TALA MAI SAMOA

Apia - SAMOA

TAFEA SE TAMAITITI TASI TAUSAGA I TAFEGA O LOLOGA

Ua fa’amaonia mai i ripoti ia le maliu o se tamaititi e tasi le tausaga, na tafea i lologa i se vaitafe i le afioaga o Tiavea, i le aso Faraile o le vaiaso ua tuanai.

Na fa’amaonia e le Komesina a Leoleo a Samoa, le maliu o lenei ‘alu’alutoto i le aoauli o le aso Faraile ina ua fa’atu e lona tama le la ta’avale i Ti’avea ma amata ona fufulu lana ta’avale i le vaitafe.

Ae o le taimi lea sa iai ia le tamaititi ua maliu, i totonu o le taavale.  Ma e le’i iloa mai e lona tama, le tatalaina e le tamaititi ia le faitoto’a o le taavale ma oso i fafo ma i’u ai ina tafea i le malosi o lologa i lea aso.

Na fa’aalia e Auapaau le fa’aauau pea o su’esu’ega a leoleo, ma o lo’o iai se talitonuga, e ono molia le tama o lenei atalii i lona fa’atamala.

Sa fa’aleoina e Auapaau le agaga fa’anoanoa i taimi e tutupu ai faalavelave faapenei, e a’afia ai soifua o alo ma fanau ona o le fa’atamala.  Ma ia toe fa’amanatu mai ai le tulaga faaletonu o tala o le tau o feagai nei ma le atunu’u ma ia tatau i tagata o le atunu’u ona nofo mataala, aemaise lava i nu’u ma afioaga o lo’o iai vaitafe ma tu lata i le sami.

LAPATA’IA TAGATA O LE AFIOAGA O FUGALEI

Ona o le fa’aauau pea o le tetele o timuga, ua faapea ona molimauina ai le malosi o lologa i le vaitafe i Fugalei i le aso Gafua lea ua a’afia ai le tele o tagata o le nu’u faapea ai ma femalagaiga a taavale i luga o le alatele.

E pei ona faamatalaina e se tasi o aiga e tu lata lo latou fale i le vaitafe, le malosi o le tafe o le vaitafe, aemaise lava i le po.  Ma e latou te lagonaina le pa’o o la’au o lo’o tafefea.

O la’au ia ma lapis isa faapea ona poloka ai le alatele, ae sa mafai ona maua mai se fesoasoani i le kamupani a le Moatoga ma a latou masini tetele, na fa’amama ese ai le lapisi ma la’au tetele sa poloka ai le auala i luga o le ala laupapa.

O le aso Lulu na o’o atu ai le aufaigaluega a le Ofisa o Femalagaiga (LTA) e iloilo ia le tulaga o iai mea sa faaleagaina i le lologa, ma fa’amautuina le saogalemu o le ala laupapa aua femalagaiga a le mamalu lautele.

Ma ua faapea foi ona fa’aalia e nisi o le nu’u ia lo latou popolega i le tulaga o le auala laupapa i Fugale, lea ua leva ona tulaga faaleotnu aemaise lava i taimi o timuga tetele.  

E tusa ai ma ripoti mai i tagata o le nu’u, o so’o se taimi lava e pa ai le vaitafe, e le gata i la’au ma lapisi e sau i le tafega o le vaitafe, ae faapea foi ma manu mamate, ma o mai i le mamau i le auala laupapa.  

E le gata i le lapisia o le auala laupapa ae faapea foi le manogi leaga, ma o se tulaga e fa’apopoleina ai tele aiga o lo’o nonofo latalata i le vaitafe.

TU’U ATU MATAUPU FAASAGA IA SCHMIDT E TAULIMAINA E SE LOIA TUMA’OTI

O le mataupu lea o lo’o tu’ua’ia ai le tamaitai o Lise Marie Schmidt, i lona faia o ni tu’ua’iga sese e faasaga i le Palemia o Samoa, ua tu’uina atu nei i a’ao o le alii loia ia Magele Leone Sua Mailo, ae o le a le fa’afoeina e le loia a le malo.

O le aso Lua (aso Gafua i Amerika Samoa) sa tula’i ai Schmidt i luma o le Fa’amasinoga Fa’aleitumalo ma le afioga i le faamasino ia Talasa Saaga.

O le tamaitai loia ia Tanya Toailoa sa tula’i mo Schmidt.

I lea iloiloga sa faapea ona tolopoina ai e le alii faamasino ia le mataupu, i le aso 3 o Iuni ma tu’uina atu ai le avanoa i le itu tagi e fa’amautu uma ai a latou moliaga e faasaga ia Schmidt.

Na ulua’i molia e leoleo ia Schmidt i le masina o Mati ona o ni tusi e lua na ia tusia, o lo’o tu’ua’ia ai le tamaitai Palemia i lona a’afiaga i le maliu o Dr. Caroline Sinavaiaa Gabbard.

O lo’o ta’ua e Schmidt i totonu o nei tusi, se la talanoaga ma le tamaitai Palemia ma ni fonotoga o lo’o ia ta’ua sa faatonuina ai o ia, e alu e aumai ni molimau (evidence) e iai so’otaga ma le maliu o le tamaitai Polofesa ia Gabbard.

I le mae’a ai o su’esu’ega a leoleo sa o latou faia ai ni moliaga e faasaga ia Schmidt ona e pei ona ta’ua e le komesina o leoleo, le susuga ia Auapaau Logoitino Filipo, e leai se fa’avae po o se fa’amaoniga o faamatalaga a Schmidt.

I se tali mai i le tamaitai Palemia, sa ia fa’aalia ai le mae’a o su’esu’ega a leoleo ma e le moni fa’amatalaga a Schmidt, o lea, o le a le fa’aaluina lona taimi e faia ai sana tagi e faasaga ia Schmidt.