TALA MAI SAMOA

Apia - SAMOA

TE’ENA E SE ALII MOLIAGA O LE OSOFAIA O NI TAMAITI TALAVOU I SE AGAESE

O le aso Gafua na se’i mavae atu, na te’ena ai e se alii 36 tausaga, i luma o le faamasinoga, ia ona moliaga, i lona taumafai e fasioti ni alii talavou se to’alua, i se agaese.

Ma ua fa’apea ona fa’atulagaina e le Afioga i le Faamasino ia Fepuleai Ameperosa Roma, ia le aso 2 o Mati, 2026 e amataina ai le faamasinoga a le susuga ia Ale Foga’a mai Amaile.

Na te’ena e le itu a le malo ia le totogia o se tupe e tatalaina ai Ale i tua, talu ai le ‘oga’oga o lenei mataupu, ma lona osofa’ia o ni alii talavou se to’alua, e tasi e 19 tausaga le matua, ae o leisi, e 13 tausaga.

Sa faaulufaleina e Lagaaia ia se talosaga mo se tupe faatulagaina e mafai ona tatalaina ai i tua le na molia, ma o le aso 8 o Aukuso ua faatulaga e iloiloina ai lea mataupu i luma o le Afioga i le Faamasino ia Vui Clarence Nelson.

O lenei mataupu o lo’o ta’ua, na tula’i mai i le masina o Iuni na se’i mavae atu, lea na taofia ai ni alii talavou se to’alua, ona o ni manu’a mai i le osofa’ia o i la’ua i se agaese.

E tusa ai ma ripoti a le ofisa a leoleo, na mafua lenei fa’alavelave, ona o manatu ‘ese’ese i tuaoi o fanua, lea na fa’aaogaina ai loa e le na molia, ia se agaese, e osofa’ia ai alii talavou se to’alua.

FAATONUTONU E LE FAAMASINOGA IA TAIMI FAATULAGAINA E TEENA AI SE SUI TAUVA O LE PALOTA

O le amataga o le vaiaso sa faapea ona fa’atonuina ai e le Afioga i le Faamasino Sili ia Satiu Simativa Perese, ia le fa’atulagaga o aso, mo tagata palota ma le Ofisa o Palota, faapea ai ma taimi e faagata ai ona fa’aulufaleina ia so’o se manatu tete’e, e faatatau i sui tauva o le palota.

O lenei fa’atonuga ua faapea ona faia, ona o se talosaga mai i le Ofisa o Palota, i lalo o le tulafono ma le malosiaga o le Faamasinoga, e fa’ata’atia ai aiaiga ma tulafono, ona o ni atugaluga ua fa’atula’i e nisi o itu/pati faapolokiki.

O nisi o ia atugaluga, e aofia ai le pu’upu’u o le taimi ua tu’uina atu i tagata palota ma sui tauva, e fa’atino ai o latou aia tatau e tete’e ai, o le aia  tatau a tagata palota e maua ai ia le lisi o sui tauva, i luga o upega tafa’ilagi, ma le fa’aopoopoina o taimi e tu’uina atu i sui tauva, e fa’amaonia ai le lisi o sui tauva ma fa’aulu ni manatu tete’e.

Ua faapea ona fa’atula’i e loia o itu/pati uma e tolu, HRPP, FAST a le SUP, ia nei atugaluga e tasi.

Ma i le fa’ai’uga mai i le Faamasinoga:

O taimi fa’atulagaina e faaulu ai manatu tete’e a tagata Palota ma Komesina:

Iulai 4, 2025 – Tapunia lisi sui tauva

Iulai 12, 2025 – Lisi o sui tauva ua mae’a ona lesitala

Iulai 14, 2025 – Tufatufaina ai e le ofisa palota ia kopi o suafa o sui tauva, pe a mae’a ona tapunia le toe fa’auluina o suafa o sui tauva ia Iulai 4.

Iulai 18, 2025 (4:00 i le aoauli) – aso mulimuli e faila ai te’ena a tagata palota ma Komesina

Iulai 21, 2025 – Iulai 25, 2025 (4:00 i le aoauli) – Tufatufaina atu tulaga tete’e, i tagata palota.

Iulai 29, 2025 (10 i le taeao) - Fa’ao’oina atu fa’aaliga i le Komesina o Palota, o suafa o tagata palota, ua mae’a ona fa’ao’oina ia fa’aaliga aloaia i tulaga tete’e

Iulai 30, 2025 (2:00 i le aoauli) – Fa’aaogaina isi auala e fa’ao’oina atu ai fa’aaliga o tulaga tete’e (e pei o uepesite, upega tafa’ilagi, nusipepa Savali ma vaega fa’asalalau).

O fa’aaliga sa fa’aaogaina ai isi auala, e tatau ona fa’atatau i le aso o le a vala’auina ai lea mataupu i luma o le Faamasinoga Faaitumalo i Mulinu’u – 10:00 i le taeao o Aukuso 6, 2025, ma o faavae o le tete’e – pe 28(1) (a), (e) po o le (i) Tulafono Palota 2019 po o le tete’e a le Komesina i lalo o le Tulafono Palota 2019.  E tatau foi ona ta’ua i le fa’aaliga, ona ua lomia pe fa’alauiloa faalautele ia le suafa o le tagata palota, o lona uiga, ua te’ena, ma e iai le aia tatau a le tagata palota, e fa’aleo ai sona manatu.

Iulai 30, 2025 – teena po o faatu’iese, e faaleoina i le Faamasinoga Faaitumalo mo le fa’atulagaina o aso mo iloiloga ma nisi faatonuga a le faamasinoga.

Aukuso 8, 2025 (aoauli) – Lomia ai le lisi fa’ai’u a le Ofisa o Palota.

Aukuso 15, 2025 – aso mulimuli mo faaiuga mai i le faamasinoga faaitumalo, i manatu tete’e/faatui’ese mai tagata palota ma le komesina o palota.  Afai ae o’o atu i lea aso, e le’i faia iloiloga, o le a toe fa’aauauina nei iloiloga pe a mae’a le Palota Lautele.

Taimi fa’atulagaina mo tulaga tete’e fa’asaga i sui tauva:

Iulai 18, 2025 – aso mulimuli e fa’aulu ai manatu tete’e e faasaga i sui tauva ma talosagaina ai e le Komesina o Palota ia le toe suia o faaiuga. 

Iulai 19, 2025 – aso mulimuli e fa’ao’o pe fa’alauiloa atu ai manatu tete’e

Iulai 25, 2025 – aso mulimuli e tali mai ai i manatu tete’e

Iulai 28, 2025 – Valaau ai e le Faamasinoga Palota ia manatu tete’e

Iulai 29, 2025 – Amata ai iloiloga a le faamasinoga i manatu tete’e.  O le a lomia i luga o le uepesite a le MJCA ma le OEC, o upega tafa’ilagi ma vaega fa’asalalau ia aso ma taimi o iloiloga

Aukuso 15, 2025 – aso mulimuli o faamasinoga tau palota, e faia ai faaiuga i fa’atu’iesega i sui tauva ma talosaga a le Komesina o Palota.  Afai e iai ni mataupu o le a le mafai ona iloiloina e le faamasinoga, o le a toe tolopoina se’ia mae’a le Palota Lautele 2025.