TALA MAI SAMOA

Apia - SAMOA

MOLIA SE TAMALOA FAGAFAU I LE FASIOTI TAGATA

I se ripoti mai i le nusipepa o le Samoa Observer, o lo’o ua ta’ua ai le lokaina o se tamaloa e 50 tausaga mai i le afioaga o Fagafau ina ua molia i le fasioti tagata, i le maliu o se tamaloa mai Samata i Savai’i, i le aso Sa na se’i mavae atu nei (aso To’onai lena i Amerika Samoa).

E tusa ai ma ripoti o lenei faalavelave, na mafua le fe’ese’esea’iga i le va o tagata o le nu’u o Samata ma Fagafau, ona o tuaoi o a latou fanua, ma i’u ai lava ina faapapaina ai ni a’upega malolosi i le va o nu’u e lua, ma maliu ai le tama mai i Samata.

Sa mafai ona faamaonia mai e le Komesina o Leoleo, le susuga ia Auapaau Logoitino Filipo le moliaina o le tama e 50 tausaga mai i afioaga o Fagafau ma Sapapalii, i le gaoi ma o lo’o iai se talitonuga, o le a toe iai ma ni isi moliaga faaopoopo.

O le aso 8 o le masina fou lea ua faamoemoe e tula’i ai le ua molia i luma o le fa’amasinoga.

Ua ripotia mai foi e le Observer, le iai o se masalosaloga i leoleo, ua mafua lenei fe’ese’esea’iga, ona o le faaiuga a le Faamasinoga o Fanua ma Suafa, e tusa ai ma fanua i le latou eria.

O lo’o ua ta’ua foi e tagata o nu’u o lo’o a’afia le amata mai o lenei fa’alavelave, i se fe’ese’esea’iga i le va o tamaloloa Samata ma Fagafau, i le aso Faraile, ina ua afaina se tasi o alii ma le tau’aiina o se pasi a le nu’u, ma na fa’aauau mai ai lava lenei vevesiga, se’ia o’o mai i le aso Sa.

O lo’o feagai nei leoleo Tuasivi ma le su’esu’eina o lenei mataupu.  Ae ua u’una’ia e Auapaau ia tagata o nu’u ina ia ta’atia atu le mataupu i leoleo. Talosagaina e le afioga i le komesina ia tagata o afioaga ua a’afia ina ia fa’atumauina pea le filemu ina ia aua ne’i toe leiloa ai se soifua, aua o lea ua i a’ao o le tulafono ia lenei mataupu.

Na faapea foi ona fa’aleoina e le afioga i le Komesina ia fa’amaisega mo le aiga faanoanoa ona o lenei tulaga mafatia ua tula’i mai.

O ATU FITI E PUIPUI LE LATOU TALITA I LAKAPI TA’ITO’A 7 A MALISI

Ua toe tulau’ele’ele nei i Samoa ia le ‘au lakapi malosi mai Fiti, e puipui le latou talita i le liki lakapi lona 36 a Malisi, lea ua fa’atuaga e amataina i le aso 21 o Iuni, mo aso e lua, i le paka a le malo i Apia.

Na fa’aalia e le peresetene o le kalapu lakapi a le Malisi, le susuga ia Lemalu John Lemisio, le agaga fiafia ma le fa’agae’etia e tusa ai ma ta’aloga o loma nei.  Sa ia faamamafaina i sa latou fa’aaliga fa’alauaitele lata mai, le taua o le avea o lenei ta’amilosaga ma auala e atina’e ai taleni lakapi ae le gata i lea, o tulaga tau ta’aloga i totonu o Samoa.

Sa saunoa Lemalu, i le avea o lenei ta’amilosaga ma nofoaga e mafai ona fa’aalia ai taleni a fanau talavou ma lo latou naunau i lenei fa’agatama.  Ma sa ia ta’ua foi le alualu i luma o lenei ta’amilosaga, lea ua mafai ona auai mai ai le tele o ‘au lakapi, e aofia ai ma le ‘au a le malo o Fiti faapea ni ‘au lakapi se tolu mai Savaii.

Na ta’ua e Lemalu, i se feso’otaiga mai i le faiaoga a le ‘au a Fiti, o le ‘au lea o le a auai mai i le ta’amilosaga o lenei tausaga, o le ‘au fili lea a le atunu’u.

Ma na ta’ua e Lemalu, o le a avea lenei ta’amilosaga e su’e ai foi le ‘au a le Manu Samoa mo ta’aloga o le ta’ito’afitu, i le Olimipeka.

Sa aloaia e Lemalu ia le galulue fa’atasi o le kalapu a Malisi ma Faleata, aua le si’itaga o nei ta’aloga mai i le lotoifale, i ta’aloga fa’avaomalo, ma o le tausaga fou lea ua faamoemoe, e fa’afoeina ai e le kalapu a Faleata ia lenei ta’amilosaga faatasi ai ma le fesoasoani mai a le malo.

Na fa’aalia mai foi e Lemalu, o le to’atele o ‘au ua leva ona amata a latou toleniga.  E sefulu ono ‘au ia o le a tausinio mo le ipu (Tupua Fred Weitzell cup) ma le $15,000, e toavalu mo le ipu a George Meredith ma le $5,000, ae to’atolu ‘au a tamaitai lea o le a tausinio mo le ipu a Cynthia Wetzell ma le $1000.

MANUMALO LETUFUGA I LANA TAGI FAASAGA I LE MALO

Ua talia nei e le Faamasinoga Maualuga ia le tagi sa fa’aulu e le susuga ia Letufuga Atilla Ropati, lea sa avea ma Peresetene o faamasinoga Fanua ma Suafa Matai, e faasaga i le malo ma le fa’atula’i ese fa’afuase’i o ia mai lana galuega, ma ua ta’ua e le faamasinoga le le o gatasi o lea faaiuga a le malo ma le Faavae, ma e $750,000 le tinoitupe ua fa’atonuina nei e le faamasinoga ia le malo, ina ia totogia ia Letufuga.

Ina ua fa’atula’i ese e le malo ia Letufuga, sa faapea loa ona filifilia le susuga ia Lesatele Rapi Vaai e avea ma peresetene fou o faamasinoga tau i fanua ma suafa matai, e tusa ai ma suiga i le faavae na a’afia i le tulafono fou na pasia.