TALA MAI SAMOA

Apia - SAMOA

SALA TUPE SE FAIPULE MA NISI, I LE LE USITAIA O FAATONUGA A LE FAAMASINOGA

O le aso Lulu o le vaiaso nei, sa faapea ona lauina ai e le Faamasinoga Maualuga ia le faasalaga e faasaga i le alii Faipule o le itumalo o Sagaga Numera 2, le susuga ia Maulolo Tavita Amosa, faapea se alii faipisinisi e suafa ia Ututaaloga Charlie Ulia, ma Fata Roketi ma Vaafai Tolutasi, ina ua fa’amaonia la latou solitulafono, o le le usitaia lea o se fa’atonuga mai i le faamasinoga, ia Oketopa 11, 2024.

O le itu tagi o le susuga ia Sala Fili Lauano ma nisi, sa avea ma sui o le afioaga o Leauva’a.

I le taliaina e le alii Minisita o le faasalaga mai i le faamasinoga, ua toe faamalosia ai le avea o le faaiuga a le Faamasino Sili, ma tulaga o le a fa’amautuina ai le toafilemu i le va o nu’u, ona o lenei fa’afitauli i tulaga o fanua, ua 70 tausaga talu ona tula’i mai.

E ta’i $2,000WST ia fa’asalaga a i latou ia e to’afa ma e 14 aso ia ua tu’u iai e totogi ai a latou faasalaga.

TUTULA’I I LUMA O LE FAAMASINOGA MAUALUGA IA NI TAMAITI E TA’I 15 TAUSAGA LE MATUTUA

O le amataga o le vaiaso nei, na tula’i ai i luma o le Faamasinoga Maualuga ia se alii talavou e 15 tausaga le matua, e tali i ona moliaga o le umia o vaega o fualaau faasaina, o le Aisa.  O lea lava aso, na tula’i ai foi seisi alii 15 tausaga, e tali ona moliaga, i lona faia o ni uiga mataga i se teineititi o le latou aiga.

Ma ua to’atolu ai ni alii 15 tausaga ua o’o atu i luma o le Faamasinoga Maualuga, e aofia ai ma le alii talavou lea na molia i lona susunuina o se va’a i Salelologa.

Ua fa’ao’oina atu nei e le alii faamasino, le Afioga Fepuleai Ameperosa Roma, ia le mataupu o le alii talavou lea na molia i fualaau faasaina, i le faamasinoga mo fanau talavou, i le aso 26 o Fepuari.

E to’alima i latou, faatasi ai ma lenei alii talavou, ua molia ona o se osofa’iga a leoleo i Lelepa ia Novema o le tausaga ua tuanai, lea na maua ai vaega o fualaau faasaina (Aisa), o ni masini faapea ma vaegatupe.

O le alii talavou lona lua, ua molia i faitauga e fa o le faia o ni amioga mataga i se teineititi o le latou aiga, ma sa te’ena e lea alii talavou ia ona moliaga, tauala atu i lana loia, o Afa Lesa.

Ua toe tolopoina lana mataupu se’ia o’o ia Iuni 23.

IOE SE AVE PASI NA LAVEA AI SE PASI I MALIFA, I ONA MOLIAGA

O se faalavelave na tula’i mai ia Oketopa 2, 2023, ina ua lavea se pasi i Malifa ma maliliu ai nisi o le pasese e to’alua, ua ioeina e le ave pasi ona moliaga, i luma o le Faamasinoga Maualuga i le aso Lua na se’i mavae atu nei.

Na ulua’i molia le susuga ia Togamataimoana Vaea i moliaga e 39, ae e na o le fa moliaga ua ia tali ioe, iai.

O nei moliaga e fa, e aofia ai faitauga e lua o le fasioti tagata le fuafuaina e ala i se taavale, o leisi moliaga o le fa’afoeina o se taavale a leai se laisene a le isi moliaga, o le aveta’avale le fa’autauta ma manu’a ai le pasese e 33.

E tusa ai ma fa’amaumauga o lenei matuapu, sa fa’afoeina e Vaea le pasi o le ‘Laumosooi’ mai i Falealii, e agai atu i Malifa, i le aso 2 o Oketopa 2023, ina ua lavea le pasi i le auala i Malifa, i tafatafa o le fale’aiga o le “Phat Burger”.  

Ma maliliu ai nisi o le pasese e to’alua, na aofia ai se alii mai Poutasi ma se alii mai Tafatafa i Falealili ae manunu’a ai le pasese e to’a 33.

Ua toe tolopoina lenei mataupu mo le lauina o le faasalaga a le ua molia, i le aso 1 1o Mati.

I se taimi mulimuli ane, na fa’amaonia ai e le Ofisa o Femalagaiga i luga o le auala, ia le le’i saogalemu o le pasi mo femalagaiga.  

Na tupu lenei faalavelave a’o agai atu le pasi i Apia ma oso ai i le isi itu auala ma so’a ai seisi taavale.