TALA MAI SAMOA

Apia - SAMOA

TUSI ATU FIGIEL I LE FAAMASINOGA

Ua tusi atu nei ia le tamaitai o lo’o molia i le fasioti tagata, i le faamasinoga, ina ia ave’esea uma auaunaga a lana loia, ma fa’ailoa atu ai i le faamasinoga lona mana’o e talia uma ona moliaga.

O le amataga o le vaiaso nei, sa tula’i ai i luma o le Faamasinoga Maualuga ia Sia Figiel, ma lana loia o Unasa Iuni Sapolu.  

Ua mae’a ona faaulu e Figiel lana tali tete’e i tu’ua’iga faasaga ia te ia, e aofia ai le fasioti tagata, umia o se a’upega, fasioti tagata le fuafuaina, fa’ao’oina o manu’a tuga i le tino faapea ma le fa’ao’olima.

 Ua toe fa’aauauina e le faamasinoga lenei mataupu, i le masina fou, ina ia tu’uina atu se avanoa i le loia a Figiel, e iloiloina le talosaga a le ua molia.

E le’i leva foi ona toe faaulufaleina e Unasa ia se talosaga mo le tatalaina o Figiel mai i le falepuipui, ina ua mae’a ona te’ena e le ua molia ia ona moliaga uma, e aofia ai moliaga o le fasioti tagata.

Ua te’ena e le itu a le malo ia le talosaga mo se vaegatupe totogi e tatalaina ai i tua Figiel, o lona uiga, o le a fa’aauau pea ona lokaina o ia, a’o fa’agasolo lona faamasinoga.

Na lokaina mai lava Figiel ia Me, talu ona molia o ia i le fasiotia o le tamaitai faiaoga polofesa, o Caroline Sinavaiana Gabbard.

I le masina ua tuana’i, sa faaleoina ai e le loia a Figiel lona mana’o ina ia fa’aleaogaina lana talosaga mo se vaegatupe totogi e tatalaina ai i tua, ma fa’ailoa atu foi i le faamasinoga le iai o se avanoa, e ono suia ai lana tali i ona moliaga.

O lo’o iai se talitonuga, o lo’o mana’o le ua molia ina ia faia se maliliega ma loia a le malo, ina ia fa’aleaogaina moliaga o le fasioti tagata, ae iloiloina le suiga o le tali i moliaga o le fasioti tagata le fuafuaina.

Ua mae’a ona faatulagaina e le faamasinoga le iloiloga mo Mati o le tausaga fou.

Ae e le o manino mai i le taimi nei, le tulaga na o’o iai iloiloga o le mafaufau, sa talosagaina e Figiel.

E tusa ai ma ripoti a leoleo, na fa’ato’a nofo malamalama lo latou ofisa i le maliu o Gabbard, i le aso na soso’o ai, ina ua maua atu lona tino maliu i le fale a Figiel i Vaivase-uta.

LEAI SEISI NA MOLIA I FUSUAGA A FANAU AOGA

I se fusuaga lata mai a fanau aoga i le maketi i Savalalo, ua fa’amaonia mai ai e leoleo, le leai o se tasi o nei fanau aoga na lokaina po o molia, i se solitulafono.

O se tali mai lea a le Komesina o Leoleo, le afioga Auapa’au Logoitino Filipo i le Samoa Observer, lea sa ia ta’ua ai e faapea, e taunu’u atu leoleo i le nofoaga na faia ai fusuaga a fanau aoga i le maketi, ua leai ma se tasi o fanau a’oga na auai i le fusuaga, o toe iai.

Ma na ta’ua e Auapa’au, o lo’o fa’aauau pea suesuega a lo latou ofisa, e ala i le tau sailiga o se ata vitio, e mafai ona fa’ailoa mai ai i latou na auai i lea fusuaga.

Sa iai se vitio na i luga o upega tafa’ilagi, na fa’aalia mai ai ni fanau aoga mai i le aoga a le Kolisi o Maluafou, o tau’aia se pasi o lo’o iai ni tamaiti aoga mai i le kolisi a St. Joseph, ina ua tu’ua a’oga.

Sa molimauina le a’afia o le toatele o le mamalu o le atunu’u sa iai i le maketi i lea taimi, ma na va’aia foi le taufetuli solo o tagata, a’o taumafai nisi e taofiofi le fanau.

Na ta’ua e nisi o le mamalu lautele sa o latou fa’asoaina lenei ata vitio, le tele o se atugaluga ona o amioga fa’aalia a fanau aoga ma talosagaina le fa’asalaina o i latou.

Ina ua fa’afeso’ota’i e le Samoa Observer ia le pulea’oga a Maluafou, le susuga ia Lasi Tavae, sa na ia faamaonia mai le fa’ailoaina atu ia i latou e lenei mataupu, ae e le i mafai ona fa’ailoa mai i lea taimi, le mafua’aga o lenei faalavelave ma po o ai foi fanau aoga na a’afia ai.

Na faamamafaina e Tavae le iai o sa latou fesootaiga ma le puleaoga a le kolisi a St. Joseph ina ia mafai ona soalaupuleina se auala e fofoina ai lenei faafitauli, ina ia le toe tupu mai i le lumanai.

E le o se fusuaga muamua lenei i le va o a’oga nei e lua ma ua fesiligia ai le saogalemu o fanau aoga ma le manaomia ona sailia o se fofo maumaututu i totonu o a’oga.