TALA MAI OFISA A LEOLEO

Pago Pago - AMERIKA SAMOA

TOATASI LE TAGATA AE TELE FALE UA MASALOMIA NA IA OSOFAIA

O le aso 31 o Me, na valaau atu ai pule o le fale ta lavalava i Iliili ma Pavaiai, i le ofisa a leoleo ina ua maua atu le faamalama o le latou pisinisi ua vane e le tagata, ma ua gaoia foi se tinoitupe e $370 sa i totonu o le latou masini.

O le 6:30 i le taeao lava lea e tasi, na agai atu ai leoleo i Pavaiai ma feiloai ai ma se tasi o pule o lea pisinisi ma saili se faamatalaga e uiga i lenei mataupu.  Na malaga faatasi le pule o le pisinisi ma leoleo i le fale ta lavalava ina ia taga’i sui malu o le malo i le mea na oso atu ai le gaoi ma se’i taga’i foi sui malu o le malo i le vitio a le faleoloa, lea o lo o faamaonia mai ai le osofaia o le pisinisi i le 1 o lea lava team.

I le taumate a le pule o le fale ta lavalava, e pe a ma le $250 le faitau aofa’i le tau o mea na faaleagaina e le gaoi, ae le aofia ai ma le tinoitupe sa gaoia.

Ae i le aso 3 o Iuni, 2023 na valaau atu ai se tina i le ofisa a leoleo i Tafuna, ma se faamatalaga e faatatau i le gaoi lea na osofaia le fale ta lavalava i Pavaiai.  Na faamatala e si tina lea, sa ia vaai i le tagata na osofaia le fale ta lavalava, i tafatafa o lona faleoloa i Iliili, ma o le alii lea o Etimani Canirahan, lea na maua lona ata i vitio a le faleoloa.  Sa ia ofoina le aveina atu o lea alii i le ofisa a leoleo, i lana taavale.

O le 7:35 i lea afiafi na o’o atu ai lenei tina i le ofisa a leoleo ma faamaonia o le alii o Etimani lea sa osofaia ia fale ta lavalava.  E ui sa fautuaina Etimani i ona aia faaletulafono, ae peitai, sa le i tuuina atu sana faamatalaga i leoleo, ma sa toe tatalaina o ia.

I le mataupu lona lua, na molia ai foi Etimani, ona o le masalomia o ia i le osofaia o le Mobile Quick Repair i Nu’uuli i le vaveao o le aso 9 o Iuni, 2023.

O le taeao o lea na aso, na taunuu atu ai leoleo ma faatalanoaina le pule o lea pisinisi ma sa faamatala e sia mafine, o lona alu atu e tatala lana pisinisi i le 7:30 i lea taeao, na ia vaaia ai le matala o le faamalama o lo o pito i tua o le fale ma sa ia vaaia le paepae solo o ni teu fugalaau o lo o iai tupe, i luga o le foloa, ae ua gaoia nisi o ula tupe.

Ina ua matamata si mafine i le ata vitio o lona faleoloa, na ia vaaia ai se alii o oso mai totonu o le faleoloa mai i se faamalama pito i tua ma gaoia se tinoitupe e i le va o le $4,000 ma le $5,000 sa gaosia ai ni ula ma teu fugalaau, o se sikaleti masini, telefoni feavea’i se 3 ma seisi tinoitupe e $1,000.

Ina ua agai atu leoleo i le pito i tua o le fale, sa maua ai nisi o tupe sa taumafai le gaoi e ave, e pe  ma le $60 lea na toe faafoi atu i le pule o le pisinisi.

Na faamaonia e leoleo ina ua latou matamata i le vitio, o le alii foi o Etimani lea sa faia lenei mea leaga, e ala i lona oso mai i totonu o le fale, i se faamalama toso, ma savali atu i le mea na iai le masini tupe a le faleoloa. 

O le aso Lulu, Iuni 21, 2023 na tulai ai le alii o Etimani i luma o le faamasinoga, ma ua molia nei o ia i faitauga e 9 o solitulafono, e aofia ai le faomea, solia sese o fanua a isi, gaoi ma le faaleagaina o mea totino a isi.

E $5,000 le tupe ua faatonuina e le faamaisnoga e totogi e lenei alii i moliaga muamua, ona faato’a mafai lea ona tatala i tua, ae $8,000 mo moliaga lona lua.

TAU SAILI LE TAGATA NA GAOIA LE FALEOLOA A LE TSM

O le 10:33 i le po o le aso 2 o Me, 2023, na osofaia ai e se tagata ia le faleoloa a le TSM i Tafuna ma ina ua taunuu atu leoleo, sa o latou talatalanoa ma le pule o le faleoloa.  O le po lava lea e tasi, na faatalanoa ai e leoleo ia se alii e suafa ia Ramota Mata’itusi ma ina ua matamata Mata’itusi i le vitio a le faleoloa, sa ia faamaonia ai, o lona tausoga o Samuelu Canirahan lea sa osofaia le faleoloa.

Sa faamaonia e Mataitusi, o Samuelu lea na laeiina le mitiafu lima uumi e lanu moli, o se ofuvae lanu uliuli ma se ufi fofoga e lanu uliuli, ma ia tata’eina se faitotoa i le pito i tua o le faleoloa, ma ulufale atu ai i totonu o le faleoloa.

Ma ia amata ona la’uina ni atigipusa ma oloa, mai i totonu o le faleoloa, agai i le pito i tua o le faleoloa, i le mea na ia oso mai ai i totonu.  Ae o le 2:30 i le vaveao o le aso 3 o Me, na toe foi atu ai Samuelu i totonu o le faleoloa, ae ua sui ona lavalava.

O le 11:37 o le taeao lava lea, na agai atu ai loa leoleo e saili ia Samuelu, ae peitai, e le i mauaina o ia.  O le aso 7 o Me i le 12:33 I le aoauli, na toe alu ai le sailiga o Samuelu ae peitai, sa le i faamanuiaina foi a latou taumafaiga.

O loo taumateina le tau aofai o oloa na gaoia, e pe a ma le $798.40, e aofia ai pusa sikareti, 4 pusa pia, 4 ‘chargers’ telefoni, 2 pusa mamoe ma pusa pisupo e 2.  

E o’o mai lava i le aso faraile o le vaiaso ua tuanai, e le i maua lava e leoleo ia Samuelu, mo faitauga e 9 o solitulafono, e aofia ai le faomea, solia o fanua o isi e aunoa ma se faatanaga, gaoi ma le faaleagaina o mea totino a isi.

E $8,000 le tinoitupe ua faatonuina e le faamasinoga e ao ona totogi e Samuelu, e tatala ai o ia i tua.

E fia faamanino e le Samoa News, e ui i le tutusa o faaiu a Samuelu ma le alii o Etimani lea foi ua molia i le gaoi, ae peitai, e leai se faamaoniga e aiga pe iai so la sootaga.