TALA MAI SAMOA

Apia - SAMOA

AGA’I ATU SAMOA I LE LATOU PALOTA INA UA LE PASIA LE PAKETI A LE MALO

Ina ua le mafai ona pasiaina e le Palemene ia le Paketi 2025-2026, i la latou tauaofiaga i le taeao ananafi (aso Lua i Samoa), ua fa’amautuina ai nei le agai atu o le atunu’u i se palota lata mai.

E na o le 16 palota sa lagolagoina le paketi fou, ae 34 i latou na te’ena, ma ua fa’amauina ai le 40 tausaga talu ona le pasiaina e le Palemene o se paketi a le malo.  O lona uiga, ua se’e atu nei le malo, i lalo o le va’ava’aiga a le kapeneta, e tusa ai ma tulaga o le Faavae, ae  saunia le atunu’u mo le faataunu’uina o le palota i leisi 90 aso o i luma.

Sa fa’ataoto e le Minisita o Tupe, ia Lautimuia Uelese Vaai ia le paketi i totonu o le Maota ma sa finauina e sui faitulafono ia le palotaina i lona faitauga muamua.

E ui i le finauina e le kapeneta, ae latou te le’i palotaina le paketi, e tatau i sui taitasi ona fa’aleoina mafua’aga e tete’e ai i le paketi, peitai na fa’asalalauina e le Fofoga Fetalai le palotaina o le paketi i le amataga, e pei ona sa faia i tausaga ua mavae atu.

I lana saunoaga fa’ale Palemia ae e le’i palotaina le paketi, sa lapataia ai e le afioga i le tamaitai Palemia, ia Fiame Naomi Mataafa, ia sui faitulafono, i le taunu’uga pe a le pasiaina le paketi.

Na ia fa’aleoina foi le laititi o le fuainumera o tagata o itumalo taitasi ua faapea ona lesitala e palota.  Ma ia ta’ua le a’afiaga tele o le fa’agasologa o le malo, pe afai ae le pasia le paketi.  Ae ui i lea, na saunoa le tamaitai Palemia, ua o latou saunia po o le a lava le faaiuga a le Palemene.

FA’ATE’IA LE KOMESINA A LEOLEO I LE LE’I FA’ATALANOAINA E LEOLEO O MOLIMAU

Sa fa’aleoina e le Komesina o Leoleo, ia Auapaau Logoitino Filipo i luma o le Faamasinoga Faaleitumalo, le fa’ate’ia o lona tagata, ina ua faailoa atu e le loia a le itu tete’e, ia Richard Merchant, le le’i su’esu’eina e le alii leoleo sa gafa ma le su’esu’eina o le mataupu, ia Tupa’i Sapani Leleimalefaga, ia molimau o le mataupu ua amataina nei ona iloiloga, e aofia ai Samuelu (Sam) Sua ma lona faletua o Sivai Kepi, e pei ona sa faatonuina ai o ia.

Sa ta’ua e Auapaau i lana molimau, na fa’ate’ia o ia, i le na’o le tasi le molimau sa fa’atalanoaina e Tupa’i, o Marie Tusi.

O le aso Gafua i Samoa (aso Sa ia tatou) lea na se’i mavae atu nei, na amataina ai iloiloga o le mataupu e fa’asaga i le taitai o le vaega a le Fa’atuatua i le Atua Samoa ua Tasi (FAST), ia La’auli Leuatea Schmidt, o Samuelu Leau, Sivai Kepi Mamea, Fepulea’i Faimata Su’a, Lise Schmidt ma Faataumalamala Lio Auava.

O moliaga o lenei mataupu, e aofia ai taupulepulega po o se taumafaiga e la’aloa ia ala o le Tulafono ma se faitauga e tasi, i taupulepulega e solia le Tulafono.

O lenei mataupu na tula’i mai ona o fa’amatalaga po o se molimau a Samuelu Leau po o Sam Sua, e tusa ai ma se fa’alavelave tau ta’avale lea na maliu ai se alii talavou, i le tausaga e 2021.  O lea molimau, o lo’o taofi leoleo, e le moni ma faamaoni.

I lana molimau i luma o le Faamasinoga Faaleitumalo, sa ta’ua ai Auapaau lona fa’ato’a iloa, ina ua fa’ailoa atu e Merchant ia te ia, e le’i fa’atalanoaina e Tupa’i ia Sam ma Sivai, e fa’amaonia ai a la molimau.

Na ta’ua e Auapaau i lana molimau, sa ia fa’atonuina ia Tupa’i, e talanoa i molimau ia e to’atolu, sa ta’ua i totonu o se ripoti i se suesuega na faia e le susuga ia Li’o Faataumalamala Auava, a’o avea o ia ma se leoleo su’esu’e, i lalo o le fa’atonuga mai ia La’auli, a’o avea o ia ma Minisita o Faatoaga.

Na molimau foi Auapaau, sa ia faia lea faatonuga ia Tupa’i, ina ua mae’a se latou fonotaga ma Laauli, o le Minisita o Leoleo ia Faualo Harry Schuster faapea ma Li’o, i le ofisa a La’auli.

Sa fesiligia e Merchant ia Auapa’au, pe na iai sona talitonuga o le a fa’atalanoaina e Tupa’i ia molimau nei e to’atolu.  Na tali Auapa’au, ioe na iai sona talitonuga ua mae’a.

Na toe fesiligia e Merchant ia Auapa’au, pe ua fa’ate’ia o ia, i le le’i fa’atalanoaina e Tupa’i ia Sam po o Sivai.  Sa tali Auapaau, e na te le iloa.

Sa fa’ailoa atu e Merchant ia Auapaau, e leai se fa’amaoniga na talanoa ia Tupa’i ia Sam ma Sivai, ae tali le alii komesina, o lea fa’ato’a ia iloa.

Ona toe fesili lea o Merchant ia Auapaau pe mafai fa’apefea ona o latou mauaina le mea moni, pe afai e le’i Talanoa ia Tupa’i ia Sam ma Sivai.  Na tali Auapaau, e tele auala e fa’aaogaina e leoleo, ma e ese foi metotia sa fa’aaogaina e Tupa’i i ana suesuega.

Sa tula’i le loia a le malo ma toe fa’amanatu mai i le faamasinoga, le le’i auai o le alii komesina i le su’esu’ega sa faia, ma o le a maua le avanoa e tu’uina mai ai se molimau a Tupa’i.

LOKA SE TO’ALUA I SE OSOFAIGA A LEOLEO I LE MAKETI I’A

Na mauaina e leoleo i luga o masini pu’e ata na o latou fa’atutu solo i totonu o le taulaga, ia ni alii se to’alua sa fa’atauina ni vaega o fualaau faasaina i le maketi i’a i Savalalo.  

Ma o le po o le aso Toonai (aso Faraile i Amerika Samoa) sa osofaia ai e leoleo ia le maketi i’a.

Ua fa’amaonia e le Komesina o Leoleo, le susuga ia Auapaau Logoitino Filipo, ia le lokaina mai ai o ni alii se to’alua, i lea osofaiga, ma o le masina fou ua fuafua e tutula’i  ai i luma o le fa’amasinoga.

Sa ia ta’ua le mauaina o vaega o Fualaau faasaina, o Aisa ma Mariuana, i nei alii ma o le aso 9 o le masina fou, lea ua faatulagaina ai o la iloiloga i luma o le faamasinoga.