TALA MAI SAMOA

SAMOA

TAOFIA I LE FALEMAI SE ALII INA UA SIPAKA I SE UAEA ELETISE

O le aso Lulu (aso Tofi i Samoa) na se’i mavae atu nei, na tupu ai se faalavelave i Saleufi, Apia, ina ua sipaka se alii faigaluega, i luga o le faleoloa si’i atoa a le Bluebird ma mu ai lona tino.

E tusa ai ma ni ata vitio sa pu’eina e ni molimau na iai i le taimi na tupu ai lea faalavelave, lea na fa’asalalau solo i luga o ‘Api o Foliga’ ma upega tafailagi, sa va’aia ai ni isi alii faigaluega se toatolu, o lo’o taumafai e si’i mai i lalo le ua manu’a, a’o tauvalaau atu i latou sa iai, ia ni auala e mafai ona fa’asaoina ai le soifua o le ua manu’a.

Sa molimauina foi i ata vitio, le le’i la’eiina e le ua manu’a, ia ni la’ei faigaluega e puipuia ai lona ola.

Ina ua taunu’u se tasi o le aufaigaluega a le Samoa Observer, i le nofoaga na tupu ai le faalavelave, o lo’o oi lava le ua manu’a, ona o le tuga o ona manu’a.  Ma ua fa’amaonia mai e le falema’i le mu o le afa o lona tino.

Sa faia e leoleo a latou su’esu’ega i le mafua’aga o lenei faalavelave.

TOE AGA’I I LUMA LE PILI MO LE AVEA O TAGATA SAMOA MA SITISENI NIU SILA

Ua silia ma le 3,000 tagatanu’u o Samoa o le a mafai ona toe faamautuina o latou sitiseni i Niu Sila, i le toe agai i luma o le pili sitiseni (The Citizenship (Western Samoa)(Restoration) Amendment Act 2023), lea ua pasia e le Komiti o le Maota Atoa i le Palemene, i le aso Lulu na se’i mavae atu nei, fa’atasi ai ma sona suiga e tasi.

O le masina ua mavae, na pasia ai lenei pili, i lona faitauga lona lua ma sa faapea foi ona fa’aleoina e le ‘National Party’ lo latou lagolagoina o lenei pili. 

O faamoemoega o lenei pili, e pei ona sa fa’aulufaleina e le Minisita o le Itu Meamata, ia Teanau Tuiono, o le toe fa’amautuina lea o aia tatau faalesitiseni, o tagata mai Samoa sa fananau i le va o le 1924 ma le 1949.

O le suiga ua fa’aopoopo i lenei pili mai i le alii Minisita o Andy Foster, mai i le itu a le ‘NZ First’, ma o se totino o le Komiti o ‘Governance and Administration’, o se fuafuaga ina ia toe fa’afo’i tupe a i latou na apalai ma fa’amanuiaina.

O lona uiga, o so’o se tasi e agava’a i lalo o lenei pili, e apalai mo le avea ma sitiseni, ma sa fa’amanuiaina le latou taumafaiga, o le a mafai ona toe fa’afo’i atu a latou tupe sa totogia.

O leisi faaopoopoga, e aofia ai le o’o atu o lenei agava’a faalesitiseni, i fanau ma i latou na tupuga mai i e na fananau i luma mai o Ianuari 1, 1962, ma e leai se tupe e totogia mo lea tulaga.

Ae peitai, se’i vagana ai le lagolago mai i le itu a le Leipa ma le ‘Te Pati Maori’, sa le’i pasiaina suiga po o faaopoopoga i lenei pili, e le Maota atoa.

E le o ma’oti mai i le taimi nei, le aso o le faitauga faatolu o lenei pili, ae o lo’o iai se talitonuga, o le a faia i totonu o le Palemene i se vaiaso lata mai.

Afai ae pasia lenei pili, o le a faapea ona agava’a le to’atele o tagata Samoa i le va o le 74 ma le 100 tausaga, e toe avea ma sitiseni o Niu Sila, lea na ave’esea i se pili na pasia i le 1982.

FALEPUIPUI MO LE LUA TAUSAGA I LONA FA’AAOGAINA O SE AGAESE E FA’AO’O AI MANU’A I SEISI TAGATA

O le ogatotonu o lenei vaiaso, sa fa’asalaina ai e le Faamasinoga Maualuga a Samoa ia se alii na molia i lona ta ina o le ulu o le to’alua a lona tausoga, i se agaese, i le lua tausaga ma masina e tolu.

E lua moliaga sa faapea ona ioeina e Lameko Sakaria, i lona fa’ao’oina o ni manu’a tuga i se isi, ina ua oso atu ma lana agaese, e taofiofi ai le misa i le va o se ulugalii.

O lo’o ta’ua i fa’amaumauga a leoleo e faapea, o le aso 11 o Novema, 2022, sa fa’atonuina ai e le tuafafine a Sakaria ia lana tama e alu i le ulu e fesili ia Sakaria, po o iai sana afi.  Ae fa’atonu e le na manu’a i lenei faalavelave, ia le tamaitiiti ina ia alu i lona tina e aumai se ‘ie e palu ai le ava, lea na faia e le tamaitiiti.

Ae peitai, ina ua fo’i mai le tamaititi ma le ‘ie, na va’aia e le na manu’a le tuai ma le masaesae o le ‘ie, o lea na faia ia faia ai se faamatalaga e faapea, e tutusa foliga o le ‘ie ma le tina o le tamaititi.  O le mea lea na tagi ai le tamaititi ma toe fo’i i le ta’u i lona tina le faamatalaga a le na manu’a ma amata ai loa sa taugaupu i le va o i la’ua.

Ina ua fa’alogo atu le ua molia i le taugupu a lona tuafafine, sa tu loa i luga ma alu atu i le mea o tu mai ai le na manu’a, ma ta le ulu i le agaese.  E fa’alua ona sasau e le ua loka, ia lana agaese ma tau le ta lona lua i le lima o le na manu’a.

O lo’o ta’ua foi i faamaumauga a leoleo le fa’ataotolia o le na manu’a, i le falemai, mo le masina ma le afa ona o le tuga o ona manu’a.

Na saunoa le susuga i le faamasino ia Niava Mata Tuatagaloa, i le tolaulauina o le faasalaga a Sakaria e faapea, ua fai lava sina matuia o lana gaoiga sa faia aemaise ai o le a’afia ai o le ao o le na manu’a.  Ma sa saunoa foi Tuatagaloa, e leai se mafua’aga tonu e tatau ai ona faia ia ituaiga gaioiga ma ona o le tumau ai manu’a o lea alii, o le a faapea ona faasalaina ai o ia e le faamasinoga, i le falepuipui.

Na amata mai i le lima tausaga ia iloiloga o le faasalaga a Sakaria, e 12 masina na to’esea ona o se ifoga sa faia ma le 36 masina, ona sa ioeina e Sakaria ona moliaga.  Lea ua toe ai na’o tausaga e lua ma masina e tolu lona faasalaga.