TALA MAI SAMOA

SAMOA

FAASALA I LE FITU MA LE AFA TAUSAGA ONA O LE LIMA I TO’I

O le aso Lulu (aso Lua i Amerika Samoa), sa lauina ai le faasalaga a le susuga ia Alatuna Mailo, e 37 tausaga lona soifua, mai i afioaga o Ti’avea ma Foailalo, e le Faamasinoga Maualuga, ona o ona moliaga o le fasioti tagata taupulepule, lea na ia ioeina.

E tusa ai ma fa’amaumauga a le malo, o le aso 12 o Iulai, 2024, na fai ai se inuga pia a Mailo ma le na a’afia, ae na liua le fiafia o le la inuga, i le faanoanoa, ina ua faia e le na a’afia se faamatalaga e uiga i se tausoga a Mailo, lea na le fiafia ai Mailo.

O le to’atama’i tele a le ua nofosala, na alu atu ai i lona fale i Gautavai ma aumai se to’i ma tai ai tua o le ulu a le na a’afia ma na oso Mailo i luga o le na a’afia ma se faamoemoega e toe ta le na a’afia, ae peitai, sa matapogia le na a’afia.

Sa fa’amanino e le afioga i le alii faamasino ia Vui Clarence Nelson le iai o se faamoemoega a le ua nofosala, e fa’ao’o le oti i le na a’afia.  Ma sa le tatau lava ona to’atama’i faapea le ua nofosala, ona e le mamafa se faamatalaga na faia e le na a’afia.

Ma na fa’ailoa atu e le afioga Vui i le ua nofosala, o ituaiga soligatulafono faapenei, e tatau lava i le fa’amasinoga ona fa’ao’o atu ai se feau taua, i le tuga o ia ituaiga soligatulafono.

Sa talosagaina e le loia a Mailo, ia Leone Su’a-Mailo ia le manaomia ona ave o Mailo se’i vaai se foma’i, ona e taunu’u atu le ua nofosala i luma o le faamasinoga i lea aso, o lo’o fula lona foliga.

FA’ATULAGA LE LAUINA O LE FAASALAGA A SE ALII MOLIA I LE MALIU O SE TAMAITITI 17 TAUSAGA

O le faaiuga o le masina o le a lauina ai le faasalaga a alii mai i Patamea, Savaii, lea na maliu ai se tamaititi 17 tausaga, i se faalavelave tau taavale na tupu i le aso 31 o Me, 2024.

Sa toe tolopoina e le afioga i le alii faamasino ia Leaiataualesa Darryl Clarke ia le lauina o le faasalaga a Taliuo, ona o lo’o fia manino le saosaoa o le taavale i le taimi na tupu ai e faalavelave, ma pe sa iai se laisene aveta’avale a le ua molia.

E tusa ai ma fa’amaumauga a le malo, sa agai atu le taavale a le ua molia, i le Itu o Tane ma ina ua taunu’u le taavale i Sapapalii, na tu se pasi sa i luma atu, ma oso i lalo le ua maliu.

Ma sa ta’ua le le lagonaina e le ua molia ia le faatonuga a lona uso ina ia fa’alemu le alu o lana taavale, ona o le leotele o le musika, ma ia so’aina ai le tamaititi 17 tausaga, sa kolosiina le auala.

Na maliu lenei tamaititi, e le’i o’o i le falema’i ona o manu’a i lona ulu.

O le aso 15 o Iulai sa fa’aulu ai tali ioe a le ua molia, ma sa nofo faatali itu e lua mo le lauina o le faasalaga i le aso Lua ae peitai, ua toe tolopoina e le faamasinoga lenei mataupu.

TOE LOKA SE PAGOTA MO SEISI TAUSAGA

Ua toe faaopoopoina se tasi tausaga ma masina e 10 i le faasalaga a se alii pagota, lea o lo’o loka mo le tolu tausaga, talu ai moliaga o le faomea ma le umia o se a’upega malosi.

E tusa ai ma le saunoaga a le afioga i le alii faamasino ia Leiataualesa Darryl Clark ia Laki Nauer, o lo’o fa’aalia mai i ana gaioiga o lo’o faia, lona faia o ni faaiuga sese.

O lo’o ta’ua i totonu o faamaumauga a le malo le alu atu o le alii o Nauer i se faleoloa i Lotopa i le aso 12 o Setema, 2024 ma se a’upega malosi ma ta’i agai i le tamaitai e faigaluega i le faleoloa.  Ona sola lea o le ua molia ma le telefoni feaveai a le teine faigaluega.

Na ta’ua e Leiataualesa le le toe faigaluega o le tamaitai na a’afia, ona o lona fefe tele i le mea sa tupu.

Sa faaleoina foi e le faamasinoga isi solitulafono sa lokaina ai Nauer, e aofia ai ma lona fa’aleagaina o le falepuipui i Tafaigata i le 2017.

I le lauina o lona faasalaga, sa faatonuina e Leaiataualesa, a’o alala le tina a le ua molia i le pito i luma, e tagai i lona tina lea o lo’o fa’aauau pea ona lagolagoina o ia, e pei lava ona ia faia i le 2017.

E le gata i lea, sa fautuaina e le afioga i le alii faamasino ia Nauer, ina ia faia se suiga ma aua ne’i toe o’o atu i luma o le faamasinoga, pe afai e alofa i lana fanau to’atolu, o lona to’alua ma lona tina.