o le Itumalo Salega Numera 1, ia Fepuleai Faimata Sua faapea ma Li’o Faataumalama Auava.

O lo’o ua tu’ua’ia i latou nei i solitulafono e aofia ai le taitai sese o leoleo, faia o ni molimau pepelo, ma taupulepulega ina ia fa’atoilaloina le faamasinoga tonu mo isi.

Na lu’itauina e i latou ua molia ia se fa’ai’uga a le susuga i le faamasino ia Saaga, lea na teena se talosaga ‘aufaatasi a loia mo i latou ua molia, ina ia tolopoina le faamasinoga ia Aperila o le tausaga fou, ona o tulaga le ma’alofia.

Sa finau i latou ua molia, ona o le faaiuga a le faamasinoga, ua fa’aleaogaina ai o latou aia tatau e filifilia ai ni a latou loia e pei ona ma’oti mai i le Faavae.

Ae i le faaiuga fa’aalia e le afioga i le Faamasino Sili, ua ta’ua le vavevave tele o le finauga i tulaga o loia, ona o le mataupu e ao ona fofoina muamua, o le fautuaga a le loia mo i latou ua molia, lona tolu, lona fa ma le lona lima, lea sa fautuaina ni aso e fa’ataunu’uina a latou iloiloga, ae o lo’o fa’alavelave i nisi o faatonuga i totonu o le Faamasinoga Maualuga.

Saunoa le afioga i le Faamasino Sili, afai e le mafai ona auai mai loia nei, e tatau ia i latou ua molia, ona saili ni a latou loia fou.

Sa saunoa foi le susuga i le faamasino faamasino i le fa’atuai o faamasinoga ona o fa’afitauli i molimau.  Ma ia fautuaina ai le tatau i leoleo ona talosagaina le fesoasoani a le faamasinoga, pe afai ua iai se taumafaiga ina ia toe suia molimau.