TALA MAI LEOLEO

Pago Pago - AMERIKA SAMOA

FA'AFEFE E SE TAMALOA LONA TO’ALUA I LE OTI, PE A ALU MA AVE TAMAITI

O le aoauli o le aso 4 o Tesema, 2024, na fa’afeso’ota’i ai e se tina ia le Ofisa a Leoleo i Tafuna, mo se fesoasoani talu ai ua fa’afefeina o ia i le oti, e lona to’alua, pe a alu ma ave le la fanau.

Sa ta’ua e le tina, e tusa ai ma fa’amaumauga a le faamasinoga, na amata mai lava ona o la pisa ma lona to’alua mai ia Tesema 1, 2024, ina ua ia mauaina se paipa lea e fa’aaoga e ula ai se vaega o fualaau faasaina, o le Aisa.

[Ua le lomia igoa o i latou o lo’o a’afia i lenei mataupu, aua le puipuiga o le tina ma le fanau.]

Sa faamatalaina foi e le tina, lona tata’eina o le paipa, lea na le fiafia ai lona to’alua ai ma ia fa’amata’uina le tina i le oti.

O le aso na soso’o ai (Tesema 2, 2024) sa mana’o ai le ua molia i se tupe, ae na tali atu iai le tina, o le tupe la e totoe, e fa’atau ai mea’ai a le fanau.  Ae peitai, na i’u lava ina tu’uina atu iai e le tina ia le tupe i le ua molia.  Ma ia fa’ailoa atu i le ua molia, o le a o latou toe fo’i ma lana fanau, i le fale a ona matua.

Ae to’atama’i ai le ua molia ma ia fa’afefeina le tina i le oti, i lana fale faigaluega, pe a o ese ma le fanau.  Sa ta’ua e le tina lona faatalitali se’ia alu ese le ua molia, mai i le fale, ona ia valaauina ai loa leoleo.

Ina ua taunu’u leoleo i le nofoaga na tupu ai le faalavelave, sa fa’asino iai e le tina ia le nofoaga o lo’o iai le ua molia.  Ae ina ua taumafai leoleo e talanoa ma fa’ailoa atu i le ua molia, ia le mafuaaga ua o atu ai, sa fa’afuase’i ona u’una’i e le ua molia, ia le tina, aga’i i leoleo, ae sola ese.

Sa taumafai leoleo e tuliloaina le ua molia, ae peitai, sa le’i mauaina o ia.

Na faapea loa ona aveina e leoleo ia le tina ma le fanau e to’atolu, i le Ofisa a Leoleo mo le fa’aauauina o le latou su’esu’ega.  Sa faapea foi ona fa’afeso’ota’iina ia le aufaigaluega a le DHSS, aua sa latou foi su’esu’ega.

Ma i le i’uga o le su’esu’ega a le DHSS, sa faia ai loa se faai’uga, o le a o le tina ma le fanau, e nonofo i le fale o matua a le tina.

Sa ta’ua i fa’amaumauga le le’i mauaina o le ua molia ma e le o malu puipuia le nonofo a le tina ma le fanau i le fale a ona matua, ona e le mamao tele mai i le fale a le ua molia.

E lima faitauga o moliaga ua faia e faasaga i le ua molia, e aofia ai le Fa’ao’olima i lona tulaga e tolu faapea ma le Fa’atupu Vevesi i totonu o le aiga.

O nei moliaga, o vaega ‘C’ o solitulafono mama, e mafai ona lokaina ai se tasi i aso e sefululima, po o se sala tupe i le va o le $150 ma le $300; po o faasalaga uma e lua.

E $3,000 le vaegatupe fa’atulagaina e mafai ona tatalaina ai le ua molia, e faatalitali ai lona faamasinoga.

SAUAINA E SE ALII 19 TAUSAGA IA LANA UO TEINE A’O SI’I LE PEPE

O le aoauli o le aso 30 o Novema, 2024 na sulufa’i ai se tina talavou i le fale a lona tuaoi, ina ia mafai ona valaau ai le Ofisa a Leoleo i Tafuna, e ripotia ai le sauaina o ia e lana uo tama, a’o ia si’iina le la pepe.

[O le a le lomia suafa o i latou na a’afia i lenei faalavelave, aua le puipuiga o le tina ma le fanau iti.]

Ua ta’ua i fa’amaumauga a le faamasinoga le agai atu o leoleo i le nofoaga na tupu ai le faalavelave ma talatalanoa ai ma le tina na a’afia, ae ua sola le ua molia.

Ina ua fesiligia e leoleo ia le tina mo le faamatalaina o le mea sa tupu, sa ta’ua e le tina le leotele o le musika a le latou tuaoi ma na le fiafia ai le ua molia, ma ia amata ona faia ni faamatalaga le logoleleia, e faasaga i le ‘mala’ ma lana musika.

Ae sa tali atu le tina, e na te le iloa pe aisea e ita ai fua le ua molia, o la e ta musika a le tuaoi, i totonu o le latou fale.  Ae lau mai e le ua molia ia le tina, o se ta’ifau, ma fai mai iai, e fa’asa ona ia (tina) toe tali atu ia te ia (le ua molia).

O le toe faapea atu o le tina, e na te le malamalama pe aisea e fai ai fua e le ua molia ia le tuaoi, na to’atama’i ai loa le ua molia ma savali ma i le po fa’alua foliga a le tina.  Ma sa faapea atu le tina i le ua molia, o le a ia ripotia o ia i leoleo, ona ua lua masina o lona ma’itaga.

Ina ua toe taumafai le ua molia, e tu’i foliga o le tina, sa poloka atu e le tina lana tu’i.  Ma na atili ai ona to’atama’i le ua molia ma ia tu’iina ai le puimanava o le tina ma togi i se kava o se ili eletise, lea sa tau i le papatua a le tina.  

Sa faapea foi ona futi mai e le ua molia, ia le ulu a le tina ma tu’i o ia, agai i le pa sima.  Ona alu lea i fafo o le ua molia ma u’u mai se matatao fagota ma taumafai e tui ai le tina, a’o la ta’o’oto faatasi ma le la pepe e 5 masina, i luga o le moega.

O iina na oso atu ai loa le uso a le ua molia, ma taofi le ua molia.  Sa ta’ua e le tina le savali i fafo o le ua molia, i le faitoto’a pito i luma, ae toe taamilo mai ma toe sau i totonu o le fale, i le faitoto’a pito i tua.  

Ae ua mafai ona se’i ese e se tasi o tausoga a le ua molia, ia le matatao fagota ma sa faatonuina e le uso a le ua molia, ia le tausoga, e ave’ese atu le pepe mai lona tina.

Na u’u mai foi e le ua molia ia se moli uila ma taumafai e ta ai le tina, ae peitai, sa pupuni mai e le uso a le ua molia.  Ma o iina na malaga ese atu ai loa le ua molia mai le fale, ae na ia palauvale mai i le tina ma fa’atonu e alu ese ma le fale.

Sa ta’ua e le tina le toe fo’i atu o le ua molia ma se naifi fa’amoe, a’o ia taumafai e teu a la ato ma fa’afefeina o ia i le oti a’o ia si’i ina le la pepe.  Na ia tamo’e loa i le fale a le tuaoi ma talosagaina le fa’aaogaina o se telefoni e valaau ai leoleo, ma lafi ai i le fale a le tuaoi, se’ia taunu’u atu leoleo.

Na fa’ailoa atu foi e le tina i leoleo le ia te ia le paipa lea o lo’o fa’aaogaina e le ua molia, e ula ai ana Aisa.  Sa faapea ona tu’uina atu lea paipa i le vaega o le Ofisa a Leoleo e mata’ituina ia vaega o Fualaau Faasaina. 

Sa aveina e leoleo ia le tina ma lana fanau e to’alua i lo latou ofisa i Tafuna e faatalitali ai le vaega a le EMS.  Ma i se taimi mulimuli ane, na faapea ona aveina atu le tina ma le fanau i le nofoaga o lo’o fa’alafi ai tina ma fanau sauaina, ona e le’i mauaina e leoleo ia le ua molia.

I moliaga e luau a molia ai lenei alii, e aofia ai le Fa’ao’olima i lona tulaga e lua (sauaga i totonu o le aiga), o se vaega ‘D’ o solitulafono mamafa, e mafai ona nofosala ai se tasi i le falepuipui, i le o’o atu i tausaga e lima, po o se sala tupe i le va o le $150 ma le $5,000; po o faasalaga uma e lua.

Faapea foi ma le moliaga o le Faatupu Vevesi i totonu o le aiga (sauaga i totonu o le aiga), o se vaega ‘C’ o solitulafono mama, e mafai ona nofosala ai i le falepuipui i aso e 15, po o se sala tupe i le va o le $150 ma le $300; po o faasalaga uma e lua.

E $50,000 na faatulagaina e mafai ona tatalaina ai le ua molia, e faatalitali ai lona faamasinoga.